”არც ერთი საპრეზიდენტო კანდიდატით არ ვარ აღფრთოვანებული, რომელიც დასახელდა, მათ შორის არც მარგველაშვილით, თუმცა, არც მის გაკრიტიკებას ვაპირებ... მას ვეთანხმებოდი მანამდე, სანამ შრომის კოდექსის მიმართ თავის პოზიციას დააფიქსირებდა”, - აცხადებს დეპუტატი კობა დავითაშვილი, რომლის თქმითაც, მარგველაშვილის პრეზიდენტობაზე პასუხისმგებლობას არ იზიარებს, რადგან მისივე თქმით, მის არჩევაში მონაწილეობა არ მიუღია... კობა დავითაშვილს ქვეყანაში მიმდინარე აქტუალურ პროცესებზე ვესაუბრეთ. - ქვეყანაში არასათანადო სისხლის სამართლის პროცესები მიმდინარეობს, - ყოფილი ხელისუფლებიდან მხოლოდ ერთი ჩინოვნიკი იხდის სასჯელს, ბაჩო ახალაია, მეორე ახლაღა მისცეს პასუხისგებაში, დანარჩენები კი მხოლოდ იდევნებიან. სასამართლო სისტემამ ტენდენცია დაამკვიდრა - ძებნას აცხადებენ მათზე, ვინც ისედაც გაქცეულია, მაგალითად, კეზერაშვილი და ეზუგბაია; ხოლო ვინც საქართველოშია, გირაოთი უშვებენ, თუნდაც ზურაბ ჭიაბერაშვილს... თუმცა, ისიც უნდა აღვნიშნო, რომ გირაოთი გარეთ გამოშვებული მერაბიშვილი რომ გვენახა, იმის მანიშნებელი იქნებოდა, რომ ის წინა ხელისუფლების მეგობარმა მოსამართლეებმა გაასამართლეს. - კოტე კუბლაშვილმა განაცხადა, რომ მართლმსაჯულება თანდათან დემოკრატიისკენ მიდის... - უკეთუ არა ვიხილო, არა ვირწმუნო... ჩემი კოლეგები ამბობდნენ, საკმარისია მოსამართლეების წნეხისგან გათავისუფლება და მათში სინდისი გაიღვიძებსო, მაგრამ ასე არ მოხდა. პრობლემა მხოლოდ კუბლაშვილში არ მდგომარეობდა, ბევრი მათგანი, რბილად რომ ვთქვათ, ცუდ საქმეებშია გარეული... ვნახოთ, რა მოხდება, თუ დროთა განმავლობაში გაირკვევა, რომ ჩემი კოლეგები მართლები არიან, მადლობელი ვიქნები, შარზე კი არ ვარ.- როგორ ფიქრობთ, შესაძლოა, გამოძიება პრეზიდენტამდეც მივიდეს?- აბა, მერაბიშვილი როდის იყო, გადაწყვეტილებებს დამოუკიდებლად იღებდა?.. მაგალითად, მე წავიდოდი მერაბიშვილთან საპროცესო გარიგებაზე, თუკი ის სააკაშვილის წინააღმდეგ მისცემდა ჩვენებას... ისე კი, რასაც ვხედავ, სააკაშვილი მერაბიშვილის დაპატიმრების გამო მაინცდამაინც დადარდიანებული არ ჩანს. ბოლო დროს, მათ ურთიერთობას დიდი სიყვარული არ ეტყობა. - 17 მაისის აქციას დასავლეთის მკაცრი შეფასებები მოჰყვა...…ამასთან, ”ევროპის სახალხო პარტიის” თავმჯდომარე მერაბიშვილის დაკავების ფაქტმა შეაშფოთა. ოპოზიციის წევრებმა განაცხადეს, რომ საქართველოს ხელისუფლების ბოლოდროინდელი ქმედებების შედეგად, შესაძლოა ევროპასთან დამშვიდობება მოგვიწიოს. თქვენ რას ფიქრობთ?- ჩემი ფანტაზია ისე შორს არ მიდის, რომ ვანო მერაბიშვილი სექსუალურ უმცირესობას მივაკუთვნო, მაგრამ ნაძლევს დავდებ, რომ მას ისე აქტიურად არ დაიცავენ, როგორც სექსუალურ უმცირესობას.... რაც შეეხება დასავლეთის შეფასებას 17 მაისის მოვლენებზე, რომ ჯერ კიდევ არ ვართ მზად ევროკავშირში შესასვლელად, - ჩვენ არასდროს ვიქნებით მზად, შევეგუოთ სექსუალური უმცირესობის აშკარა გამოვლინებას. მე არ მსურს, ჩემი შვილები მათი მორალით აღიზარდონ, რადგან მიმაჩნია, რომ ჩემი მორალი უკეთესია, მაგრამ ეს იყო ორი სამარცხვინო აქცია - შინაარსით სამარცხვინო იყო ლგბტ-ს აქცია, ხოლო ფორმით - კონტრაქცია. - იმ ასი ათას ადამიანს სასულიერო პირებმა ასი ათასი მოწამე უწოდეს...- 100 ათასი კაცი 100-ის წინააღმდეგ, გმირობა კი არა, სირცხვილია... მაპატიეთ და, ფეხებზე მკიდია დასავლეთის შეფასებები, მაგრამ ის, რაც იმ დღეს მოხდა, ქართველობაში არ ჯდება. მე არც ამსტერდამი მინდა, არც ირანი, არც რუსეთი და არც ამერიკა, - საქართველო მინდა, მაგრამ სირცხვილია, როდესაც მღვდელი დედას იგინება და ვიღაცას საცემად მისდევს. დედის გინებით ღვთის დიდება არ გამიგია...- მან განაცხადა, რომ ეს დამონტაჟებული იყო...- თუ დამონტაჟებულია, მოითხოვოს გამოძიება და დაისაჯოს ის ადამიანი, ვინც გაავრცელა. ძალიან კარგად ჩანდა და ისიც კარგად ვნახეთ, რომ მღვდლები შუაში არ იდგნენ და დაპირისპირებულებს არ აშველებდნენ... კარგი იქნება თუ ეკლესია ამ ადამიანებს სასჯელს დაადებს, ხომ არსებობს სჯულის კანონი და ნორმები. არ მომეწონა მეუფე იაკობის ქადაგება. მას რომ ვუსმენდი, მეგონა, თბილისის რომელიღაც უბნიდან იყო ჩართვა და არა, სამების საკათედრო ტაძრიდან...- ანუ პრემიერ-მინისტრის სიტყვები, პრობლემები ეკლესიაშიც არსებობს, საფუძველს მოკლებული არ ყოფილა?- დიახ, სხვათა შორის, იმ აქციაზე მომხდარი შეტაკება პრემიერ-მინისტრის განცხადების გამოძახილიც იყო, ანუ ეს იყო გარკვეული პასუხი ბიძინა ივანიშვილის სიტყვებზე, ეკლესიაში პრობლემებიაო. ეს იყო მათი პროტესტი, მათ საქციელში იკითხებოდა, ჩვენს ძალას დაგანახვებთ.... იმ ლოზუნგების მიღმა, რითაც ისინი გამოვიდნენ, პოლიტიკა იდგა. თუ მეუფე იაკობს პოლიტიკაში ჩართვა სურს, ეს მისი უფლებაა, ის საქართველოს მოქალაქეა და თუ უნდა კენჭიც იყაროს და საპრეზიდენტო არჩევნებშიც მიიღოს მონაწილეობა, მაგრამ ასეთ შემთხვევაში მასზე პოლიტიკური კრიტიკის თმენის ვალდებულება ვრცელდება...- ბატონო კობა, ხომ არ მიგაჩნიათ, რომ ბევრი რამის მიზეზი საზოგადოებაში განათლების პრობლემის არსებობაა?- დიახ, ასეა და ეს ეხება სასულიერო პირებსაც. ისინი თავიანთ სტატუსს ვერ აცნობიერებენ. ჩვენს ქვეყანაში სასულიერო პირები კომუნისტების დროსაც ხდებოდნენ და იმ დროს მათ მიმართ მკაცრი მოთხოვნები არ იყო, კაცი რომ პირჯვარს გადაიწერდა, ის უკვე სასულიერო პირი იყო. ზოგ სასულიერო პირს ჰგონია, ქუჩაში რომ იჯდა და გეი რომ ჩამოივლიდა და თავში წამოარტყამდა, ახლაც ისე უნდა მოიქცეს.ლალი პაპასკირი (სპეციალურად საიტისთვის)
