გიგი წერეთელი - "სააკაშვილს და მერაბიშვილს რომ სულ არაფერი სცოდნოდათ, ასეც არ იქნებოდა" - კვირის პალიტრა

"გაუგონარი სისასტიკე", -ასე შეფასდა სამეგრელოში აღმოჩენილი ძალადობის ამსახველი ვიდეოფირი. ნანახით გაოგნებულებმა ეს ფაქტი სისტემურ დანაშაულად შეაფასეს, რისი აღიარებაც "ნაციონალური მოძრაობის" წევრებს უჭირთ, თუმცა კარგად ესმით, რომ პოლიტიკურ პასუხისმგებლობას ვერ გაექცევიან. ""ჩვენ ერთი გუნდი ვართ!"" -დღეს ამ ლოზუნგს ძველი შინაარსი დაკარგული აქვს. პარტიის წევრები არ გამორიცხავენ, რომ მათაც უთვალთვალებდა წინა ხელისუფლება -თუ ვიდეომასალა მართლაც არსებობს, როგორც ჩანს, პარტია კიდევ ბევრი წევრის გარეშე დარჩება.

გიგი წერეთელი პარლამენტის წევრი, "ერთიანი ნაციონალური მოძრაობა":

-ფაქტია, რომ ძალიან ბევრი ადამიანი აღაშფოთა ვიდეოფირმა. ამის შემდეგ სინანულის განცდა მრჩება, რადგან მეგონა, რეფორმები ტარდებოდა ქვეყანაში.

-ამბობენ, რომ საქმე გვაქვს სისტემურ დანაშაულთან. თქვენ რას ფიქრობთ?

-ცხადია, სისტემაში ეს ხდებოდა, მაგრამ გამოძიებამ უნდა დაადგინოს, რამდენად მასშტაბური იყო ასეთი ქმედებები. როცა ციხის ვიდეოფირი გავრცელდა, ვაღიარეთ, რომ ეს იყო სისტემური ჩავარდნა. ახლა ვამბობ, ეს არა მხოლოდ პენიტენციარული სისტემის ჩავარდნა იყო, არამედ მთლიანად "ნაციონალური მოძრაობის".

-თქვენი აზრით, იცოდნენ მერაბიშვილმა ან პრეზიდენტმა, რომ მისი სტრუქტურის თანამშრომლები გაუგონარი სისასტიკით უსწორდებოდნენ ადამიანებს?

–-სულ რომ არაფერი სცოდნოდათ, ასეც არ იქნებოდა. თეორიულად შს მინისტრს უნდა ჰქონდეს ინფორმაცია, შეიძლება შიდა დაპირისპირების შედეგი იყო, რომ მან ინფორმაცია ნაკლებად მიიღო. ამ საკითხის შეფასებას უფრო კარგად შევძლებ საგამოძიებო პროცედურების შემდეგ. არ მინდა წარმოვიდგინო, რომ პრეზიდენტმა ან სხვა ჩვენი გუნდის ლიდერმა იცოდა, რომ ამ მეთოდებით მტკიცებულებებს აგროვებდნენ და ისინი მშვიდად ხვდებოდნენ ამას.

-ამბობენ, რომ ბევრ პოლიტიკოსზე არსებობს ჩანაწერები.

-არ გამოვრიცხავ, რომ ჩემზეც იყოს და ჩემს მეგობრებზეც ასეთი ჩანაწერები. არ მინდა დავიჯერო, რომ ეს პრეზიდენტმა იცოდა. მე მქონდა მასთან ამაზე ლაპარაკი და ის ამტკიცებდა, რომ არაფერი იცოდა ვიდეოფირების შესახებ. თუ წარმოგვიდგენენ კონკრეტულ პირებზე ფაქტებს, რომლებთანაც ერთ გუნდში მითანამშრომლია, მაშინ ჩვენ მივიღებთ გადაწყვეტილებას. მე ასეთი ადამიანების გვერდში დგომისთვის არ ვარ პოლიტიკაში.

ირმა ნადირაშვილი, პარლამენტის წევრი, "ნაციონალური მოძრაობა":

-როგორი შოკიც იყო ციხის ვიდეოფირი, ისეთივე ტკივილს მაყენებს ამ ფირზე საუბარიც. მე ამ ქვეყანაში ვცხოვრობ, ჩემი შვილი აქ იზრდება. მინდა, არსებობდეს პრევენცია, რომ ვერც ერთმა მანიაკების ჯგუფმა ასეთი რამის გამეორება ვეღარ შეძლოს. დღეს ამ გუნდის წევრი ვარ და ჩემს წილ პასუხისმგებლობას ვგრძნობ. თუ საბუთებს დამიდებენ, რომ ჩვენი პარტიის რომელიმე წევრი მსგავს სისაძაგლეში იყო ჩართული, მივიღებ ზომებს, თუმცა ეს არ ნიშნავს იმას, რომ პარტიიდან წავალ. ვიქნები აქტორი, რომელიც იტყვის, რომ საერთო არაფერი აქვს იმ პირებთან, რომლებიც ადამიანებს სიცოცხლეს უმწარებდნენ.

მანანა კობახიძემ მოგვიწოდა, დავხიოთ მანდატები და საპრეზიდენტო არჩევნებში მონაწილეობა არ მივიღოთ. არა მგონია, სწორი იყოს, ისაუბრო სისტემაზე და ჩემზე პასუხისმგებლობა ინდივიდუალურად გადმოიტანო. ეს არ იყო სისტემური პრობლემა, ეს იყო ცალკეული მანიაკების პრობლემა და "ქართული ოცნება" ამ საკითხებით სპეკულირებს. ეს არის ბრძოლა იმისთვის, რომ "ნაციონალურმა მოძრაობამ" საპრეზიდენტო არჩევნებში ვერ შეძლოს გამოსვლა. საუბარი იმაზეც, რომ ეს პარტია უნდა გაქრეს, არის ისტერიული წამოძახილი, რომელიც მოსახლეობის ნერვებზე მოქმედებს და მათ გააგრესიულებას ისახავს მიზნად.

-12 888 ფაილია. ეს არ მიუთითებს იმაზე, რომ გლობალური იყო ეს პრობლემა?

-გადაღებები იყო გლობალური და, როგორც ჩანს, ყველაფერს ყველგან იღებდნენ. დღეს მეუბნებიან, რომ შეიძლება ჩემზეც ჰქონდეთ ვიდეოფირი...  კარგია, თუ დაიდება ფაქტები, ვის რა პასუხისმგებლობა აქვს ამ საკითხში.

-თუკი თქვენზეც იქნება გადაღებული პირადი ცხოვრების ამსახველი ვიდეოფირი, ირწმუნებთ, რომ პირველი პირები იყვნენ ჩართულნი ამ საქმეში?

-თუკი ასეთი სარწმუნო ფაქტები დაიდება, აუცილებლად გავარკვევ, საიდან იყო ეს ბრძანება და შესაბამის რეაგირებასაც მოვახდენ.

-პრეზიდენტზე რომ მოიპოვონ ასეთი მტკიცებულება, უარს იტყვით მასთან ურთიერთობის გაგრძელებაზე?

-ყველაზე ვიტყვი მისი სტატუსის მიუხედავად.

აკო მინაშვილი, პარლამენტის წევრი, "ნაციონალური მოძრაობა":

-ეს იყო დანაშაული. ყველა, ვინც ამაში მონაწილეობდა, უნდა დაისაჯოს. სამწუხარო ის არის, რომ ხელისუფლება შერჩევითი სამართლით მოქმედებს. მაგალითად, ბედუკაძე, რომელიც წამების ორგანიზატორი იყო, გათავისუფლდა პასუხისმგებლობისგან. ამიტომ არ მჯერა "ქართული ოცნების" გულწრფელობისა, როცა ამბობენ, რომ იბრძვიან წამების წინააღმდეგ. თურმე ეს სისტემური დანაშაული ყოფილა. მაშინ შევარდნაძის დროს რა ერქვა ამას, რატომ არაფერს ამბობენ?

-მაშინდელი ძალოვანი უწყებების თანამშრომლები ალბათ ფიზიკურად უსწორდებოდნენ ადამიანებს, მაგრამ ცემა და ამ ფაქტების შედარება ლოგიკურია?

-რა მნიშვნელობა აქვს, ძალადობა ხომ იყო? მაშინ პოლიციელების გადაცდომა მასობრივ ხასიათს ატარებდა. აი, ეს არის სისტემური დანაშაული.

-ვერ დაგეთანხმებით, რომ ცემა და გაუპატიურება ერთი და იგივეა... ამბობთ, ეს არ იყო სისტემური დანაშაულიო. თუ პოლიტიკოსებზეც მოიპოვება ჩანაწერები, ეს რას ნიშნავს?

-ყველაფერი ეს არის სპეკულაცია და ჭორი, მოგონილი თემები და ისტორიები.

უტა ბიწაძე