"ისინი ავიდნენ იქ, სადაც მხოლოდ ჯიხვები არიან" -სვანეთში დაღუპული მთამსვლელების ბოლო წუთები (ექსკლუზივი) - კვირის პალიტრა

"მხოლოდ ერთი გადარჩა, ისიც ზვავში მოყვა, 2 საათი ცდილობდა ამოსვლას"

"გადარჩენილი საშინელ დღეშია... ხელების სულ დასისხლიანებული აქვს... ჩვენამდე რომ მოაღწია, ნერვული შოკი ჰქონდა"

"მესაზღვრეებმა გააფრთხილეს, რომ ეს ტერიტორია საშიში იყო, მაგრამ მაინც ავიდნენ"

სვანეთში ტრაგიკულად დაღუპულ უცხოელ ტურისტებს ისევ ეძებენ. 4 უცხოელი მესტიაში დაიღუპა, ერთი გადარჩა. ორი დაღუპული, ფრანგი სილვან ფავრ-ფელიქსი და გერმანელი ვინგფრიდ გერგი უკვე იპოვეს. ორი დაკარგულის - თიერი ვენზელის და ოლივერ კრაფტის ძებნა კი 8 მარტს, დილის 4 საათიდან ისევ განახლდება. გავრცელებული ინფორმაციით, 5 კაციანი ექსტრემალების ჯგუფი საქართველოში რამდენიმე დღის წინ ჩამოვიდა და ისინი სვანეთში 2 მარტს ავიდნენ. 4 დღე ფრანგი და გერმანელი ექსტრემალური სპორტის მოყვარულები ურთულესი მარშუტით მოძრაობდნენ. 6 მარტს, 11 საათზე, უცებ ზვავი ჩამოწვა და ხუთივე უცხოელი ქვეშ მოიყოლა.

სასწაულებრივად გადაურჩა სიკვდილს ფრანგი ექსტრემალი - გიულემ დე ფრანსაიზი. იგი თურმე 2 საათი ცდილობდა სამშვიდობოს გამოსვლას და საბოლოდ მოახერხა კიდეც, მომხდარი მესაზღვრეებისთვის ეცნობებინა.

საქმეში შესაბამისი სამსახურები ჩაერთნენ და ხანგრძლივი ძებნის შემდეგ 2 დაკარგულს მიაგნეს.

გიორგი მაკალათია, საგანგებო სიტუაციების მართვის დეპარტამენტის წარმომადგენელი:

-ორი დაღუპული უკვე ჩამოვასვენეთ, ორს ისევ ვეძებთ. სავარაუდოდ ისინიც დაღუპულები არიან. ხუთივე გამოცდილი მთამსვლელები და ძალიან კარგად მომზადებული მოთხილამურეები იყვნენ, თუმცა უბედურ შემთხვევას ემსხვერპლნენ. დაღუპულები ცნობილები არიან ამ სფეროში. მხოლოდ ერთი გადარჩა, ისიც ზვავში მოყვა, 2 საათი ცდილობდა ზვავიდან ამოსვლას და ძლივს გადარჩა. ჩვენამდე რომ მოაღწია, ნერვული შოკი ჰქონდა. მან მიგვიყვანა იმ ადგილამდე, სადაც სავარაუდოდ დაღუპულები უნდა ყოფილიყვნენ. გარდაცვლილებს ვიზუალურად მოტეხილობები არ აღენიშნებათ. ორივე ცხედარი რამოდენიმე მეტრით, დაახლოებით 50 მეტრის დაშორებით ვიპოვეთ. გადარჩენილის მონათხრობით, სავარაუდოდ, ვიცით დანარჩენების ადგილსამყოფელიც და ალბათ მათაც ვიპოვით. დილიდან განახლდება სამძებრო სამუშაოები. საშინელ დღეშია გადარჩენილი ტურისტი. ის სასტუმროში გადავიყვანეთ, რომ მოისვენოს, ძლივს დავაძინეთ. ხვალ ჩვენთან ერთად ისიც ჩაერთვება მეგობრების ძებნაში.

მესტიის მუნიციპალიტეტის გამგებლის კაპიტონ ჟორჟოლიანის თქმით, ისინი ურთულეს მონაკვეთზე იყვნენ ასულები და ყველაფერი ასეთი სავალალო შედეგით დასრულდა.

-3 საფრანგეთის მოქალაქეა, 2 გერმანიის. თხილამურებით ეშვებოდნენ ურთულესი მთებიდან და და ზვავში მოყვნენ. დიდი ვარაუდით, ყველანი დაღუპულები არიან. გადარჩენილს ხელები სულ დასისხლიანებული აქვს, მაგრამ ამის გარდა, სერიოზული დაზიანება არ აღენიშნება. მესაზღვრეებმა გააფრთხილეს ისინი, რომ ეს ტერიტორია საშიში იყო, მაგრამ არ დაიჯერეს, მაინც ავიდნენ და აი, როგორ დამთავრდა.

- ქართველი მეგზური ჰყავდათ?

- არა, მარტო უცხოელები იყვნენ. ძალიან მკაცრ მთებში ავიდნენ. ფაქტობრივად იქ, სადაც მხოლოდ ჯიხვები არიან და როგორც წესი, იქ ადამიანი არ ადის. სიმაღლე იმდენად არ აქვს იმ კლდეებს, მაგრამ ციცაბოა, ახლა თოვლი დნება და ზვავიც ამიტომ მოდის. სამწუხაროდ, ხშირად არ უჯერებენ ჩვენს მესაზღვრეებს ექსტრემალები. ადრეც რამდენიმეჯერ ჩვენმა მესაზღვრეებმა დააბრუნეს ისინი უკან. დაღუპულების ასაკი 35 წლიდან 50 წლამდეა. ყველაზე ასაკოვანი, 50 წლის მამაკაცია გადარჩენილი. ვწუხვართ მომხდარის გამო და ვუთანაგრძნობთ მათ ოჯახებს. იმედი გვაქვს, დაკარგულებს ვიპოვით და შევძლებთ, ცხედრები მათ ოჯახებს დავუბრუნოთ, თუმცა ღმერთმა ქნას, ვცდებოდე და ცოცხალი აღმოჩნდეს რომელიმე.

თეა ხურცილავა (სპეციალურად საიტისთვის)