"ყველა ტირის და განიცდის მომხდარს. სიმთვრალეში რაღაცაზე იჩხუბეს და ასეთი უბედურება მოხდა" - მარტყოფში მომხდარი მკვლელობის დეტალები
გარდაბნის მუნიციპალიტეტის სოფელ მარტყოფში მომხდარი მკვლელობის დეტალებს სამართალდამცველები ამ დრომდე არკვევენ. უმძიმესი დანაშაული გუშინ მოხდა. 34 წლის სპორტსმენი, გოჩა ჯეირანაშვილი მისმა ბავშვობის მეგობარმა ცეცხლსასროლი იარაღიდან გასროლით მოკლა. მას ხუთი ტყვია მანქანიდან ესროლა. ბიჭი ადგილზე დაიღუპა.
შემთხვევის ადგილზე მალევე მივიდნენ სამართალდამცველები. დამნაშავე ნიკა სახლთხუციშვილი მალევე დააკავეს. მომხდარზე საუბარი უჭირთ ადგილობრივებს.
როგორც ირკვევა, მკვლელობას მეგობრებს შორის შელაპარაკება უძღვოდა წინ.
„მთელი სოფელი შეძრულია ამ ამბით და მომხდარზე საუბარი ყველას უჭირს. მარტყოფი დიდი სოფელია, მაგრამ აქ ყველა ერთმანეთის ახლობელი და ნათესავია. რა უნდა ვთქვათ, საშინელება მოხდა. ორივე ერთად გაზრდილები, ბავშვობის მეგობრები არიან და მეზობლები. როგორც ვცი, სუფრასთან იყვნენ, მთვრალები, იქ მომხდარა შელაპარაკება. ამის შემდეგ გამოსულა ნიკა სახლთხუციშვილი, წამოუღია იარაღი და უსვრია მანქანიდან.
ყველა ტირის და განიცდის მომხდარს. სიმთვრალეში რაღაცაზე იჩხუბეს და ასეთი უბედურება მოხდა.
გოჩა კარგი ახალგაზრდა იყო, მოჭიდავე, სპორტსმენი, ჯანიანი ბიჭები რომ არიან, ასეთები არიან ორივე. ყველას რომ უყვარს. ნიკაც სპორტსმენია, რა გადაუბრუნდა თავში, არავინ იცის. შოკია ყველასთვის. სუფრიდან გამოსული ქუჩაში მოკლა. ეტყობა იარაღი გამოიტანა და მანქანიდან გაისროლა. არ ვიცი, თვითმხილველები არიან ამ ფაქტის, თუ - არა. რაზე მოუვიდათ ჩხუბი ესეც არ ვიცით. თანატოლები და ბავშვობის ძმაკაცები არიან. ნიკა დაკავებულია“, - გვითხრა ადგილობრივმა.
როგორც ადგილობრივები ამბობენ, მოკლული მოჭიდავე იყო და სპორტში მიღწევებიც ჰქონდა. მათ წარსულში არანაირი კონფლიქტი არ ჰქონიათ.
ნიკა სახლთხუციშვილი დაკავებულია. მას ცეცხლსასროლი იარაღის უკანონო შენახვა-ტარებას და განზრახ მკვლელობას ედავებიან. მომხდარზე გამოძიება სისხლის სამართლის კოდექსის 108-ე და 236-ე მუხლებით მიმდინარეობს.
(სპეციალურად საიტისთვის)