"რუსეთზე გამარჯვება ბრძოლის ველზე შეუძლებელია?" - სიმართლე თუ პუტინის ტყუილი - BBC
ბრიტანული სამაუწყებლო კომპანია "ბი-ბი-სის" რუსული სამსახურის (BBC news Russian) ვებ-გვერდზე გამოქვეყნებულია სტატია სათაურით - "რუსეთზე გამარჯვება ბრძოლის ველზე შეუძლებელია? რა თქვა ვლადიმერ პუტინმა ომზე და როგორი სიტუაციაა ფრონტზე სინამდვილეში".
გთავაზობთ პუბლიკაციას შემოკლებით:
რუსეთის ფედერალური კრებისადმი ვლადიმერ პუტინის მიმართვის ერთი მესამედი ნაწილი უკრაინასთან ომს დაეთმო. მას არ ულაპარაკია ე.წ. სპეცოპერაციის არც მიზნებსა და არც ამოცანებზე, სამაგიეროდ, დიდხანს ისაუბრა რუსეთის სამხედრო პოტენციალზე და ომის მიზეზებზე. "ბი-ბი-სი ნიუსის" (BBC news) რუსულმა სამსახურმა ვლადიმერ პუტინის რამდენიმე გამონათქვამი შეარჩია და შეამოწმა, თუ რამდენად შეესაბამებოდა სიმართლეს.
ვლადიმერ პუტინი: "ჯერ კიდევ "სპეციალური სამხედრო ოპერაციის" დაწყებამდე კიევსა და დასავლეთს შორის მოლაპარაკება მიმდინარეობდა უკრაინისათვის ჰაერსაწინააღმდეგო დაცვის თანამედროვე სისტემების, თვითმფრინავების და მძიმე ტექნიკის მიწოდებაზე".
"ბი-ბი-სი": სინამდვილეში ასე არ არის. 2014 წელს აშშ-ის პრეზიდენტმა ბარაკ ობამამ ხელი მოაწერა აქტს "უკრაინის თავისუფლების დაცვის შესახებ", რომელიც კიევისათვის იარაღის გადაცემას ითვალისწინებდა, მაგრამ 2015-2017 წლებში უკრაინას მიეწოდა მხოლოდ არალეტალური იარაღი და მოწყობილობები - დრონები, ავტომობილები, რადარები, საველე ჰოსპიტლები.. 2017 წელს დონალდ ტრამპის ადმინისტრაციამ მხარი დაუჭირა ლეტალური იარაღის მიწოდებას, მაგრამ საქმე ეხებოდა მხოლოდ თავდაცვით და არა - შემტევ იარაღს, რომ კიევს მოსკოვის აგრესია შეეჩერებინა. მხედველობაშია "ჯაველინები", პორტატული საზენიტო-სარაკეტო სისტემები ("სტინგერები") და ა.შ. ასეთი ტექნიკით დონბასში დისლოცირებული რუსული შენაერთების წინააღმდეგ შეტევა უაზრობა იქნებოდა.
მსგავსი ტექნიკა მისცეს უკრაინას სხვა ქვეყნებმაც: კანადამ - ჯავშანჟილეტები, დიდმა ბრიტანეთმა- ჯავშანავტომობილები და GPS-ნავიგატორები, საფრანგეთმა - ვერტმფრენები, გერმანია კი საერთოდ უარს აცხადებდა უკრაინისათვის რაიმე იარაღის მიწოდებაზე.
ვლადიმერ პუტინი: "რაც უფრო მეტი შორსმსროლელი დასავლური სისტემები გადაეცემა უკრაინას, ჩვენ იძულებულები ვიქნებით, უფრო მეტად ავარიდოთ საფრთხის წყარო ჩვენს საზღვრებს"
"ბი-ბი-სი": ამ თეზისს რუსეთის ხელმძღვანელობა ომის დაწყების დროიდან იმეორებს. კურსკისა და ბელგოროდის ოლქები რეგულარული სროლების ქვეშ ჯერ კიდევ ომის დაწყებიდან მოჰყვნენ, შემდეგ კი უკრაინის არმიის საჰაერო მოქმედებამ, დრონების მეშვეობით, სარატოვის ოლქამდეც მიაღწია. უკრაინის სიღრმეში შესულმა რუსულმა არმიამ ვერ შეძლო პოზიციების განმტკიცება და უკან დაიხია. ასე რომ, რუსეთის არმიის შემდგომი წინსვლა და საზღვრებიდან საფრთხის აცილება ვერ ხერხდება.
როგორც ცნობილია, "სპეცოპერაციის" ერთ-ერთი მიზანი იყო ნატოს გაფართოების შეჩერება რუსეთის საზღვრებიდან მოშორებით, მაგრამ კრემლმა პირიქით მიიღო - ნატო უფრო ფართოვდება, შვედეთისა და ფინეთის მიღებით. ფინეთს კი რუსეთთან 1000 კილომეტრამდე სიგრძის საზღვარი აქვს.
ვლადიმერ პუტინი: "რუსეთზე გამარჯვება ბრძოლის ველზე შეუძლებელია".
"ბი-ბი-სი": ბოლო 200 წლის განმავლობაში რუსეთის იმპერიის, საბჭოთა კავშირის და რუსეთის ფედერაციის ჯარებს ბევრი წარუმატებელი სამხედრო კამპანია აქვთ ჩატარებული - ყირიმის ომი (1853-56 წლებში), რუსეთ-იაპონიის ომი (1904-1905 წლებში), პირველ მსოფლიო ომში მონაწილეობა, ავღანეთი, ჩეჩნეთის პირველი ომი და სხვა. უფრო მეტიც - უკრაინის ომში ჩვენ მოწმენი ვართ, თუ როგორ დაიხია რუსეთის არმიამ კიევის გარეუბნებიდან, სუმისა და ჩერნიგოვის ოლქებიდან, ხერსონიდან, ლიმანიდან, იზიუმიდან, დატოვა შავი ზღვის კუნძული ზმეინიც. გაჩნდა უხერხული ხატოვანი გამონათქვამი: "რუსეთის არმია უკან კი არ იხევს, არამედ - ძალების გადაჯგუფებას ახდენს".
რუსეთის დაუმარცხებლობის თეზისის გამეორების დროს კრემლს, ალბათ, მხედველობაში აქვს ის, რომ ქვეყანას ბირთვული იარაღი გააჩნია. ამ ლოგიკით, უცხოეთის არმიას რუსეთის ოკუპირება და მოსკოვის დაკავება არ შეუძლია, თუმცა ასეთი მიზანი არც უკრაინას ჰქონია. კაცმა რომ თქვას, თეზისი - "ბირთვული სახელმწიფო ომს არ აგებს", უარყოფილია ვიეტნამში აშშ-ის მარცხით.
ვლადიმერ პუტინი: "აქტიურად დავნერგავთ უახლეს ტექნოლოგიებს, რომელიც არმიისა და ფლოტის ხარისხობრივ პოტენციალს გააუმჯობესებს. ჩვენ გვაქვს ისეთი ტექნიკის ნიმუშები, რომლებიც ბევრად კარგია დასავლურ ანალოგებზე".
"ბი-ბი-სი": რუსეთის პრეზიდენტი არმიის მოდერნიზებაზე ყოველ მიმართვაში ლაპარაკობს, თუმცა რუსული იარაღის შესახებ მისი ნათქვამი სასურველის სინამდვილედ წარმოჩენას ჰგავს. იგივე ცნობილი ფრთოსანი რაკეტა Х-22, თითქოსდა, წარმატებულია (უკრაინის განცხადებით, მისი ჩამოგდება ვერ ხერხდება), მაგრამ მაინც 40 წლის წინანდელი საბჭოური პროექტების საფუძველზეა შექმნილი და ამიტომ მალე მოძველდება. X-22-თან ერთად, ასევე, შედარებით წარმატებულია რაკეტა "ისკანდერი", თანამედროვე ტანკი Т-90м, მაგრამ რაოდენობრივად ცოტაა. რუსეთის ხელმძღვანელობას მოსკოვში გამართულ სამხედრო აღლუმებზე ახალი ტექნიკა გამოაქვს საჩვენებლად, მაგრამ მათი სერიული წარმოება პრობლემებს უკავშირდება.
ვლადიმერ პუტინი: ჩვენ არასდროს დავემსგავსებით კიევის რეჟიმს და დასავლეთის ელიტებს, რომლებიც "ჭინკებზე ნადირობით" არიან დაკავებულნი. არავის არაფერს ვერჩით იმათგან, ვისაც ფეხი დაუცდა და სამშობლოს განერიდა. მათ სინდისზე იყოს მათი საქციელი".
"ბი-ბი-სი": და მაინც, რუსეთის ხელისუფლება სხვადასხვანაირი ინსტრუმენტებით სარგებლობს მათ დასასჯელად, ვინც მხარს არ უჭერს ომს და რეჟიმის წინააღმდეგ გამოდის. მარტიდან რუსეთის სისხლის სამართლის კოდექსში შეტანილია შესწორება - სასჯელი "არმიის დისკრედიტაცის მცდელობის შესახებ" და "სამხედრო ფეიკების (დეზინფორმაციის) გავრცელების შესახებ". დეკემბრიდან გამკაცრდა კანონი "უცხოური გავლენის შესახებ", რომლის თანახმად, უცხოელ (უცხოურ) აგენტად შეიძლება ის პიროვნება ან ორგანიზაციაც გამოცხადდეს, ვინც დასავლურ დაფინანსებას არ იღებს.
გარდა ამისა, ჩინოვნიკები და კანონმდებლები აგრძელებენ ლაპარაკს, თუ რამდენად და როგორ შეიძლება დაისაჯონ რუსეთიდან მობილიზაციის დროს და ომის დაწყების მომენტში საზღვარგარეთ გაქცეული მოქალაქეები - მათი დისტანციური მუშაობის შეზღუდვიდან ქონების კონფისკაციის ჩათვლით.
ვლადიმერ პუტინი: დასავლეთი უკრაინიდან "ანტირუსეთის" შექმნას ცდილობს. ეს პროექტი ახალი არ არის".
"ბი-ბი-სი": რუსეთის პრეზიდენტს არა ერთხელ უთქვამს, რომ მსოფლიოში მოქმედებენ ძალები, რომლებიც რუსეთის წინააღმდეგ გამოდიან და იბრძვიან, ხოლო უკრაინა მათ ხელში ინსტრუმენტის როლს ასრულებს. ამ საკითხზე ლაპარაკის დროს რუსეთის პრეზიდენტი არაფერს ამბობს იმაზე, რომ უკრაინა სუვერენული სახელმწიფოა და მას უფლება აქვს, მოსკოვის დაუკითხავად, ისე იცხოვროს და განვითარდეს, როგორც თავად სურს.
ის აზრი კი, რომლის თანახმად, ვიღაცები უკრაინის მეშვეობით "ანტირუსეთის" პროექტს ახორციელებენ, "ბი-ბი-სიმ" ჯერ კიდევ 2021 წელს განიხილა. მოკლედ თუ ვიტყვით, ეს კონსპიროლოგიური ("შეთქმულების") თეორიაა, რომელიც პირველად 2012 წელს გამოქვეყნდა რუსული ჟურნალის - "ოდნაკოს" საიტზე, რომელსაც "როსნეფტის" ამჟამინდელი პრეს-მდივანი - მიხეილ ლეონტიევი და პოლიტკონსულტანტი - ლევ ვერშინინი გამოსცემდა.
მოამზადა სიმონ კილაძემ