"საერთოდ არ ვიცოდი სალომე ვისი და იყო, ან კი რა მნიშვნელობა ჰქონდა..." - რას წერს გიორგი კეკელიძე?
ეროვნული ბიბლიოთეკის დირექატორი გიორგი კეკელიძე ეხმაურება სალომე კენჭიაშვილის გადაწყვეტილებას, რომლის თანახმად მან მარო მაყაშვილის სახელობის სტიპენდიაზე უარი თქვა.
"მხოლოდ ფაქტები - სალომე კენჭიაშვილზე რადიო თავისუფლების სიუჟეტი ვნახე. სპონტანურად მივწერე ჟურნალისტს და ვუთხარი, რომ ძალიან კარგი გოგოა და ვფიქრობ, რომ ურიგო არ იქნება სტიპენდია დავუნიშნო და ეგებ დამაკვშირო მეთქი. მომცა ნომერი, დავურეკე და ვახარე. მასაც გაუხარდა. საერთოდ არ ვიცოდი ვისი და იყო და ნათესავი.
ან კი რა მნიშვნელობა ჰქონდა. სალომეს სტიპენდია დაერიცხა 17 მარტს (უკან დაგვიბრუნა გუშინ). ამ ხნის მანძილზე მე ავიტანე საოცარ ცილისწამებათა კასკადი ამ ამბის გამო. გუშინ სალომეს და წერს იმას, რასაც წერს - წაიკითხავდით ცხადია. არცერთ მედიას არ მივცემ კომენტარს, მათ შორის მათაც, ვინც ცდილობს, რომ სტიპენდიატის წინააღმდეგ მალაპარაკოს - სალომე არის შესანიშნავი გოგო და იმსახურებს საუკეთესოს. ჩვენ კი ვაგრძელებთ ჩვენს საქმეებს" - წერს კეკელიძე.
გუშინ გახდა ცნობილი, რომ 7-8 მარტის აქციების ერთ-ერთი სიმბოლო, ტაეკვანდოში ორგზის საქართველოს ჩემპიონი სალომე კენჭიაშვილი გიორგი კეკელიძის მიერ შეთავაზებულ სტიპენდიაზე უარს ამბობს.
ამის შესახებ ინფორმაციას სოციალურ ქსელში მისი უფროსი და, სოფია კენჭიაშვილი ავრცელებს, რომელიც 2021 წელს გიორგი კეკელიძეს სექსუალურ შევიწროებაში ადანაშაულებდა. მან მაშინ "ნეტგაზეთთან" ინტერვიუში თქვა, რომ კეკელიძე შიშველი ფოტოების გაგზავნას სთხოვდა. იმ დროს ეროვნული ბიბლიოთეკის დირექტორმა საპასუხოდ თქვა, რომ მზად იყო თავისი საქმიანობა შეეჩერებინა ყველა სფეროში და შეხვდროდა ყველას, ვისაც ამ საქმეზე კითხვა აქვს. სოფია კენჭიაშვილის თქმით, კეკელიძეს შეუძლია ეს თანხა იმ ადამიანს ჩაურიცხოს, ვისაც ნამდვილად სჭირდება.