"ხვიჩა მგრძნობიარე ბიჭია... მოედანზე საუკეთესო იყო" - რა თქვეს სპალეტიმ და პიოლიმ და როგორ ამხნევებენ "კვარას" მატჩის შემდეგ: გამოხმაურებები და ემოციური კადრები
ხვიჩა კვარაცხელიას ჰქონდა შანსი "ნაპოლის" გმირი გამხდარიყო, თუმცა, როგორც ამბობენ, ეს ფეხბურთია და ყველაფერი ხდება - ჩემპიონთა ლიგის მეოთხედფინალში, განმეორებით მატჩში დიეგო არმანდო მარადონას სახელობის სტადიონზე "ნაპოლი" "მილანს" დაუპირისპირდა.
ხვიჩამ 11-მეტრიანი დარტყმა ვერ გამოიყენა. მატჩი საბოლოოდ, ანგარიშით 1-1 დასრულდა, რაც არ იყო საკმარისი მომდევნო ეტაპზე ნეაპოლელთა გასასვლელად, რადგან პირველ მატჩი "მილანმა" შინ ანგარიშით 1:0 მოიგო.
მიუხედავად გაცუდებული პენალტისა, ხვიჩა მოედანზე საუკეთესო იყო. თუ სტატისტიკას ჩავხედავთ, ვნახავთ, რომ "კვარამ" გუშინ 10 წარმატებული დრიბლინგი შეასრულა, კარისკენ ექვსჯერ დაარტყა, ბურთს 98-ჯერ შეეხო და ამ მაჩვენებლებით მინდორზე საუკეთესო იყო.
Sofascore-მა "კვარას" თამაში 7.6 ქულით შეაფასა, Whoscored-მა კი 8.2 დაუწერა. ორივე პორტალის მიხედვით, შეხვედრის საუკეთესო მოთამაშე ხვიჩა კვარაცხელია გახდა.
მატჩის შემდეგ გამართულ პრესკონფერენციაზე "ნაპოლის" მთავარმა მწვრთნელმა ლუჩანო სპალეტიმ კვარაცხელიას შესახებ ისაუბრა:
"პირველ რიგში, "მილანს" გამარჯვებას ვულოცავ. ორივე მატჩში შესაძლებლობების მაქსიმუმი გამოავლინეს. ვფიქრობ, გამოცდილება დაგვაკლდა. სანაკრებო შესვენების შემდეგ ზოგიერთი მოთამაშე კლუბში დაღლილი დაბრუნდა. ფაქტია, იქამდე ფიზიკური თვალსაზრისით ბრწყინვალედ გამოვიყურებოდით. გაშვებული გოლის თავიდან არიდება შეგვეძლო, რადგან ბურთს ჩვენ ვაკონტროლებდით, თუმცა საჯარიმოში მათსავით კარგად ვერ ვმოქმედებდით.
თავიდანვე ვცდილობდი "კვარას" მეტსახელებზე პოზიციის დაფიქსირებას, თუმცა ის საუკეთესოს იმსახურებს. ხვიჩა ჯანსაღი, მგრძნობიარე ბიჭია. შესანიშნავი მახასიათებლები აქვს. პირველ ტაიმში ვერ მოახერხა მეტოქის მოტყუება, როცა ამის შანსი ჰქონდა, მაგრამ მეორე ტაიმში ორჯერ გიჟურად ითამაშა.
მე ბედნიერი ვარ მასთან მუშაობით. თავისი ნიჭით და ხარისხით ისევ დაგვეხმარება იმ დიდი მიზნის მიღწევაში, რომელიც წინ გვაქვს, ჩვენ ის გვჭირდება", - აღნიშნა ლუჩანო სპალეტიმ. გააგრძელეთ კითხვა