“ვაი, როგორ მიყვარს, იცით, ჩემი თბილისი? მენატრება... გთხოვთ, არ დამკარგოთ, არ დაგავიწყდეთ“ - იუბილარი ინგა ფერაძე, რომელიც ბრიუსელში ცხოვრობს, მაკა რაზმაძესთან გულახდილად საუბრობს
“ჩემი იუბილარი ინგა ფერაძე: საუბრის დასაწყისში ჯერ იწვა, მერე ნელ-ნელა მოცოცხლდა თავისი თბილისის ხსენებაზე და მერე ისე ამღერდა, მისი ხმის ძველი ჟღერადობა ისმის უკვე ვიდეოში.
- ჩემი თბილისი ყველაფერს მირჩევნიაო, არ დამკარგოთო, არ დამივიწყოთო - საქართველოს მოგვმართა!
თბილისის კიდევ ერთხელ ნახვაა მისი ოცნება... იქნებ შევძლოთ და შევუსრულოთ. ო, რა სევდიანი ჩავალ სამარეში, თუ არ ჩამატანეთ იასამანიო... კიდევ მრავალჯერ მოგველოცოს, ინგა, საყვარელო ჯერ რა დროს იასამანია“ - წერს ჟურნალისტი მაკა რაზმაძე და ემოციურ ვიდეოს აქვეყნებს.
მომღერალი ინგა ფერაძე წლებია ემიგრაციაშია. ის ბრიუსელის გარეუბანში სოციალურ ბინაში ცხოვრობს და საქართველოში დაბრუნებაზე დღემდე ოცნებობს. ინგა ფერაძე საქართველოში პოპულარული 70-80-იან წლებში იყო. ის ქალაქური ჟანრის სიმღერებს მღეროდა. ატარებდა წარმატებულ კონცერტებს, როგორც ყოფილი საბჭოთა კავშირის ტერიტორიაზე, ასევე მის ფარგლებს გარეთ. უკვე რამდენიმე წელია ბელგიაში იმყოფება. ფერაძე გარკვეული პერიოდი ქალაქ ბრიუსელში ევანგელისტურ ეკლესიაში გალობდა.