"2008 წლის შემდეგ ბინა გადმოგვცეს, რომელიც..." - რას ამბობს გიორგი ანწუხელიძის მეუღლე
26 მაისს, საქართველოს დამოუკიდებლობის დღეს, სოციალურ ქსელში ერთ-ერთმა მომხმარებელმა გამოაქვეყნა იტალიურ ეზოში გადაღებული ფოტო. კაცი წერდა, რომ საქართველოს გმირის, გიორგი ანწუხელიძის ოჯახი ამჟამად ცხოვრობდა სახლში, რომელსაც მხოლოდ ერთი ფანჯარა ჰქონდა. ფოტო უამრავმა ადამიანმა გააზიარა, გამოთქვეს ინიციატივა, რომ მოსახლეობას შეეგროვებინა თანხა, რომლის საშუალებითაც ოჯახს სახლს შეუძენდნენ. მთავრობას კი უყურადღებობაში ადანაშაულებდნენ.
რამდენიმე საათში ამ ადამიანმა ფოტო წაშალა. სამოქალაქო აქტივისტმა დომენიკ მანგომ კი დაანონსა, რომ ამ საკითხს თავად მიხედავდა, თუმცა თანხის შეგროვების შესახებ ჯერჯერობით არ წერს.
"ანწუხელიძის ოჯახი თურმე უმძიმეს გაჭირვებაში ცხოვრობს. სახლში, რომელსაც ფანჯრებიც კი არ აქვს. ამ საკითხს ჩვენ ერთად მივხედავთ, გმირები ამას არ იმსახურებენ", - წერდა დომენიკ მანგო.
მოგვიანებით, მომხდარს გიორგი ანწუხელიძის მეუღლე მაკა ჩიკვილაძე გამოეხმაურა და განცხადება გაავრცელა, სადაც განმარტავს, თუ რატომ ცხოვრობს ოჯახი აღნიშნულ ბინაში. მაკა ჩიკვილაძე:
"არასოდეს ვსაუბრობ ადამიანებთან ჩემს მატერიალურ მდგომარეობაზე. არიან ადამიანები, ვინც მხარში მიდგანან. თავს მარტო არ ვგრძნობ. ჩემი ეზოს მსგავს ეზოში თბილისში ბევრი ადამიანი ცხოვრობს.
2008 წლის შემდეგ თავდაცვის სამინისტრომ ბინა გადმოგვცა, რომელიც საჭიროების გამო გავასხვისეთ. ახლახან თავდაცვის სამინისტროს მხრიდან კვლავ გაკეთდა შემოთავაზება ჩვენი ოჯახისთვის გადმოეცათ ბინა. სხვა ეზოშიც მექნება შესაძლებლობა გიმასპინძლოთ.
ჩემთვის ყველაზე მნიშვნელოვანი ის სითბოა, რომელსაც გიორგის კოლეგებს შორის ვგრძნობ სამსახურში.“