დატბორილი სახლები, ეზოები, ვენახები და პარალიზებული ქუჩები - კახეთში სტიქიას ებრძვიან
ყვარლის მუნიციპალიტეტის სოფელ გავაზში სტიქიას ებრძვიან.ძლიერი წვიმის შედეგად მდინარე ფატმასური ადიდდა. სოფელში დაიტბორა საცხოვრებელი სახლები, ეზოები და ვენახები, პარალიზებულია ცენტრალური ქუჩები და სკოლის მიმდებარე ტერიტორია.
ადგილობრივების თქმით, სახლების დატბორვა არასათანადოდ გაწმენდილმა სანიაღვრე არხებმა გამოიწვია.
"2010 წლიდან არ გასუფთავებულა სანიაღვრე არხები და ამან გამოიწვია, ვერ გაატარა ჭარბი წყალი. მინდვრიდან და სავარგულებიდან მოდის, საათები რომ გადის, ემატება და არ აკლდება. ძალიან ცუდი მდგომარეობაა, ფაქტობრივად წყალში ვართ" - ამბობს ერთ-ერთი ადგილობრივი.
ფატმასური ღვარცოფული მდინარეების კატეგორიას განეკუთვნება - იგი 2016 წელსაც ადიდდა და მრავალი ოჯახი დააზარალა.