"უკრაინელებს აქვთ ზუსტი დამიზნების იარაღი, რომლითაც პოზიციებზე მიაქვთ იერიში, ოღონდ საფორტიფიკაციო ნაგებობებს კი არა, რუსებს ზურგში ესვრიან, საიდანაც არმია მარაგდება საწვავით, საკვებით, საბრძოლო მასალით. თუ უკრაინელებმა რუსებს მარაგი გაუნადგურეს, ფორტიფიკაცია სასაკლაოდ იქცევა“ უკრაინის პრეზიდენტ ვოლოდიმირ ზელენსკის განცხადებით, ფრონტის ხაზიდან­ მიღებული ახალი ამბები "მთლიანობაში­ პოზიტიური, მაგრამ რთულია". მისი თქმ­ით, ახალი დასავლური იარაღის, საბრძოლო თვითმფრინავების ნელი ტემპით მიწოდება, რუსეთის თავდაცვას ხელს უწყობს. პრეზიდენტის აპარატის უფროსის მრჩევლის, მიხაილ პოდოლიაკის თქმით კი უკრაინა ჯერ მხოლოდ რუსეთის არმიის თავდაცვის სისუსტეების გამოსავლენად გადადის იერიშზე და კონტრშეტევა არ დაუწყია. გვესაუბრება სამხედრო მიმომხილველი, საერთაშორისო ურთიერთობების სპეციალისტი გიორგი კობერიძე. - უკრაინა ჯერ კონტრშეტევისთვის მომზადებული დანაყოფების 10%-ს იყენებს­, ისიც სამხრეთში. მათი ლოკალური შეტევის­ შედეგად ველიკა-ნოვოსილკის სამხრეთით რამდენიმე დასახლება გათავისუფლდა და რუსების თავდაცვის ზღუდესა და სხვა დასახლებულ პუნქტებს შორის ბუფერული ზონა შეიქმნა. ეს ტერიტორია დონეცკი-ლუგანსკის ოლქებს ესაზღვრება, მარიუპოლისკენ გზა იქ გადის. უკრაინელები ერთი კი არა, რამდენიმე მიმართულებით უტევენ, მათ შორის, მდინარე დნეპრის სიახლოვეს და მნიშვნელოვანი წინსვლა აქვთ. თუმცა ეს არ ნიშნავს, რომ ომში უკვე დიდ გარდატეხას უნდა ველოდოთ, მაგრამ დასახლებული ტერიტორიების გათავისუფლება ძალიან მნიშვნელოვანი იყო. რუსი სამხედროებისგან განსხვავებით, უკრაინელები არც უშვებენ, რომ დამარცხდებიან. მათი მოქმედება იმ შესაძლებ­ლობით, რაც აქვთ, შედეგიანია - მთავარია, ტემპი არ შეანელონ. უკრაინელები უახლოვდებიან მთავარ თავდაცვის ზღუდეს, რომელიც კონტრშეტევამდე არსებული ფრონტის ხაზის შიგნით არის, იმავდროულად, ათავისუფლებენ ოკუპირებულ დასახლებებს. რამდენიმე­ მიმართულებით ერთდროულად დაიწყეს იერიში: დონეცკის ოლქში იბომბება რუსების სამხედრო სამიზნეები და ტექნიკის შესაკეთებლად გადაკეთებული ქარხანა. ველიკა-ნოვოსილკის მიმართულებაზე, სტარომლინივკის ახლოს, საარტილერიო დუელი უკრაინელების უპირატესობით მიმდინარეობს. ისინი AT2-ს, დისტანციური განაღმვის ეფექტურ სისტემას იყენებენ - საარტილერიო დანადგარი ისვრის ნაღმს, რომელიც ფეთქდება და ის ტერიტორია, რომელზეც სამხედრო ტექნიკამ უნდა გაიაროს, "სუფთავდება". უკრაინა გააქტიურდა პოლოხის, ველიკა-ნოვოსილკის, ორეხოვო-ტოკმაკის მიმართულებითაც. ამ შეტევებში რუსეთის სუსტი წერტილები გამოაშკარავდება. შეიძლება ითქვას, ახლა კონტრშეტევისწინა დაზვერვა მიმდინარეობს. - ითქვა, რომ მთავარი კონტრშეტევა შეიძლება სამხრეთით დაიწყოს. - არ გამოვრიცხავ, რომ ლუგანსკის მხარეს დაარტყან. აგვისტო-სექტემბერში ხერსონის მიმართულებაზეც აქტიური შეტევა­ იყო, მაგრამ მერე ტემპი შენელდა,­ სამაგიეროდ, რამდენიმე დღის შემდეგ ხარკოვის მიმართულებაზე გააქტიურდა. უკრაინას აქვს შეცდომები, სამხედრო თუ ტაქტიკური, ტექნიკის დანაკარგიც, მაგრამ შეტევაზე გადასული მხარისთვის ეს ჩვეულებრივი ამბავია. ველიკა-ნოვოსილკის მიმართულებაზე უკრაინელებმა რამდენიმე "ბრედლი" და "ლეოპარდ 2"-ები დაკარგეს, მაგრამ ეკიპაჟები გადარჩნენ. უკრაინელები ყველა სამხედროს უფრთხილდებიან, მაგრამ ძალზე მნიშვნელოვანია დასავლეთში გაწვრთნილი მებრძოლები. რუსეთს ადამიანური დანაკარგი არ ადარდებს.­ ომის პირველ ეტაპზე დაუნდობლად გაწირა ელიტური სამხედრო დანაყოფები, მათ შორის ფსკოვის ცნობილი დივიზიები და ბრიგადები. ისინი კიევსა და ხარკოვზე მიუშვეს, მაგრამ ვერც ერთი ვერ აიღეს. ბელგოროდში თავდასხმების მოგერიება და ლუგანსკის რაიონში, სვიატოვე-კრემინის ფრონტზე ძალების მობილიზება რუსეთს ცუდ დღეში აგდებს. კრემინის ტყეში მის სამხედრო ტექნიკას უმძიმესი დარტყმა მიაყენეს. უკრაინელების ლოკალური შეტევები არ წყდება ბახმუტის მიმართულებითაც, ოდნავ ქვემოთ, სადაც ავდეევკა დონეცკს ესაზღვრება.­ მარიინკის მონაკვეთზეც ინტენსიური შეტაკებებია, რაც რუსეთს ერთ კონკრეტულ მიმართულებაზე კონცენტრირების საშუალებას არ აძლევს. რუსებს კახოვკის კაშხალი ჯერ კიდევ სექტემბერში ჰქონდათ დანაღმული. შიდა ნაწილი ნოემბერში ააფეთქეს. ჰესის ასაფ­ეთქებლად მძიმე ტექნიკაა საჭირო, რასაც უკრაინელები ვერ შეძლებდნენ - უკრაინელებმა კახოვკის ხიდის დაზიანებას "ჰაიმარსებით" რამდენიმე კვირა მოანდომეს. კახოვკიდან შავ ზღვამდე მონაკვეთს ჯერ ვერ გაივლიან, მაგრამ ჩრდილოეთით, ზაპოროჟიემდე, დაგროვილი წყლის მასა იკლებს და შესაძლოა ენერგოდარის ატომურ სადგურთან მდინარის გადალახვა შეძლონ. უკრაინელებს აქვთ ზუსტი დამიზნების იარაღი, რომლითაც პოზიციებზე მიაქვთ იერიში, ოღონდ საფორტიფიკაციო ნაგებობებს კი არა, რუსებს ზურგში ესვრიან, საიდანაც არმია მარაგდება საწვავით, საკვებით, საბრძოლო მასალით. თუ რუსებს მარაგი გაუნადგურეს, ფორტიფიკაცია სასაკლაოდ იქცევა. ფორტიფიკაციის გარღვევა შეიძლება. დაცვითი ხაზის პირველ შრეს ყოველთვის კარგად ამაგრებენ, მაგრამ ღრმა პოზიციები ასე კარგად არ არის დაცული. ამიტომ, თუ უკრაინელები მელიტოპოლის, ტოკმაკის ან მარიუპოლისკენ გზის გაჭრას შეძლებენ, მათი შეჩერება რთული იქნება. ამ მხარეს ბუნებრივი წინააღმდეგობები არ არსებობს, ტყე და ბორცვები არ არის და მდინარეც ცოტაა. პრობლემა ის არის, რომ მთელი ოლქი დანაღმულია. უკრაინელებს სასანგრე ბრძოლების გამოცდილება დაუგროვდათ. ჯერ კიდევ 2015 წლიდან იბრძვიან, ახლა კი მისი გამოყენების შესაძლებლობა აქვთ. უკრაინას დიდი რაოდენობით ცოცხალი ძალა არა ჰყავს, სამაგიეროდ, დასავლური დაზვერვა ზუსტ ინფორმაციას აწვდის. პირდაპირ რეჟიმში­ იღებენ კოორდინატებს. არადა, ერთი მიზნის განადგურებას ათი ან მეტი გასროლა სჭირდება. - ბევრჯერ ითქვა, რომ ომი ხანგრძლივი იქნება. დასავლეთის მხარდაჭერა ერთსულოვანია. უკან დასახევი არც მას აქვს? - დღეს თვითგადარჩენისთვის დასავლეთიც იბრძვის, ოღონდ უკრაინის ტერიტორიაზე. თუ რუსეთი ამ ომში გაიმარჯვებს, ისეთ მსოფლიოში გავიღვიძებთ, სადაც ომები ჩვეულებრივი მოვლენა იქნება.დასავლეთმა დიდი რესურსი ჩადო უკრაინაში და თუ წარმატებას ვერ მიაღწია, გამოდის, ომი ვერ მოიგო, რასაც არ დაუშვებს. ასე რომ, უკანდასახევი არ ექნება. რუსეთისთვის დიდი პრობლემაა საარტილერიო ჭურვები, რაც დიდი რაოდენობით უკრაინასაც არა აქვს. რუსეთს უჭირს თანამედროვე ტექნოლოგიაშიც - ცდილობს დრონების, "ლანცეტების" წარმოება გაააქტიუროს. "ლანცეტი" ზუსტი გამოყენებისაა, კამერის საშუალებით მიდის მიზნამდე და მას სამხედრო ტექნიკის გასანადგურებლად იყენებენ, ქალაქებზე იერიში კი ირანული დრონებით მიაქვთ. დიდი ჩამორჩენა აქვთ საჰაერო დაზვერვასა და ტექნიკაში, საკმარისად არა ჰყავთ შემტევი ტანკებიც. ეს დეფიციტს არ ნიშნავს, თუმცა უწყვეტი რესურსი არა აქვთ. - რუსეთის პრემიერ-მინისტრი მედვედევი წყალქვეშა კაბელების აფეთქებაზე ლაპარაკობს. - რუსეთს წითელი ხაზების გადაკვეთის არ ეშინია, ამიტომაც სულ უფრო მეტი სახელმწიფოს ლიდერი უწოდებს მას ტერორისტულ ქვეყანას. მაინც არა მგონია, ამაზე წავიდეს, რადგან ეს იქნება საერთაშორისო ტერორიზმი მსოფლიოს წინააღმდეგ და პასუხი ამაზე მასშტაბური იქნება. თუ ატომური იარაღის გამოყენების დროს ხალხი იხოცება, წყალქვეშა კაბელების დაზიანებისას სასიცოცხლოდ მნიშვნელოვან ტექნოლოგიებს ექმნება საფრთხე. რუსეთს ახასიათებს ჩადენილის უარყოფა, თუმცა პასუხი მაინც მძიმე იქნება, რადგან ეს უკვე პირდაპირ დასავლეთზე შეტევას ნიშნავს, რასაც ის არ შეეგუება.
