"კიდევ ერთხელ ვითამაშებთ მშვიდობისთვის" - შოთა არველაძე უკრაინის მხარდასაჭერ მატჩში მსოფლიო ფეხბურთის ვარსკვლავებთან ერთად ითამაშებს
ვეტერანი ფეხბურთელი, შოთა არველაძე სოციალურ ქსელშ პოსტს აზიარებს და წერს, რომ უკრაინის მხარდასაჭერ საფეხბურთო მატჩში მიიღებს მონაწილეობას, რომელიც მსოფლიოს ფეხბურთის ვარსკვლავების მონაწილეობით, 5 აგვისტოს ლონდონში, სტემფორდ ბრიჯზე გაიმართება.
"მიხარია, რომ მაქვს შესაძლებლობა, მონაწილეობა მივიღო საფეხბურთო მატჩში, რომელიც უკრაინის ეროვნული ნაკრების კაპიტნის, ოლექსანდრ ზინჩენკოსა და ლეგენდარული ფეხბურთელის, ანდრეი შევჩენკოს ორგანიზებით, ლონდონში გაიმართება.
მსოფლიო ფეხბურთის მოქმედ და ყოფილ ვარსკვლავებთან ერთად, 5 აგვისტოს, კიდევ ერთხელ ვითამაშებთ მხარდაჭერისთვის, მშვიდობისთვის, ბავშვებისთვის და მათი მომავლისთვის. უკრაინის და უკრაინელი ხალხის მხარდაჭერა ყველა ეტაპზე, და განსაკუთრებით ახლა, ძალიან მნიშვნელოვანია.
ასევე, ძალიან მნიშვნელოვანია, რომ მატჩში მონაწილეობას 20-ზე მეტი ქვეყნის და ეროვნული ნაკრების წარმომადგენელი მიიღებს. შევხვდებით სტემფორდ ბრიჯზე", - წერს არველაძე.