"ბოლოს ბათუმში 1978 წელს ვიყავი, ახლა ისტორიული ადგილები უნდა ვნახოთ... ჩვენ ყველა საბჭოთა კავშირი ვართ" - რას ამბობენ სოჭიდან ბათუმში ჩამოსული კრუიზის რუსი ტურისტები?
საკრუიზო გემი Astoria Grande დღეს დილით ბათუმში შემოვიდა. გემი 22 ივლისს სოჭიდან ახალი მარშრუტით გაემგზავრა, რომელიც ბათუმში გაჩერებასაც მოიცავს, - ამის შესახებ რეპორტაჟი ტელეკომპანია Россия 1-მა მოამზადა.
გავრცელებული ინფორმაციით, გემზე 850 მგზავრი, მათ შორის რუსი ტურისტები იმყოფებიან.
"მათ ტურისტების მოთხოვნით გადაწყვიტეს დამატებითი გაჩერება შავი ზღვის სანაპიროზე. ორგანიზატორები მიიჩნევენ, რომ საქართველოს კურორტს შეუძლია მნიშვნელოვნად გაზარდოს ინტერესი რეისის მიმართ. უფრო მეტიც, მგზავრს არ სჭირდება დამატებითი დოკუმენტები“, - ნათქვამია ტელეკომპანია Россия 1-ის რეპორტაჟში.
კრუიზიდან ჩამოსული რუსი ტურისტები ამბობენ, რომ ისტორიული ადგილების სანახავად ჩამოვიდნენ ბათუმში და რუსეთის მიერ საქართველოს ოკუპაციაზე დასმულ კითხვაზე ამბობენ, რომ მათი ქვეყანა ოკუპანტი არ არის, ნაწილის განცხადებით კი ამ თემაზე საუბარი უბრალოდ არ სურთ.
"აფხაზეთი ჩვენ თქვენგან გავათავისუფლეთ, მათ გვთხოვეს დახმარება, თქვენ ტანკებით შეხვედით იქ. ჩვენ ვნახეთ ეს ტანკები, მე ვიყავი აფხაზეთში და თავად ვნახე. ჩვენ არ დაგვიკავებია არც აფხაზეთი და არც საქართველო. ოსეთის შესახებ არაფერი ვიცი, ალბათ მათ გვთხოვეს დახმარება და დავეხმარეთ. რუსეთის მიერ საქართველოს ტერიტორიების ოკუპაციის შესახებ არაფერი ვიცი".
"ბოლოს 1978 წელს ვიყავით ბათუმში, ახლა ისტორიული ადგილები უნდა ვნახოთ. საქართველო - ჩვენ ყველა საბჭოთა კავშირი ვართ, ერთიანი ქვეყანა. მე ძველი ადამიანი ვარ და იმ დროით ვცხოვრობ".
"ოკუპაციის თემაზე ვერაფერს ვიტყვით, რუსეთი არ არის ოკუპანტი, მოდით, აფხაზეთისა და ოსეთის პრობლემა თავად გადაწყვიტეთ" - ამბობენ კრუიზიდან ჩამოსული რუსი ტურისტები. მათ კომენტარებს "მთავარი არხი" ავრცელებს.