„იქნებ მკვდარი მაინც დამიბრუნონ“

რამდენიმედღიანი ძებნის შემდეგ, გალის რაიონში გაუჩინარებული 28 წლის ნათია ბახტაძის საქმეზე დაკავებულმა აინარ წვიჟბამ დანაშაული აღიარა, ამბობს, რომ მკვლელობა ეჭვიანობის ნიადაგზე ჩაიდინა... აფხაზური მედიის ცნობით, მან გოგო ჯერ გაიტაცა, შემდეგ კი "ლექსუსის" მარკის ავტომანქანის სალონში გაგუდა, ცხედარი კი კვალის წასაშლელად ვარდნილჰეს-3-ის კასკადთან მოიშორა... ადგილობრივი ტელევიზია "გალმედია" ავრცელებდა კადრებს, როგორ კარნახობდა დამნაშავე სამართალდამცავებს ადგილს, სადაც წვიჟბამ მოკლული გოგონა დატოვა, თუმცა, ცხედარს ვერ მიაგნეს - ვარაუდობენ, რომ გვამი მდინარემ წაიღო... ადგილზე ჩატარდა სამძებრო სამუშაობი, კაშხლიდან წყალიც გაუშვეს, მაგრამ გოგონას ცხედარს ჯერ კიდევ ვერ მიაგნეს... ადგილობრივი ე.წ. პროკურატურის ცნობით, აინარ წვიჟბა წარმოშობით ოჩამჩირიდანაა. მას ნათია ბახტაძესთან რამდენიმეწლიანი ურთიერთობა აკავშირებდა, ბოლო ხანებში კი წვიჟბა გოგონას ავიწროებდა და ემუქრებოდა... ნათია ბახტაძეს ბოლო კავშირი დედასთან 28 ივლისს ჰქონდა. "ჩემი შვილი ღამეებს ათენებდა, რომ კარგად ესწავლა. გალის მეორე საშუალო სკოლა, შემდეგ კი უმაღლესი სასწავლებელი წარჩინებით დაამთავრა. არასდროს არავისთან პრობლემა არ გვქონია. წლებია გალის ცენტრში, მშობლების სახლში ვცხოვრობთ. ყველა გვიცნობს, ვინც ვართ და რას წარმოვადგენთ. არ ვიცი, რა მოხდა. სახლიდან საღამოს 18 საათისკენ გავიდა. გარკვეული დროის შემდეგ მასთან დაკავშირება ვცადე, მაგრამ ტელეფონი გამორთული ჰქონდა. კიდევ ცოტა ხანს დაველოდე და რომ აღარ გამოჩნდა, დეპუტატ თემურ შერგილიას დავურეკე და ვუთხარი, რომ შვილს ვერ ვუკავშირდებოდი... შემპირდა, რომ შინაგან საქმეთა სამინისტროში დარეკავდა. როგორც კი სოციალურ ქსელში დავწერე, რომ შვილი დავკარგე, მაშინვე შემეხმიანა ყველა: ადგილობრივი ხელმძღვანელობა, ახლობლები, აქაური, ენგურსგაღმელი მეგობრები და ნათესავები... მხოლოდ ის გავიგე, რომ ის გარეწარი დაკავებულია. ბოლომდე იმედი მქონდა, რომ ჩემი ნათია ცოცხალია... ახლა რა ვქნა, ცხედარსაც კი ვერ პოულობენ, იქნებ მკვდარი მაინც დამიბრუნონ..." - ამბობს იამზე აგუმავა. აფხაზურ მედიასთან საუბარში გალის დეპუტატი თემურ შერგილია ადასტურებს, რომ ბრალდებული დაკავებულია: "დედა-შვილი ორივე პედაგოგები არიან, გარემოცვა მათ ენდობა და პატივს სცემს... ამ ოჯახს გალის რაიონი არც ომის დროს და არც შემდეგ არ დაუტოვებია. რაც შეეხება, აინარ წვიჟბას, ის ძალიან კარგი ოჯახის შვილია. მამამისი წლების განმავლობაში მუშაობდა გალის რაიონის ადმინისტრაციის უფროსის მოადგილედ. შვილს გალში ბიზნესი ჰქონდა, მამას ეხმარებოდა, ქალაქში რამდენიმე კომერციული ობიექტიც ჰქონდათ... დარწმუნებული ვარ, გამოძიება საქმეს ბოლომდე მიიყვანს. ახლა მთავარია, გოგონას ცხედარი ვიპოვოთ, რათა უბედურ დედას შვილის დატირების შესაძლებლობა მაინც მიეცეს... ძალიან ვწუხვარ გოგონას გამო, მას მხოლოდ დედა ჰყავდა, რომელმაც ყველაფერი გააკეთა, რომ გოგონასთვის განათლება მიეცა. ნათია სკოლაში მუშაობდა და ალბათ, სამომავლო გეგმებიც ჰქონდა... რაც შეეხება მათ ურთიერთობას, გოგონას დედა ამის შესახებ ჩვენთანაც საუბრობდა. თქვა, რომ ხან ჩხუბობდნენ, ხანაც რიგდებოდნენ, სულ კონფლიქტი ჰქონდათო... უდიდესი ტრაგედია მოხდა. ადამიანი ასე დღისით-მზისით მოკლეს და "გააქრეს". ადგილობრივების თქმით, ადამიანების დღისით-მზისით გაქრობა აფხაზეთში უჩვეულო სულაც არ არის. ინფორმაცია, რომ თითქოს გოგონა ილორის ტყეში, ფიჭვნარში ნაწამები იპოვეს, უსაფუძვლოდ არ გავრცელებულა, სამართალდამცავებმა იმ ტერიტორიაზე ნამდვილად იპოვეს ქალის ცხედარი, რომელიც სოხუმში ექსპერტიზისთვის გადაგზავნეს - დიდი ალბათობით, ცხედარი დაახლოებით ერთი თვის წინ დაკარგულ დრანდელ გოგონას ეკუთვნის... იმავე ტერიტორიაზე ნაპოვნია კიდევ ერთი გოგონას ცხედარი, რომლის ვინაობაც უცნობია. ადგილობრივების თქმით, ასეთი საშინელი საქმეების უკან გავლენიანი ოჯახის შვილები დგანან, რადგან რეგიონში დაუსჯელობის სინდრომია... ადგილობრივების თქმით, წვიჟბების ოჯახს გალში ფქვილის ბიზნესი აქვს. მათ არ სჯერათ, რომ ბიჭი სათანადოდ დაისჯება, რადგან "ფულიანმა მამამ უკვე ფეხზე დააყენა გავლენიანი სანაცნობო, რომელიც პატარა აფხაზეთში ბლომად ჰყავს..." მათივე თქმით, წვიჟბა მას შემდეგ ალაპარაკდა, რაც ე.წ. პროკურატურაში მამამისი მივიდა. "მამამ დაარიგა, რა და როგორ ეთქვა, ვითარება რომ შეემსუბუქებინათ... ეჭვიანობის თემაც, რომელსაც გალის დეპუტატი და სხვა ჩინოვნიკები აქტიურად იმეორებენ, ხელოვნურად არის შემოტანილი. ბიჭი ამბობს, ცოლობაზე უარი მითხრა, შემდეგ კი მანქანიდან გაქცევა სცადა, რაზეც ვიეჭვიანე და გაბრაზებულმა ვერ მოვზომეო... სინამდვილეში, სხვა რაღაცაშია საქმე... სხვა მაფიოზებივით, უმცროს წვიჟბასაც ციხეში სასათბურე პირობებს შეუქმნიან - სულ ცოტა, სამვარსკვლავიანი სასტუმროს ნომერს გაუხსნიან, ცოტა ხანში კი, როცა ეს ამბავი ყველას მიავიწყდება, მზრუნველი მამა ყველაფერს მოუგვარებს და რუსეთში გაუშვებს", - წერს აფხაზი ინტერნეტმომხმარებელი. "საქმეში ჩაერთვნენ ტროლებიც, რომლებიც სხვადასხვა ვერსიას ავრცელებენ, მაგალითად, თითქოს გოგონამ თაღლითურად მოაგროვა ფული, შემდეგ კი ენგურს იქით გადავიდა და გაუჩინარდა... აფხაზეთში ცოლად მოყვანის მიზნით ქალის გატაცება ყველაზე უწყინარი მიზეზია. აქ დაღამებამდე თუ არ შეასწარი სახლში, შემდეგ ბედს ხარ მინდობილი, განსაკუთრებით სოფლის მოსახლეობა, რადგან ტრანსპორტი 5 საათის შემდეგ არ დადის და ტაქსით მგზავრობა ახალგაზრდა ქალისთვის ძალზე სახიფათოა. რეგიონში ადამიანის უფლებები რა ხანია არ არსებობს, ქალის - მით უფრო... ზოგადად, დანაშაულის დიდი წილი, იქნება ეს ტურისტის გატაცება თუ ადგილობრივზე ძალადობა, ტაქსის მძღოლებზე მოდის. მათ ყველა მიუვალი ადგილი იციან, ასეთი ადგილები კი აფხაზეთში ყოველ ნაბიჯზეა. რეგიონში დაკარგული ადამიანების სტატისტიკას არავინ აწარმოებს, მაგრამ დახურულ ჯგუფებში ორ კვირაში ერთხელ მაინც იდება პოსტები, რომ იძებნება ადამიანი და ძალიან ცოტა თუ იწერება, რომ იპოვეს. ე.წ. შსს დაკარგული ადამიანების აღრიცხვას კი არა, ავტოსაგზაო შემთხვევების სტატისტიკასაც არ აწარმოებს... რაც შეეხება საქმის გამოძიებას, აფხაზეთში ყველაფერი ხელის ჩამორთმევით, დარეკვით ან მოლაპარაკებით გვარდება. აქ სიტუაციას "ძლიერნი ამა ქვეყნისანი" მართავენ და სულაც არ გამიკვირდება, რომ ეს საქმე მიფუჩეჩდეს. იმედია, გოგონას დედა არ გაჩუმდება და როგორც ქართულ, ასევე აფხაზურ მხარესაც შეაწუხებს... არ ვიცი, აინარ წვიჟბა ქართველ გოგონასთან დაახლოებას რატომ ცდილობდა, მაგრამ ითქვა, რომ ისე ავიწროებდა, გოგონა რუსეთში, ნათესავებთან გაქცევას აპირებდა, მაგრამ საბუთების საქმე ვერ მოაგვარაო. შესაბამისად, ის ვერსიაც ვრცელდება, რომ გოგონა ვიღაცების დახმარებით აფხაზეთის დატოვებას ცდილობდა, ეს ამბავი წვიჟბამ გაიგო და გაიტაცა. მაგრამ სად გააქრო გოგო? აქ რაღაც სხვა ამბავია... - ამბობს გალის მცხოვრები "კვირის პალიტრასთან". მარინა, ოჩამჩირის მკვიდრი: "ამ ამბავმა რამდენიმე წლის წინ მომხდარი დეპუტატ ჯოპუას ოჯახის წევრების საქმე გაგვახსენა - მაშინ ახალგაზრდა კაცმა იძალადა შეზღუდული შესაძლებლობის მქონე გოგონაზე, რომლის ოჯახიც დაბალი წრიდან იყო და ხმას ვერ იღებდა, სანამ საზოგადოებამ ეს ამბავი არ გააპროტესტა... ჯოპუების მსგავსი უკიდეგანო გავლენის მქონე ოჯახებისთვის კანონი არ არსებობს! ასე რომ, აფხაზეთში უსამართლობით ვერავის გააკვირვებ. იქით მიუცვივდნენ დაზარალებულ ოჯახს, როგორ თუ სახელი გაგვიტეხეო... ჯოპუა დააკავეს, მაგრამ ციხეში სასტუმროს პირობებში ჰყავდათ... აფხაზები ბრაზობენ, ქართულ მედიაში ერთი ამბავია, ჩვენი "სახელმწიფო ინსტიტუტების დაკნინება უნდათ და ცრუინფორმაციას ავრცელებენო"... აფხაზეთის "ხელმძღვანელობას" სულაც არ აწყობს, აქ ადამიანების გაქრობა ჩვეულებრივ ამბად ითვლებოდეს, რადგან იციან, რომ ქართული მედია და ადამიანის უფლებადამცველი ორგანიზაციები დიდ ხმაურს ატეხენ... აფხაზი აქტივისტების თქმით, ბოლო ხანს ე.წ. პროკურატურამ რამდენიმე პირზე აღძრა სისხლის სამართლის საქმე, მაგრამ მათ აფხაზეთის დატოვება მოასწრეს. "ყველაფერი ხდება მარტივად - რეკეტიორები იკეთებენ ნიღბებს და გასატაცებელ ობიექტს ესხმიან თავს, სვამენ მანქანაში და შემდეგ ოჯახის წევრებთან გადიან კავშირზე ფულის გამოძალვის მიზნით. მაგალითად, ომარ მირცხულავას პირდაპირ სოხუმის ბაზარში დაესხნენ თავს, ერთ საათში კი მის ოჯახს 12 მილიონი დოლარი მოსთხოვეს. მილიციამ ვითომ არაფერი იცოდა. უფრო ადრე ქალაქის ცენტრიდან გაიტაცეს აფხაზეთის მოქალაქე ირინა დოჩია. მის გატაცებაში ეჭვმიტანილები იყვნენ გუდაუთელები: ალხაზ ძიძარია, გენადი ბლაბი, ვარდენ ჭანტურია, ასტამურ ძიძარია და ჯიმბერ ავიძბა, მაგრამ როგორც ცნობილია, გუდაუთელი ე.წ. კანონიერი ქურდის რაულ ბარცბას კლანი ხელშეუხებელია. ამიტომაც ისინი მალევე გაათავისუფლეს. მოსახლეობა კლანებს შორის სივრცეში ვცხოვრობთ და ვცდილობთ მათ ფეხებში არ გავედოთ", - წერს ნიკოლო ლაკობა. p.s. დაკავებულ აინარ წვიჟბას ბრალის წარდგენის შემთხვევაში 6-დან 12 წლამდე თავისუფლების აღკვეთა ემუქრება. მდინარე ენგურში კი გოგონას ცხედარს ისევ ეძებენ.