"განადგურებული ვარ, ძალიან შეურაცხყოფილად ვგრძნობ თავს... ჩვენს თვალწინ დაიღუპნენ ადამიანები" - დავით ჯელაძის ემოციური პასუხი ირაკლი კობახიძეს
3 აგვისტოს შოვში მეწყერმა, ამ დროის მონაცემებით, 24 ადამიანის სიცოცხლე იმსხვერპლა, ამ დრომდე ეძებენ დაკარგულ მოქალაქეებს. სტიქიას სასწაულებრივად გადარჩენილი ადამიანები კი საზოგადოებამ რაჭიდან გავრცელებული ფოტოებით გაიცნო, ერთ-ერთი მათგანი დავით ჯელაძეა, რომელმაც მცირეწლოვანი დისშვილი ზურგით გამოიყვანა და გადაარჩინა.
დღეს "ქართული ოცნების" თამჯდომარემ, ირაკლი კობახიძემ განაცხადა, რომ "პრაქტიკულად წარმოუდგენელია" იმ გზის გავლა მეწყერის დროს, რაც შოვში, სტიქიის ეპიცენტრში მოყოლილმა დავით ჯელაძემ დისშვილთან, პატარა მაშოსთან ერთად გაიარა. ამ განცხადებას უპასუხა დავით ჯელაძემ:
"ძალიან შეურაცხყოფილად ვგრძნობ თავს... ყოველ დღე იმის იმედად ვიღვიძებდით, რომ ვინმე დაგვირეკავდა და გამამხნევებელ შეტყობინებას მაინც მომწერდა, "ეს როგორ შეძელი" - ამ ფრაზით ვიღვიძებდით. დღევანდელმა განცხადებამ შოკში ჩამაგდო, გამანადგურა. ყველაფერი რაც მოვყევი და რაც გადაგვხვდა თავს, თურმე ტყუილი ყოფილა. ახლაც როგორ ვსაუბრობ არ ვიცი, ძალიან აღელვებული ვარ. ასეთი შეურაცხყოფილი არასდროს ვყოფილვარ.
სტიქია ძალიან სწრაფად ვითარდებოდა. ჩვენს თვალწინ დაიღუპნენ ადამიანები, 6 ადამიანი ჩემს თვალწინ დაიღუპა. ის, რომ ერთი ნაპირიდან მეორე ნაპირზე ბავშვით როგორ შეძლო გადასვლა წარმოუდგენელიაო, მართლა წარმოუდგენელია ეს როგორ შევძელი და ეს როგორ გავაკეთეთ მე და მაშომ.
ისეთ ლაფი იყო, რომ იმ ადგილას გაჩერება შეუძლებელი იყო. ერთ ადგილზე რომ გაჩერებულიყავი, მაშინვე იძირებოდი და წამიერად დაიხრჩობოდი. მაგ ძალამ გადამიყვანა მეორე ნაპირზე, ვფიქრობდი, რომ იქ უსაფრთხო ადგილი იქნებოდა. იმის შიშით გადავდიოდი, რომ მეწყერი არ მოგვწეოდა, ვჩქარობდი და როგორ მოვახერხე არ ვიცი. იმის ნაცვლად, რომ ვინმე გვერდში დამდგომოდა. ირაკლი კობახიძე გამოდის და ამბობს, ტყუილს იძახიო, რა უნდა გავაკეთო არ ვიცი.
ყოველ დღე იმის იმედად ვიღვიძებდი, როგორმე დამევიწყებია ეს დღეები... ადამიანებს მივაწოდე ინფორმაცია და მიხვდნენ რა საშინელება ტრიალებდა იმ ადგილას. უამრავი ადამიანია დაღუპული და დაკარგული, იმის იმედად ვიყავი, რომ ეს ადამიანები იქნებ იპოვონ, ჩემს თავს, ჩემს ოჯახს და იმ გადარჩენილებს აღარ დავეძებდი, ჩვენ ჩვენს თავს როგორმე მივხედავთ. მედიკამენტებიც ჩენი სახსრებით ვიყიდეთ და ფსიქოლოგიურადაც ჩვენით ვუმკლავდებით. დღემდე არანაირი დახმარება არ მიმიღია", - აღნიშნავს დავით ჯელაძე "ფორმულასთან" საუბრისას.
შეგახსენებთ, რომ "ქართული ოცნების" თამჯდომარის, ირაკლი კობახიძის თქმით, "პრაქტიკულად წარმოუდგენელია" იმ გზის გავლა მეწყერის დროს, რაც შოვში, სტიქიის ეპიცენტრში მოყოლილმა დავით ჯელაძემ დისშვილთან, პატარა მაშოსთან ერთად გაიარა.
"გადავამოწმებთ, მაგრამ ცოტა მეეჭვება... რატომ იყო საჭირო ერთი ნაპირიდან მეორეზე გადასვლა, არ ვიცი, რადგან უფრო უსაფრთხო იყო იმ ნაპირზე დარჩენა. . რადგან იქ ბევრი ადამანი დარჩა და მოახრეხეს გადარჩენა...
თქვენ წარმოიდგინეთ, ჩვენ მეორე დღეს ვიყავით იქ და იმ გზაზე გადასვლა იყო პრაქტიკულად წარმოუდგენელი. ამიტომ გადასამოწმებელია ეს ყველაფერი." - განაცხადა კობახიძემ.