"ჩვენ ვერ შევცვლით იმას, რაც უკვე მოხდა..." - რას წერს ზაზა მესხის ყოფილი მეუღლე, რომლის ორ შვილსაც სტიქიის ზონაში დღემდე ეძებენ?
შოვში მომხდარი ტრაგედიიდან 11 დღე გავიდა. ოფიციალური მონაცემებით, ამ დრომდე იდენტიფიცირებულია 24 გარდაცვლილი. მაშველები კიდევ 9 ადამიანს ეძებენ. დაკარგულებს შორის არიან ზაზა მესხი და მისი სამი შვილი. ტრაგედიიდან ორი დღის შემდეგ გარდაცვლილებს შორის ნახეს ზაზას მეუღლე, უკრაინელი ჟურნალისტი ალინა პოლიკოვსკა.
დაკარგული სამი შვილიდან ორი - ზაზა მესხს პირველი ქორწინებიდან ჰყავდა. ყოფილი მეუღლე სინტა დეპონტი ტრაგედიის მეორე დღეს უფროს შვილთან ერთად ჩამოვიდა საქართველოში და მას შემდეგ ყოველდღიურად აქვეყნებს ინფორმაციას სოციალურ ქსელში, თუ როგორ მიმდინარეობს სამძებრო სამუშაოები.
მან რამდენიმე საათის წინ სოციალურ ქსელში პოსტი გამოაქვეყნა:
„ნათესავებთან მძიმე საუბარი გვქონდა; ყველანი ემოციურები ვართ და ეს საერთო გადაწყვეტილების მიღებას არ აადვილებს. ადრეც აღვნიშნე, რომ ზოგს უნდა მომხდარში დამნაშავეების პოვნა და მათი დასჯა. ჩვენთვის ის, რაც მოხდა, არის სტიქიური უბედურება, რომელიც ხდება მთებში, სადაც ბუნებას უფრო დიდი ძალა აქვს, ვიდრე ყველაფერს, რაც ადამიანს შეუძლია გამოიგონოს. თუ კი ქმედება თქვენთვის დაკარგვის ტკივილთან გამკლავების გზაა, ერთი მიმართულება, რომელიც ვფიქრობ, რომ სასარგებლოა, არის მხარდაჭერისა და ექსპერტიზის მობილიზება ადრეული გაფრთხილების სისტემების განვითარებისთვის (და ზეწოლა ხელისუფლებაზე, რომ ისინი მიიღონ და განახორციელონ).
რაც უკვე მოხდა, იმას ვეღარ შევცვლით... ვხედავ, რომ ზაზას ჰყავს ბევრი მეგობარი სხვადასხვა ქვეყნებში, და რომ ბევრ თქვენგანს სურს რაღაცის გაკეთება (ისევე როგორც სხვებს). გთხოვთ, თუ გსურთ რაიმე სახის მოქმედების განხორციელება, პირველ რიგში დამიკავშირდით მე კოორდინაციისთვის! გახსოვდეს, რომ ზაზას უფროსი შვილი, და დედამისი, რომელიც ასევე ორი დაკარგული ბიჭის დედაა, ისევ აქ ვართ და იცოდეთ, რომ მინდა ყველა ბავშვზე ვიზრუნო. ეს მოიცავს მათ პირად ცხოვრებაზე ზრუნვას. გთხოვთ არ გააზიაროთ მათი სახელები (სოციალური) მედიაში, და იქნებ ბავშვების სურათების დადებაც არ არის ამდენად საჭირო... მათი ამოცნობა უკვე ფოტოებით ვერ მოხდება...“, - წერს ზაზა მესხის ყოფილი ცოლი.