"ძვირფასო, ეს სულაც არ არის შესანიშნავი“ - რაზე ისაუბრეს ტელეფონით ილონ მასკმა და ვლადიმირ პუტინმა?!
SpaceX-ის დამფუძნებელი და "ტვიტერის" მფლობელი ილონ მასკი რუსეთის პრეზიდენტ ვლადიმერ პუტინს პირადად ესაუბრა და პუტინთან საუბარს "შესანიშნავი დიალოგი" უწოდა. ამის შესახებ პენტაგონის ყოფილი ოფიციალური პირი, თავდაცვის მდივნის ყოფილი მოადგილე, კოლინ კალი გამოცემა New Yorker-თან საუბრობს.
მისი ინფორმაციით, პუტინსა და მასკს შორის სატელეფონო საუბარი 2022 წელს შედგა, იმ პერიოდში თვითონ ჯერ კიდევ პენტაგონის ოფიციალური პირი იყო და "ტვიტერის" მფლობელისგან პუტინთან საუბრის შესახებ ინფორმაცია პირადად მოისმინა. გარდა პუტინთან დიალოგისა, მაშინ კალი ილონს ესაუბრა უკრაინელი სამხედროებისთვის Starlink-ის ინტერნეტთან წვდომის შესახებ.
"მე მქონდა შესანიშნავი დიალოგი პუტინთან“, - ციტირებს მასკის სიტყვებს პენტაგონის ყოფილი მაღალჩინოსანი, რომელმაც თავის მხრივ, მილიარდერს უთხრა. - "ძვირფასო, ეს სულაც არ არის შესანიშნავი“.მასკსა და პენტაგონის მაშინდელ ჩინოვნიკს შორის საუბარი მაშინ შედგა, როცა უკრაინულ ძალებს შეფერხება ჰქონდათ მასკის თანამგზავრულ, Starlink-ის ინტერნეტთან წვდომაზე. იმ პერიოდში SpaceX-მა წამოაყენა მოთხოვნა, რომ აშშ-სა და მის მოკავშირეებს გადაეხადათ "სტარლინკის" ხარჯების დიდი ნაწილი უკრაინაში კომპანიის მიერ გაწეული მომსახურებისთვის.
"ჩემი დასკვნა იყო, რომ ის (ილონ მასკი) ნერვიულობდა, რადგან სტარლინკის ინსტერნეტთან უკრაინელი ჯარისკაცების წვდომა რუსეთში სულ უფრო მეტად განიხილებოდა, როგორც უკრაინელებისთვის ომის მხარდაჭერა და მასკი ეძებდა გზებს რუსეთის შეშფოთების ჩასაცხრობად“, - განუცხადა კალმა გამოცემას.