"მოულოდნელი და შოკისმომგვრელი მომენტი იყო, როცა ჩემი ფოტო აარჩიეს... ასე გამოვჩნდი ჟურნალის გარეკანზე" - ქართველი გოგონას ამერიკული ცხოვრება და პოპულარობა "ტიკტოკზე"

მარი დუა, ბევრისთვის ცნობილი, როგორც კელი, tiktok-ზე თუ არა, facebook-ზე აუცილებლად გეყოლებათ ნანახი, ახალგაზრდა გოგონა, მშვიდი ხმით, რომელიც ლამაზ, გამორჩეულ სამკაულებს ამზადებს. ამ სასიამოვნო პროცესს ვიდეოებით გვიზიარებს და თან თავის ცხოვრებაზე გვიყვება ხოლმე. კელის საინტერესო ცხოვრება აქვს, ამერიკულ ზღაპარში ცხოვრობს, სადაც თავის სურვილებს ნელ-ნელა ისრულებს და ადამიანებისთვის საინტერესო სილამაზეებს ქმნის. - კელი, ჯერ შენს თავზე გვესაუბრე და გაგვიმხილე, როგორ გახასიათებენ მეგობრები, ახლობლები? - სახელი, რომლითაც ჩემი მაყურებელი მიცნობს, კელია, ასევე, მეძახიან მარი დუას. ამჟამად კალიფორნიის ქალაქ ლოს ანჯელესში ვცხოვრობ და ხელოვნებით ვარ გატაცებული. არ მახსოვს, ახლობლებთან საუბარში ვინმეს დავეხასიათებინე, იშვიათად მაქვს იმის ფუფუნება, რომ ჩემს მეგობრებთან დრო გავატარო, დისტანციის გამო, ამიტომაც უფრო სხვა თემებზე ვსაუბრობთ ხოლმე, ძირითადად, ხელოვნებაზე და უმეტეს შემთხვევაში, ვცდილობთ, რაც შეიძლება მეტი ვიხალისოთ. - რა თვისებას გამოარჩევ შენში? - შეიძლება არც ისე კარგი თვისებაა, მაგრამ დალოდება არ მეზარება ხოლმე, მოთმინების უნარი მაქვს საკმაოდ კარგი. ასევე, შეიძლება ითქვას, რომ ინტერესიანი ვარ, მიყვარს ძიება. ალბათ, ხელოვნება ასე ძალიან რომ არ ყოფილიყო ჩემთან ახლოს, არქეოლოგი, ისტორიკოსი ან მკვლევარი ვიქნებოდი, მთელ ცხოვრებას წიგნებში თავჩარგული გავატარებდი. - როგორია შენი ამერიკული ცხოვრება, არის ამერიკა ოცნების ქვეყანა? რამდენი წელია, რაც წახვედი? - დაახლოებით, 5 წელია, რაც ამერიკაში ვცხოვრობ, აქ მე და ჩემი ძმა ჩამოვედით და ამ ხნის განმავლობაში ჯერ მხოლოდ ერთხელ მოვახერხე საქართველოში ჩამოსვლა. წლების წინ ჩემი საქმისთვის წავედი ლოს ანჯელესში, გამოცდილების შესაძენად და ბიზნესის გასაფართოებლად. მინდა ვაღიარო, რომ საკმაოდ რთულია ამ ქვეყანაში თავის დამკვიდრება და ჯერჯერობით ვერ ვიტყვი, რომ ეს ბოლომდე მოვახერხე. ბევრი შრომა, ლოდინი, მონდომება და მოთმინება სჭირდება აქ ფეხის მოკიდებას. უფრო შესაძლებლობების ქვეყანას დავუძახებდი აქაურობას. - გახსოვს შენი პირველი შეხვედრა ამერიკასთან, განცდები და ემოციები? - ისეთი დაღლილი ვიყავი ლამის 30-საათიანი მგზავრობით, რომ პირველი რამდენიმე დღე ვერაფერს მივხვდი. მერე, ცოტა რომ გავიარ-გამოვიარეთ, დავათვალიერეთ ყველაფერი, უკვე მოვიდა ემოციები. საინტერესო გამოცდილება იყო ნამდვილად, დღემდე საინტერესოა. - გადავიდეთ შენს საქმიანობაზე, მოგვიყევი, რას საქმიანობ და როგორ აღმოჩნდი ამ სფეროში? - ნატურალური ქვების გამოყენებით სამკაულებს ვამზადებ, ბავშვობიდან მიყვარდა სამკაულების კეთება, მერე, თინეიჯერობაში, ქვებმა გამიტაცა და დავიწყე მათზე წერა, ბლოგი შევქმენი, როდესაც რაიმე საინტერესოს და ახალს გავიგებდი, ვწერდი. მკითხველი მალე გამოჩნდა და ნატურალურ ქვებზეც გაიზარდა მოთხოვნა. რაღაც პერიოდის შემდეგ ქვების იმპორტი დავიწყე და მალევე სამკაულზე მუშაობასაც მოვკიდე ხელი. დღეს უკვე წელიწადში 2 კოლექციას ვაკეთებ, თუ მოვახერხე და მოვასწარი - სამსაც. - რა განცდაა, აკეთო ის საქმე, რომელიც გიყვარს და გაბედნიერებს? - საათები ისე გადის, ვერ ვხვდები ხოლმე, ხშირად ერთ ნივთს 7-8 ჯერ ვშლი და ვაწყობ, რომ ზუსტად ის მივიღო, რაც წარმომიდგენია. თავისთავად სასიამოვნო და დამაკმაყოფილებელი პროცესია, როდესაც დასრულებულ ნივთს ვხედავ. - ვიდეო, რამაც დიდი გამოხმაურება მოიპოვა, "ვიგოურის" ჟურნალს ეხება. როგორ მოხვდი მის გარეკანზე? - ფოტოსესია მოვაწყვე აქაურ ფოტოგრაფთან, პირველი კოლექციის გადასაღებად, ჟურნალის შესახებ არაფერი ვიცოდი, ფოტოსესიიდან 1 თვეში მომწერა ჩემმა ფოტოგრაფმა და მითხრა, რომ ჩემი ერთ-ერთი ფოტო აარჩიეს მარტის თვის გარეკნად. მოულოდნელი და შოკისმომგვრელი მომენტი იყო და ასე გამოვჩნდი ჟურნალის გარეკანზე ჩემი სამკაულებით. - "ტიკტოკზე" შენი საქმიანობით 70 000-ზე მეტი გამომწერი დააგროვე, ძირითადად, რა თემაზე ესაუბრები ხალხს "ტიკტოკის" დახმარებით ? - "ტიკტოკზეც" და "ფეისბუქზეც" ყველაფერზე ვსაუბრობ - ჩემს საქმეს ხშირად განვიხილავ, ყოველდღიურობას, ჯანსაღ რეცეპტებს, ისტორიულ ფაქტებს, მოკლედ, რაც ჩემთვის საინტერესოა და ვიცი, რომ მაყურებელსაც მოეწონება. პირველი პოსტი "ტიკტოკზე" 2021 წლის ოქტომბერში დავდე. იმის მერე არ გავჩერებულვარ და ნებისმიერი შეფასება კლიენტებისგან მნიშვნელოვანია ჩემთვის, მაძლევს იმის საშუალებას, რომ გავითვალისწინო, თუ რამე შესაცვლელი ან გასაუმჯობესებელია. ალბათ, ამ საქმიანობაში ყველაზე დიდი მიღწევა ჩემი ონლაინენციკლოპედიაა. ძალიან დიდი დრო და შრომა დამჭირდა მის დასაწერად. რომ დავიწყე მუშაობა, არ მეგონა თუ დასრულებას მოვახერხებდი. - ცოტა მეტი მოგვიყევი ონლაინენციკლოპედიაზე... - ეს პირველი ქართულენოვანი ენციკლოპედიაა კრისტალების, ნატურალური ქვებისა და მინერალების შესახებ, რომელიც უფასოდ დევს ინტერნეტში, ჩემს საიტზე kelistones.ge-ზე და ნებისმიერ ადამიანს შეუძლია ნახვა და წაკითხვა. თავიდან, როდესაც გამოვაქვეყნე, 67 ქვა იყო სრულად განხილული, ახლა უკვე 120-ზე მეტია. ყოველწლიურად ენციკლოპედიას 500.000 მკითხველი ჰყავს, რაც ჩემთვის წარმოუდგენელი რიცხვია. - საქართველოში დაბრუნებას თუ გეგმავ და რა გენატრება ყველაზე მეტად სამშობლოში? - დიდი სურვილი მაქვს, საქართველოში დავბრუნდე. მეგობრები, მშობლები, ოჯახი, სიმშვიდე და სილაღე მენატრება. - რა არის ყველაზე რთული ემიგრანტობაში? - ყველაფერი რთულია, როცა ახალი ხარ ქვეყანაში და არავის იცნობ. გარემო უცხოა, სისტემაც უცნობია... სულ ელემენტარული, სად უნდა იშოპინგო, ისიც კი არ იცი ადამიანმა, თუმცა დაძლევადია ყველაფერი. - რა არის შენთვის ახლა უდიდესი ოცნება ან მიზანი, რომლისთვისაც შრომობ? - მიზანი მაქვს, რომ ჩემი ბრენდი გაიზარდოს და უფრო მეტმა ადამიანმა იცოდეს მის შესახებ. სტიმულს ოჯახი და საყვარელი ადამიანები მაძლევენ, არ ვჩერდები და თუ მოვახერხე ამ სურვილის ასრულება, ძალიან გამიხარდება, მაშინ ვიტყვი, რომ ოცნებაც ავისრულე. (სპეციალურად საიტისთვის)