უკრაინელების უნიკალური ოპერაცია ყირიმში - რა ინფორმაციას ავრცელებს უკრაინის დაზვერვა
უკრაინის თავდაცვის ძალებმა ყირიმის ჩრდილო-დასავლეთ სანაპიროსთან ნავთობისა და გაზის საბურღ პლატფორმებზე კონტროლი აღადგინეს, - ინფორმაციას უკრაინული მედია ქვეყნის თავდაცვის სამინისტროს დაზვერვის მთავარი სამმართველოზე დაყრდნობით ავრცელებს.
"უკრაინის თავდაცვის სამინისტროს მთავარი სადაზვერვო სამმართველოს ნაწილებმა „ბოიკოს კოშკებზე“ კონტროლის დამყარების უნიკალური ოპერაცია ჩაატარეს", - აცხადებენ უწყებაში.
მათივე ინფორმაციით, „ბოიკოს კოშკებს" რუსები ვერტმფრენების დასასმელად და სარადარო აღჭურვილობის განსათავსებლად იყენებდნენ.
„ოპერაციის ერთ-ერთი ეტაპის დროს მოხდა ბრძოლა გემებზე მყოფ უკრაინულ სპეცრაზმსა და რუსულ "სუ-30"-ის მოიერიშე თვითმფრინავს შორის. ბრძოლის შედეგად რუსული თვითმფრინავი იძულებული გახდა უკან დაეხია“, - აცხადებენ უკრაინის დაზვერვის მთავარ სამმართველოში.
პლატფორმები, რომლებიც ცნობილია როგორც "ბოიკოს კოშკები", რუსეთის მიერ მას შემდეგ კონტროლდება, რაც მოსკოვმა 2014 წელს ყირიმის ნახევარკუნძულის ანექსია განახორციელა.
"ინტერპრესნიუსი"