„სალომე კომპრომისზე არ წავა იმისთვის, რომ „ოცნებისგან“ ღიმილი მიიღოს“
"საქართველო ორ ფრენას შორის", - ასე უწოდებს საქართველოში დღეს არსებულ ვითარებას პრეზიდენტ სალომე ზურაბიშვილის ძმა ოთარ ზურაბიშვილი და დასძენს: "პრემიერის ოჯახური მოგზაურობა აშშ-ში დიდ უხერხულობას იწვევს, განსაკუთრებით მაშინ, როცა ის თავად უკრძალავს პრეზიდენტს საზღვარგარეთ მოგზაურობას". მისი თქმით, ხელისუფლება საკუთარ მოსახლეობასთან "კონტრშეტევაზეა" გადასული, ამ დროს კი მეხუთე პრეზიდენტი საქართველოს ევროპული მომავლისთვის მნიშვნელოვან ვიზიტებზე პირადი სახსრებით დადის. უფრო ვრცლად პრეზიდენტი დის პოლიტიკურ მიზნებსა და ამოცანებზე ოთარ ზურაბიშვილი გვესაუბრება:
- ამერიკაში პრემიერ ღარიბაშვილის ოჯახურმა მოგზაურობამ საზოგადოების მღელვარება ნამდვილად გამოიწვია. მრჩება განცდა, რომ საქართველოს მთავრობამ თავისი რუპორების მობილიზება მოახდინა და პრემიერის დასაცავად შეტევაზე გადასვლა სცადა. აბა, სხვა რა შეიძლება ყოფილიყო თუ არა ხელისუფლების "კონტრშეტევა", როცა მოსახლეობის ყურადღების გადასატანად სააკაშვილს პრემიერისთვის ხელსაყრელ დროს ახალი ბრალი წაუყენეს, რომელიც ზუსტად სახელმწიფო ბიუჯეტიდან დაფინანსებულ მგზავრობას ეხება. ერთ მხარესაა თვითმფრინავით პრემიერისა და მისი ოჯახის მოგზაურობა, პირადი ინტერესებისთვის სახელმწიფო ხარჯების გამოყენება, მეორე მხარეს კი პრეზიდენტის ვიზიტები, რომლებიც საქართველოს სახელმწიფოებრივი ინტერესებით იყო ნაკარნახევი და პირადი სახსრებითაა დაფინანსებული. ნათელია, ვინ ზრუნავს საკუთარ ინტერესებზე და ვინ იცავს საქართველოს.
- როგორ ფიქრობთ, სალომე ზურაბიშვილმა დაარღვია კონსტიტუცია?
- საქართველოს ევროატლანტიკური სტრუქტურებისკენ სვლა კონსტიტუციაშია ჩაწერილი. შესაბამისად, პრეზიდენტმა კონსტიტუცია კი არ დაარღვია, დაიცვა. რა არის მისი იმპიჩმენტის მიზეზი?! - პრეზიდენტის ევროპისკენ მისწრაფება. დღეს ქართველი ხალხის დიდი ნაწილი ელოდება კანდიდატის სტატუსის მიღებას. გაუგებარია, მაშინ, როდესაც საქართველო ბეწვის ხიდზე გადის, როგორ შეიძლება ხელისუფლება ასეთ სარისკო ნაბიჯებს დგამდეს?!
- ვიდრე პრეზიდენტი ევროპელ ლიდერებს შეხვდებოდა, თქვენ თუ გესაუბრათ?
- არ მინდა ჩვენი კერძო საუბრების გასაჯაროება...
- მაშინ ის გვითხარით, რას ელოდა პრემიერის უარის უგულებელყოფის შედეგად "ქართული ოცნებისგან"?
- სალომე ძალზე პრინციპულია, მისთვის ყველაფერზე მაღლა საქართველოს მომავალი დგას. ის კომპრომისზე არ წავა იმის გამო, რომ "ოცნების" ლიდერებისგან ღიმილი მიიღოს.
- რას აპირებს იმპიჩმენტის შემთხვევაში?
- ჯერჯერობით საკითხი ასე არ დგას, სალომესაც ჯერ კიდევ გადასადგმელი აქვს მთავარი ნაბიჯები. თუ ხელისუფლებამ მართლა დაიწყო პრეზიდენტის იმპიჩმენტი, სალომე იტყვის, რას აპირებს.
- მხარს უჭერთ მის გადაწყვეტილებებს?
- დიახ, თუმცა, იყო დრო, როდესაც ბევრ რამეზე ვერ ვთანხმდებოდით...
- როგორ ფიქრობთ, უნდა შეიწყალოს მესამე პრეზიდენტი მეხუთე პრეზიდენტმა?
- ამის თაობაზე პრეზიდენტმა გააკეთა განცხადება... ჩემი და სალომეს უთანხმოების მიზეზები უფრო შორეულ წარსულშია და ის უკავშირდება ზვიად გამსახურდიას ხელისუფლებას. დიახ, გვქონდა განსხვავებული პოლიტიკური აზრები და ზოგიერთ საკითხზე ახლაც გვაქვს, მაგრამ ჩვენ გავიზარდეთ იმ ოჯახში, სადაც პრიორიტეტი იყო საქართველოს სუვერენიტეტი და დამოუკიდებლობა. ერთი რამ ორივესთვის ცხადია: საქართველოს ისტორიული მტერი იყო და არის რუსეთი. მე ზუსტად ვიცი, რომ სალომე რუსეთის სასარგებლოდ ერთ ნაბიჯსაც არ გადადგამს.
- ზოგიერთი ვერსიით, ის ბიძინა ივანიშვილის სასარგებლოდ თამაშობს...
- მე ვიცნობ ჩემს დას, ის ასეთი წესებით არ თამაშობს, საკუთარი იდეალებისა და პრინციპების ერთგულია.
- ქართველ საზოგადოებაში ხშირად განიხილებოდა თქვენი ბიძაშვილის ელენ კარერ დანკოსის, იმავე ელენ ზურაბიშვილის დამოკიდებულება რუსეთის მიმართ...
- არ მინდა ახლა მასზე აზრის გამოთქმა, მით უფრო, დიდი ხანი არ არის, რაც გარდაიცვალა. ელენს ჰყავდა რუსი დედა, მშობლების განქორწინების შემდეგ მასთან იზრდებოდა და როგორც კულტურული, ასევე ენობრივი თვალსაზრისით მის გავლენაში იყო... მე და საფრანგეთის ქართული სათვისტომო სრულად ვიზიარებთ პრეზიდენტ ზურაბიშვილის პოზიციას და მივიჩნევთ, რომ საქართველო უნდა გახდეს ევროკავშირის წევრი, შევიდეს ნატოში და შორს დადგეს რუსეთისგან.
- ჩვენს ქვეყანაში დღევანდელ არსებულ პოლიტიკურ ვითარებას როგორ აფასებთ?
- ძალიან სახიფათოდ. გავიგეთ, რომ კაცი, რომელიც რამდენიმე ხანს საპასუხისმგებლო თანამდებობაზე იყო და შემდეგაც დიდი გავლენით სარგებლობდა, რუსეთის ჯაშუში ყოფილა. ვშიშობ, საქართველოში სხვაც ბევრი იქნება ასეთი ტიპი.
- თქვენ გაქვთ კითხვები ან ეჭვები საქართველოს საგარეო კურსზე?
- ორი მთავარი საკითხია, რაც საფრანგეთში მცხოვრებ ქართველებს ეჭვებს გვიჩენს: პირველია უკრაინის მიმართ "ქართული ოცნების" კრიტიკული დამოკიდებულება, მეორე კი ევროპის მიმართ ბუნდოვანი პოზიცია. შთაბეჭდილება გვრჩება, რომ საქართველოს ევროინტეგრაციისთვის გადადგმული ხელისუფლების ყველა ნაბიჯი ხალხის ზეწოლის შედეგია, თითქოს ამას თავისი ნებით არ აკეთებს.
- თქვენ კარგად იცით, როგორია ფრანგი პოლიტიკოსების განწყობა საქართველოს მიმართ... მოგვცემენ კანდიდატის სტატუსს?
- როდესაც მსოფლიოში არსებულ ვითარებას ვუყურებ, ვაანალიზებ ევროპის პოზიციას, ოპტიმისტურად განვეწყობი ხოლმე, მაგრამ მერე მოვისმენ საქართველოს ხელისუფლების განცხადებებს და ოპტიმიზმიც ქრება. თუმცა ბოლო დროს საინტერესო ნიშნები გამოჩნდა, მაგალითად, როდესაც სალომე საფრანგეთში ჩამოვიდა, ძალიან დაკავებული პრეზიდენტი მაკრონი (ახლა საფრანგეთში რთული მდგომარეობაა) მაინც შეხვდა. ეს იმის ნიშანია, რომ საფრანგეთის მხარდაჭერა ნაღდია. ადრე საფრანგეთი და გერმანია არ იყვნენ საქართველოს ევროკავშირში გაწევრების მომხრენი, ახლა მათი აზრი შეცვლილია და ძალიან მნიშვნელოვანია, ეს გამოიყენოს საქართველომ. დარწმუნებული ვარ, თუ "ოცნება" ნამდვილად მოინდომებს, საქართველო კანდიდატის სტატუსს მიიღებს.
ხათუნა ბახტურიძე