სამოქალაქო ომის რეალური საფრთხე თუ შეტევა მოქალაქეების ფსიქიკაზე?! - რას ფიქრობენ ექსპერტები სუს-ის სკანდალურ განცხადებაზე
დღია მთავარი სკანდალი სუს-ის განცხადებაა. შეგახსენებთ, რომ სახელმწიფო უსაფრთხოების სამსახურმა განაცხადა, რომ საქართველოს ტერიტორიასა და მის ფარგლებს გარეთ მოქმედი პირთა გარკვეული ჯგუფი, მიმდინარე წლის ოქტომბერ-დეკემბერში საქართველოში გეგმავს დესტაბილიზაციისა და სამოქალაქო არეულობის მოწყობას, რომლის საბოლოო მიზანია ხელისუფლების ძალადობრივი გზით შეცვლა.
სუს-ის ცნობით, აღნიშნული გეგმის ერთ-ერთ ავტორად გვევლინება საქართველოს ყოფილი შინაგან საქმეთა მინისტრის, ვანო მერაბიშვილის მოადგილე და ამჟამად უკრაინის სამხედრო დაზვერვის ხელმძღვანელის მოადგილე გიორგი ლორთქიფანიძე და მის დაქვემდებარებაში მყოფი ქართული წარმოშობის მქონე პირები, მათ შორის მესამე პრეზიდენტის დაცვის ყოფილი წევრი მიხეილ ბატურინი და ასევე სააკაშვილის ახლო გარემოცვის წევრი, უკრაინაში მოქმედი „ქართული ლეგიონის“ მეთაური მამუკა მამულაშვილი.
ამასთან სუს-ს მტკიცებით, დესტრუქციული პროცესების დაწყების თარიღებად შერჩეულია ოქტომბერ-დეკემბრის პერიოდი, როდესაც უნდა გამოქვეყნდეს ევროკომისიის შუალედური და ევროკავშირის საბოლოო დასკვნა.
რაც შეეხება სცენარს, სუს-ის ინფორმაციით, განიხილება მოვლენათა განვითარების რამდენიმე სცენარი, რომელიც მოიცავს ე.წ. „კარვების ქალაქის“ მოწყობას, ცენტრალურ გამზირებსა და სტრატეგიულ ობიექტებთან ბარიკადების აღმართვას, სამთავრობო შენობების დაკავება-ბარიკადირებას.
კერძოდ, სუს-ი აცხადებს, რომ დადასტურებულად ცნობილია, რომ ორგანიზატორების მიერ განიხილება საქართველოში 2014 წელს უკრაინაში გამართული ,,ევრომაიდნის“ მსგავსი სცენარის განხორციელება.
სუს-ის განცხადებასთან დაკავშირებით, პოლიტოლოგი ვახტანგ ძაბირაძე ამბობს, რომ დაიწყო საზოგადოების წინასწარ დამუშავება იმაზე, რომ რაც შეიძლება ნაკლები რეაქცია მოჰყვეს პროტესტს, "რომელიც აუცილებლად იქნება, თუ არ მოგვანიჭეს სტატუსი".
"იმედი იმისა, რომ ასეთი განცხადებებით ვინმე რამის პრევენციას მოახდენს, ან მოსახლეობას დააშინებს, ყალბია. ამან 30 წლის განმავლობაში არც ერთხელ არ იმუშავა", - აცხადებს ძაბირაძე.
მისივე თქმით, თუ მართლაც არსებობს რაიმე საფრთხე, სახელმწიფო უსაფრთხოების სამსახური სწორედ იმისთვისაა, მისი ნეიტრალიზება მოახდინოს.
„პირველ რიგში, საზოგადოების დამუშავება ხდება იმის საწინააღმდეგოდ, რომ იმ შემთხვევაში თუ ევროკავშირის კანდიდატი ქვეყნის სტატუსი არ მოგვცეს და გამოსვლები დაიწყო, რასაც ალბათ, ვარაუდობენ და რისიც გარკვეულწილად ეშინიათ, თქვან, რომ ჩვენ ამას ვაცხადებდით, ვაკეთებდით და ა.შ. ეს არის ძირითადი და მნიშვნელოვანი ამ თემაში. არა მარტო დღეს, არამედ მუდმივად მიდის იმაზე საუბარი, რომ ხელისუფლების ძალისმიერი შეცვლა მზადდება და ა.შ. ანუ, წინასწარ მიდის საზოგადოების დამუშავება. აქ, ქვეტექსტში ლაპარაკი იმაზე კი არ უნდა იყოს, რომ რადგან ეს არის მოსალოდნელი, ამიტომ პროტესტები ავკრძალოთ ქვეყანაში, არამედ იმაზე, რომ რომ სუს-მა უკეთესად უნდა იმუშაოს და თუ რაიმე საფრთხე არსებობს, მოახდინოს მისი ნეიტრალიზება,“ - განაცხადა ძაბირაძემ.
პოლიტოლოგის თქმით, როდესაც ხელისუფლებას საფრთხე ემუქრება და გავლენას რეალურად კარგავს, ყოველთვის ხელისუფლების ძალისმიერი მეთოდით შეცვლის მცდელობაზე იწყება საუბარი.
„ივანიშვილს და მის თანამდგომთ შეუძლიათ 2011 და 2012 წელი გაიხსენონ. მაშინაც იგივეზე იყო ლაპარაკი მაშინდელი ხელისუფლების მხრიდან. 2003 წელსაც იგივეზე იყო. ყოველთვის ამაზეა საუბარი, როდესაც ხელისუფლებას საფრთხე ემუქრება და რეალურად კარგავს გავლენას. იმედი იმისა, რომ ასეთი განცხადებებით ვინმე რამის პრევენციას მოახდენს, ან მოსახლეობას დააშინებს, ყალბია, ცუდი იმედია. ამან 30 წლის განმავლობაში არც ერთხელ არ იმუშავა,“ - აღნიშნა ძაბირაძემ.
პოლიტოლოგ რამაზ საყვარელიძის თქმით კი, მოულოდნელი არ არის შინაარსი, რომ „ევრომაიდნის“ მსგავსი მზადდება - თუ სუს-მა თავის თავზე აიღო მსგავსი ბრალდების საჯაროდ გაჟღერება, მან, ალბათ, საჯაროდვე უნდა წარმოადგინოს საბუთები.
როგორც საყვარელიძემ აღნიშნა, არსებობს უდანაშაულობის პრეზუმფცია და ამ პრეზუმფციის დაცვა ყველამ უნდა შეძლოს, მათ შორის უსაფრთხოების სამსახურმაც.
"საყურადღებოა, რომ ადრე პოლიტიკოსები აკეთებდნენ მსგავს განცხადებას, საზოგადოებას კი ჰქონდა რეაქცია, რომ ეს პოლიტიკოსების მსუბუქი ენის ბრალია, მათ პასუხისმგებლობას არ ამძიმებს, სუს-ის განცხადება კი უფრო სერიოზული მოვლენაა.
არ ვიცი, აქვს თუ არა ამ უწყებას მსგავსი ბრალდების საბუთები, იმიტომ, რომ არსებობს უდანაშაულობის პრეზუმფცია და ამ პრეზუმფციის დაცვა ყველამ უნდა შეძლოს, მათ შორის უსაფრთხოების სამსახურმაც.
მოულოდნელი არ არის შინაარსი, რომ „ევრომაიდნის“ მსგავსი მზადდება, არც ზოგადი შემადგენლობა, რომ საქართველოშიც არიან ამით დაინტერესებული ძალები და ასევე საქართველოს გარეთ.
აქაც პრეზუმფციის საკითხი დგება, არ შეიძლება ხელის დადება ვინმეზე, გინდ ოპოზიციაზე და გინდ საგარეო ძალებზე, შეიძლება საპასუხო რეაქცია გამოიწვიოს, მსგავსი ბრალდების დამტკიცება მოითხოვონ.
თუ სუს-მა თავის თავზე აიღეო მსგავსი ბრალდების საჯაროდ გაჟღერება, მან, ალბათ, საჯაროდვე უნდა წარმოადგინოს საბუთები, თუ არადა საჯარო არ უნდა იყოს, საქართველოს იურისდიქციის ქვეშ ვინც არის, იმ პირებს უნდა წარედგინოს ბრალდება, რომ ქვეყნის სტაბილურობას უქმნიან საფრთხეს ან სამართალდამცავ სტრუქტურებში უნდა შევიდეს საქმე, ან თუ გადაწყვიტეს საქმის საჯაროდ გაგრძელება, საჯაროდ უნდა წარადგინონ საბუთები“,- აღნიშნა საყვარელიძემ.