"შეხვალ, პრეზიდენტის პიჯაკს ჩაუთქვამ სურვილს და ბოტასი კი მისაღების გამხსნელის ხმით ამოგძახებს: "გადაგზავნილია" - რას წერს ლაშა ბუღაძე "სააკაშვილის მისაღებზე"
მწერალი ლაშა ბუღაძე სოციალურ ქსელში პოსტს აქვეყნებს და აღნიშნავს, რომ "მიხეილ სააკაშვილის მისაღების" ფოტოების ნახვისას თავიდან იფიქრა, რომ ეს მარინა აბრამოვიჩის ინსტალაცია იყო:
"ახლა შემომხვდა "მიხეილ სააკაშვილის მისაღების" ფოტოები და თავიდან ვიფიქრე, რომ მარინა აბრამოვიჩის ინსტალაციაა. კიდია პიჯაკები, იქვე დევს ბოტასებიც და წინ კი ცარიელი მაგიდა დგას... კართან წარწერით: "საქართველოს პრეზიდენტი". ოღონდ თავად სუბიექტი იქ არ მდებარეობს. ჰოდა, რა არის ეს? ეჟენ იონესკოს პიესაა აბსურდის ჟანრიდან თუ სპირიტისტული სეანსის სივრცე? შეხვალ, პრეზიდენტის პიჯაკს ჩაუთქვამ სურვილს და ბოტასი კი მისაღების გამხსნელის ხმით ამოგძახებს: "გადაგზავნილია"... აბა, ოთახში თავად არ ზის და...
უკაცრავად, მაგრამ რას ამასხარავებთ ამ კაცს, რომელიც ობიექტურად მძიმე ფსიქოლოგიურ და ფიზიკურ მდგომარეობაშია?! შეხედეთ მის ჩართვას სასამართლოზე და დარწმუნდებით...
თუ თავს თვითონვე იმასხარავებს?! ალბათ, არც უმაგისობაა...
ცოტა მეტი სერიოზულობა რომ მართებდეს ყველას, უთუოდ კარგი იქნებოდა. მაგრამ უკვე გვიანია... "მრევლი" პიჯაკებთან კომუნიკაციითაც კმაყოფილია" - წერს ლაშა ბუღაძე.