ნამდვილი გურული ამბები უკვე კინოშიც - რას ამბობს ფილმის რეჟისორი და სცენარისტი?
23 ოქტომბერს, გურიაში რეჟისორი ლევან კოღუაშვილი სრულმეტრაჟიანი ფილმის, სახელად "გურია“ გადაღებას დაიწყებს. სცენარის ავტორები არიან ლევან კოღუაშვილი, გიორგი კეკელიძე და ბორის ფრუმინი. პროექტის მიზანია, შექმნას საბჭოთა კავშირის ნგრევისა და ახალი საქართველოს დაბადების ეპოქალური სურათი, რომელიც ქვეყნის ერთი კუთხის, გურიის პრიზმიდან იქნება წარმოდგენილი.
ეპიზოდების მცირე ნაწილი გიორგი კეკელიძის "გურულ დღიურებს“ ეყრდნობა, ხოლო ეპიზოდების უმეტესობა და საკუთრივ სცენარი ხუთწლიანი მუშაობის შედეგია.
ფილმი ნებისმიერი ასაკის მაყურებლისთვის იქნება განკუთვნილი. პროექტის მიზანია, როგორც საერთაშორისო ფესტივალზე წარმატება, ასევე სახალხო სიყვარულისა და აღიარების მოპოვება. სიუჟეტის ორიგინალურობას გურიისთვის დამახასიათებელი დიალოგები და გარემო განაპირობებს. სურათი საოცარი ადამიანური ისტორიების დრამატული სიუჟეტური განვითარებაა, გაჭირვების ბეწვის ხიდზე მოსიარულე ჰუმანიზმის შენარჩუნება, ერთგვარი გადარჩენის ისტორია, რომელიც დიდ სიყვარულსა და თანადგომას გულისხმობს, - გვეუბნება გიორგი კეკელიძე.
მისივე თქმით, "გურია“ ჩაფიქრებულია, როგორც მაღალმხატვრული, მარადიული ღირებულებების მქონე კინემატოგრაფიული ნაწარმოები და რომ ამგვარი ფილმები ჩვენი კინო ისტორიიდან არის გიორგი დანელიას "არ დაიდარდო,“ "მიმინო“ და ელდარ შენგელაიას "ცისფერი მთები“.
მხატვრული ფილმი "გურია“ მნიშვნელოვანი საერთაშორისო კო-პროდუქციაა. ამ ეტაპისთვის პროექტში მონაწილეობენ შემდეგი ქვეყნები - საქართველო, შვეიცარია, ლუქსემბურგი, ბულგარეთი, თურქეთი და ნორვეგია. საქართველო - ეროვნული კინოცენტრი, საზოგადოებრივი მაუწყებელი, კინოკომპანია "კინო იბერიკა“, შვეიცარია - შვეიცარიის კინოფილმი, ციურიხის რეგიონული კინოფონდი, სადისტრიბუციო კომპანია "სინელუქსი“, ლუქსემბურგი - ლუქსემბურგის კინოფონდი, კომპანია "ტარანტულა“, ბულგარეთი - ბულგარეთის კინოს ფონდი, კომპანია "არტფესტი“, ნორვეგია - სორ-ფონდი, ევრიმაჟი - ევროკავშირის კინოფონდი.
"გურია“ შეარჩიეს კანის კინოფესტივალის ინდუსტრიულ სექციაში "ატელიე“ და შესაბამისად, მსოფლიოს პრესტიჟული კინოფესტივალის რადარებზე მოხვდა. ფილმის გადაღება 2023 წლის 23 ოქტომბრიდან 5 დეკემბრამდეა დაგეგმილი, ხოლო პრემიერა - 2024 წლის მაის-ივნისშია გათვალისწინებული.
ლევან კოღუაშვილი, რეჟისორი:
- ბოლო ინფორმაცია ისაა, რომ ნორვეგიულ ფონდში გავიმარჯვეთ. ვემზადებით ფილმის გადასაღებად. მოქმედება 90-იან წლებში ხდება. მასშტაბური ფილმია, სადაც სიყვარულის და მეგობრობის ისტორია იქნება ნაჩვენები, რომელიც იმ პერიოდის გურულ ყოფას გადმოსცემს. სამი სცენარისტი ვართ. პროექტის ჯგუფი ნაწილობრივ უცხოურია. მონაწილეობენ შვეიცარიიდან, ბულგარეთიდან, ლუქსემბურგიდან, თურქეთიდან.
საქართველოს პროვინციაში გვინდოდა გადაღება. გურია თავისი თავისებურებით ყოველთვის მომწონდა და მიზიდავდა. კუთხე გამოირჩევა ასევე ნიჭიერებით, იუმორით, ამავე დროს იქ ბევრი პრობლემაც იყო. ეს ყველაფერი კი იძლევა ფილმისთვის მასალას. ამრიგად, სურათი ამ ყველაფრის ნაზავი იქნება.
გადაღებები გურიაში გვექნება, სადაც მუშაობა 36 დღეში უნდა დავასრულოთ. ფილმი სავარაუდოდ, მაისში მზად უნდა იყოს. როდესაც ვამბობ, მასშტაბური პროექტია-მეთქი, ამაში ისიც იგულისხმება, რომ 100 როლია. ყველამ ერთად კი 90-იანების ეპოქა უნდა შევქმნათ თავისი რეკვიზიტით, მანქანებით, ჩაცმულობით. რთული, მაგრამ საინტერესო პროექტია. მთავარ როლებში არიან - კახა ჭოლაძე, ვამეხ ჯანგიძე, ნათია ნიკოლაშვილი, ზაზა მარალაშვილი... იხილეთ სრულად