"დავინახე და ვერაფერი ვთქვი. უბრალოდ, ყბა ჩამომივარდა... ვნებიანად შემიყვარდა" - ნიკოლ კიდმანის სასიყვარულო ცხოვრება
56 წლის ამერიკელ-ავსტრალიელი მსახიობი ნიკოლ კიდმანი, ჰოლივუდის საუკეთესო მსახიობთა სიას განუმეორებელი როლების განსახიერების შემდეგ შეუერთდა. დრამის სახასიათო მსახიობი ჰოლივუდში ჯერ კიდევ ღრმა ბავშვობაში გამოჩნდა, თავისი ნიჭით ყველა გააოცა და როლებს საუკეთესო ფილმებსა თუ სერიალებში, ჯილდოებს საუკეთესო მსახიობი ქალისთვისა და საუკეთესო შესრულებისთვის დღემდე არ თმობს. პოპულარობას მცირე სკანდალები ყოველთვის ახლავს თან, ნიკოლის ცხოვრებაში ჯერ ტომ კრუზი არსებობდა, შემდეგ მცირე ხნით გამოჩნდა ლენი კრავიცი, რამდენიმე წელში კი კიდმანმა ბედი მუსიკოს კიტ ურბანს დაუკავშირა, რომელიც დღემდე მისი ცხოვრების მეგზურია. წლების წინ წერდნენ, რომ ნიკოლი და კიტი დაშორებას აპირებდნენ, იმასაც წერდნენ, რომ ტომ კრუზისა და ნიკოლის სიყვარული ჯერ არ დასრულებულა, მაგრამ ამერიკული პრესა ცდება, ნიკოლის სასიყვარულო ისტორიები არც ისე მოკლე იყო, თუმცა მან ცხოვრების მეგზური წლების წინ ნამდვილად იპოვა.
ოსკაროსანი მსახიობები, ნიკოლ კიდმანი და ტომ კრუზი ერთმანეთს ადრეულ 1990-იან წლებში შეხვდნენ, სად, თუ არა გადასაღებ მოედანზე, სადაც კრუზი ფილმში „Days of thunder“ მრბოლელის როლს ასრულებდა.
„მახსოვს, ავღელდი, როდესაც ტომი დავინახე, ის გადასაღებ მოედანზე "პორშეს" ატარებდა. ავტომობილი გააჩერა, კარგი გააღო და გადმოვიდა. დავინახე და ვერაფერი ვთქვი. უბრალოდ ყბა ჩამომივარდა“ - თქვა კიდმანმა 2016 წელს ერთ-ერთ შოუში.
როგორც ჩანს, მომხიბვლელი მამაკაცით ნიკოლი მაშინვე დაინტერესდა, კრუზსაც მალევე შეუყვარდა მსახიობი.
„სიგიჟემდე, ვნებიანად შემიყვარდა ტომი და როგორც ხდება ხოლმე, ადამიანები ჩვენს გეგმებს სიყვარულისთვის ვცვლით. მეც შევცვალე ჩემი გეგმები, ბევრ რამეზე ვთქვი უარი, თუმცა ჩემი ნებით“, - გაიხსენა ნიკოლმა ჟურნალთან - "ვენითი ფეარ".
გაცნობიდან რამდენიმე თვეში, ტაბლოიდებმა გაამჟღავნეს, რომ ტომ კრუზი პარტნიორს, მიმი როჯერს დაშორდა, 1 წელში კი ამბავიც გავრცელდა, რომ ტომ კრუზი და ნიკოლ კიდმანი დაინიშნნენ.
„ახალგაზრდა ვიყავი, როდესაც დაქორწინება გადავწყვიტეთ, ახლა უკან რომ ვიყურები, ჩემს თავს ვეკითხები, რა? დაქორწინება? ასე ადრე?“, - ამბობს კიდმანი 2016 წელს ჩაწერილ ინტერვიუში.
დანიშვნას მალევე მოჰყვა ქორწილიც. 1992 წელს ნიკოლმა და ტომმა პირველი გოგონა - იზაბელა იშვილეს.
„იზაბელა დაბადებიდან მალევე ვიშვილეთ, მეშინოდა მისი მოვლის. საფენსაც ვერ ვუცვლიდი, არ ვიცოდი, რა ჯანდაბა უნდა გამეკეთებინა“, - გაიხსენა ნიკოლმა ერთ-ერთ ინტერვიუში.
1994 წელს კრუზმა საჯაროდ ისაუბრა ქორწინებაზე და პირველად მოუყვა საზოგადოებას, თუ როგორ ძლიერ უყვარდა ნიკოლი.
„ეს საოცარი კავშირია, როდესაც ხვდები, რომ შენი ადამიანი იპოვე. ის არის ქალი, რომელსაც ჩემი ბოლომდე ესმის. ჩვენ ერთად ახალი ცხოვრება დავიწყეთ“, - თქვა კრუზმა ჟურნალისტებთან საუბრისას.
1995 წელს წყვილმა მეორე შვილი აიყვანა, კრუზების ოჯახს კონორი შეემატა, რომელიც იზაბელას მსგავსად, დაბადებიდან მალევე იშვილეს. ქორწინება სტანდარტულად, ბედნიერად მიდიოდა. ჰოლივუდის ვარსკვლავები მუშაობდნენ ფილმებზე, ზრდიდნენ შვილებს და სიხარულით ხვდებოდნენ ახალ გამოწვევებს.
„მაშინ ვფიქრობდით, რომ ბედნიერი წყვილი ვიყავით, ბედნიერი დაქორწინებული წყვილი“, - ამბობს კიდმანი 2020 წელს "ნიუ იორკ თაიმსთან" ინტერვიუში.
1997-98 წლებში ნიკოლი და ტომი ფილმში „eyes wide shut“ ერთად მონაწილეობდნენ, ფსიქოლოგიური დრამის გადაღება 2 წელს გაგრძელდა. 1999 წელს ფილმი გამოვიდა, წყვილი ოსკარის დაჯილდოებაზე ერთად გამოჩნდა. 2001 წელს დაშორების შესახებ პირველი განცხადებაც გაჟღერდა. მიზეზი ბუნდოვანი იყო, ამბობდნენ, რომ მათ სხვადასხვა კარიერული მიზნები ჰქონდათ, ეს თანაცხოვრებას ართულებდა, ამიტომ, დაშორება საუკეთესო გამოსავალი იყო. დაშორდებოდნენ, თუმცა კვლავ მეგობრებად დარჩნენ და შვილების გაზრდა ერთად გააგრძელეს.
2007 წელს კიდმანმა ინტერვიუში გაამხილა რომ მას და კრუზს შვილის ყოლა არაერთხელ უცდიათ, თუმცა 23 წლის ასაკში მსახიობს საშვილოსნოს გარე ორსულობა ჰქონდა და მას მერე, მუცელი რამდენჯერმე მოეშალა. 2003 წელს ნიკოლი ლენი კრავიცზე დაინიშნა, ეს ურთიერთობა მალევე დასრულდა, რადგან 2005 წელს მსახიობმა თავისი ცხოვრების სიყვარული კიდევ ერთხელ იპოვა.
ნიკოლ კიდმანი და მუსიკოსი კიტ ურბანსი ერთმანეთს დაუგეგმავად, 2005 წლის 15 იანვარს შეხვდნენ, ორივე მარტოხელა იყო და ორივე ამერიკის გალა წვეულებაზე იყო მიწვეული. როგორც თვითონ ამბობენ, შეხვედრა ერთი ნახვით სიყვარულს ჰგავდა, ნიკოლ კიდმანი ელენ დეჯენერესის შოუში გამოტყდა, რომ კიტი შორიდან მოსწონდა, თუმცა ეგონა, რომ ურბანსი მასზე საერთოდ არ ფიქრობდა. 2006 წელს ნიკოლის 38-ე დაბადების დღეზე მსახიობი დარწმუნდა რომ მთელს ცხოვრებას ამ კაცთან ერთად გაატარებდა.
„ჩემს დაბადების დღეზე ყვავილებით მომაკითხა, ხელში გარდენიები ეჭირა, დავინახე და ვიფიქრე, ეს ის კაცია, რომელზეც დავქორწინდები. მჯეროდა, რომ ის იყო ჩემი ცხოვრების სიყვარული. შესაძლოა ასე იმიტომ ვიფიქრე, რომ მსახიობი ვარ და თან რომანტიკული, თუმცა ძლიერად მწამდა, რომ ყველაფერი გამოვიდოდა“, - თქვა ნიკოლმა ერთ-ერთ ინტერვიუში.
ყველაფერი გამოვიდა, 2006 წელს ნიკოლი და კიტი დაქორწინდნენ. ქორწილი ავსტრალიაში გაიმართა, სტუმრების სიაში სულ რამდენიმე ცნობილი ადამიანი მოხვდა, ქორწილმა ოჯახურ გარემოში ჩაიარა. 2008 წლის ივლისში შეყვარებულ წყვილს პირველი შვილი შეეძინა, სანდეი როუზ კიდმან ურბანი. ნიკოლისთვის მესამე, თუმცა კიტისთვის პირველი შვილი იყო. ორ წელში კიტსა და ნიკოლს ფეის მარგარეტ კიდმანიც გაუჩნდათ, უკვე მეორე შვილი მათი ქორწინებიდან.
„ჩვენი ოჯახი ნამდვილად დალოცვილია და უბრალოდ მადლობელი ვარ ამ საჩუქრისთვის, კიდევ ერთი შვილი გვეყოლა“, - თქვა ნიკოლმა ვოგის ინტერვიუში.
ქორწინებიდან დიდი ხნის შემდეგ, 2018 წელს კიტმა და ნიკოლმა ურთიერთობის საიდუმლოზე ისაუბრეს. მათი სიყვარული გაძლიერდა, გამყარდა და უფრო მეტად შეუყვარდათ ერთმანეთი, მაშინ როდესაც ერთმანეთის დროის დაფასება დაიწყეს. ასე გრძელდება დღემდე, რაც მათ სიყვარულს და ერთმანეთის მიმართ პატივისცემას კიდევ უფრო აძლიერებს.
„მე და კიტი ძალიან კარგად ვწყვეტთ, რა უნდა ვაკეთოთ, ყველაფერს ვინაწილებთ, ბალანსს ვინარჩუნებთ“ - აღნიშნა ნიკოლმა.
2019 წელს კიტმა ნიკოლს სიმღერაც მიუძღვნა, სადაც მეუღლისადმი სიყვარული და პატივისცემა საზოგადოებას კიდევ ერთხელ დაანახა.
„ვფიქრობდი, ეს გოგო ჩემით არასდროს დაინტერესდება-მეთქი, ვიღაცამ მისი ნომერი მომცა, ვერ ვბედავდი, რომ დამერეკა ვნერვიულობდი“, - ამბობს კიტი 2020 წელს მიცემულ ინტერვიუში.
2023 წელია, კიტი და ნიკოლი საზოგადოებისთვის თავიანთი სიყვარულის გაზიარებას არ წყვეტენ, ჩნდებიან ოსკარის წითელ ხალიჩაზე, დადიან ერთად კონცერტებზე და ეხმარებიან მძიმე დაავადებების მქონე ბავშვებს. ყველაფერს ერთად აკეთებენ, ზრდიან შვილებს, აქვთ სიყვარულით სავსე ოჯახი და დროს იმისთვისაც ინახავენ, რომ საყვარელი საქმე არ დათმონ, თავიანთი პროფესია არ დაკარგონ და ყველაფრით მუდამ ბედნიერები იყვნენ.
(სპეციალურად საიტისთვის)