"საჭიროა ვისაუბროთ და მოვძებნოთ ურთიერთგაგების, თანაცხოვრების გზები“ - რა თქვა სერგეი შამბამ ვახტანგ ყოლბაიასთან ონლაინ ეთერში - შეცვლილი რიტორიკა ოკუპირებული რეგიონიდან?
ოკუპირებული აფხაზეთის ე.წ. უშიშროების საბჭოს მდივანი, სერგეი შამბა ამბობს, რომ "ქართულ-აფხაზური კონფლიქტი შვილებსა და შვილიშვილებს არ უნდა დარჩეთ“.
მისი თქმით, აუცილებელია ეძებონ შესაძლებლობები მშვიდობიანად თანაცხოვრებისთვის. ამის შესახებ შამბამ აფხაზეთის მთავრობის ყოფილ თავმჯდომარესთან და ამჟამად აფხაზეთის ავტონომიური რესპუბლიკის უმაღლესი საბჭოს წევრთან, ვახტანგ ყოლბაიასთან ონლაინ საუბრისას განაცხადა. შამბამ და ყოლბაიამ პირდაპირ ეთერში უპასუხეს ჟურნალისტ ვანო ჩოკორიას კითხვებს.
"მე არაერთხელ მისაუბრია ამ თემაზე და აფხაზურ საზოგადოებაში ბევრს არ მოსწონს ჩემი პოზიცია, მაგრამ ყოველთვის ვამბობდი, რომ პრობლემის დროს, პირველ რიგში, საუბარია საჭირო. არ არსებობენ ასეთი ერები, მეზობლები. ახლობლები, რომლებიც ერთმანეთთან არ ჩხუბობენ, არ ომობენ. ამის მაგალითია მთელი ევროპა“, - განაცხადა შამბამ.მისივე თქმით, "აფხაზურ და ქართულ მხარეში ბევრი ადამიანი კვლავ აგრესიულადაა განწყობილი“.
"ვფიქრობ, დროთა განმავლობაში ეს შეიცვლება, მართალია, ომიდან დიდი დრო გავიდა, უკვე 30 წელი, შეიძლება როგორმე დავიწყოთ რაღაც მოძრაობები ურთიერთგაგებისკენ.
მე ყოველთვის მხარს ვუჭერდი სახალხო დიპლომატიას და როცა საგარეო საქმეთა მინისტრი ვიყავი, ჩვენი წარმომადგენლები ძალიან ხშირად ხვდებოდნენ ქართველ ოპონენტებს. ეს იყო ერთმანეთის პოზიციების გაგების შესაძლებლობა. მიმაჩნია, რომ კომუნიკაციისთვის სხვადასხვა არხები უნდა გამოვიყენოთ". (გააგრძელეთ კითხვა)