როგორც აღმოჩნდა, გზა ჟურნალისტობიდან პრინცესობამდე ძალიან მოკლე, მარტივი და უეცარი ყოფილა. დედოფალ ლეტიციას ამბავიც ასე დაიწყო. ერთ დღეს, სამსახურებრივი მოვალეობის შესრულების დროს, პრინცს მისალმების ნიშნად ხელი ჩამოართვა და მალევე, მისი მეუღლე გახდა. ამბობენ, რომ არავინ იცის, ბედი ვის რას უმზადებს და სწორედ ასე, წლების შემდეგ, CNN-ის ჟურნალისტის ცხოვრებაც რადიკალურად შეიცვალა. ლეტიციას ამბავი ესპანეთის სამეფო ოჯახის პატარა ზღაპრული ისტორიაა, რომელიც როგორც ზღაპრებში ხდება ხოლმე, ბედნიერი დასასრულით დაგვირგვინდა. Getty ლეტიცია ორტიზ როკასოლანო სრულიად ჩვეულებრივ ოჯახში დაიბადა, მამა ჟურნალისტი იყო, ხოლო დედა - მედდა. 2 დასთან ერთად იზრდებოდა. სკოლის დასრულების შემდეგ პროფესიაზე ბევრი არ უფიქრია, მამის კვალს გაჰყვა და ჟურნალისტიკაზე ჩააბა. მუშაობდა ABC და EFE-ის ტელევიზიებში, შემდეგ კი CNN-ზე გადავიდა. ლეტიცია რეპორტიორი ჟურნალისტი იყო და ისეთ ამბებს აშუქებდა, როგორიც იყო 11 სექტემბრის ტერაქტი, პრეზიდენტის ინაუგურაცია, ვიზიტი ბარაკ ობამასთან, თამამად რომ ვთქვათ, CNN ორტიზს დიდ ამბებს ანდობდა. უცხოური პრესა წერდა, რომ ლეტიცია ორტიზსა და მეგან მარკლის ბევრი საერთო აქვთ - ორივე ჩვეულებრივი ოჯახებიდან წამოსულები არიან და სამყაროში ყველაზე ცნობილი ოჯახების შთამომავლებს უმშვენებენ გვერდს. ლეტიცია ორტიზი პრინცესობამდე ქორწინებაშიც იმყოფებოდა, მისი რჩეული საშუალო სკოლის ლიტერატურის მასწავლებელი გერერო პერსმა იყო, ლეტიციას და გერეროს ურთიერთობა 10 წელიწადს გრძელდებოდა, თუმცა ქორწინებამ დიდხანს ვერ გასტანა და ერთ წელში დასრულდა. მიუხედავად წარსულის ამ ძველი ამბისა, პრინცესა ლეტიციას ცხოვრების ეს ნაწილი პრესის განხილვის საგანი მაინც გახდა. 2003 წელს სამსახურიდან გადაღებაზე წასულმა ლეტიცია ორტიზმა ესპანეთის მეფე ფილიპე VI გაიცნო, მაშინ ფილიპე ასტურიას პრინცი იყო. ერთ-ერთ ცერემონიაზე დაჯილდოების შემდეგ პრინცი კულისებში მედიის მოსანახულებლად და მადლობის სათქმელად შევიდა, სადაც ლეტიციას შეხვდა, ხელი ჩამოართვა და ოთახიდან გავიდა. წერდნენ, რომ ლეტიცია პრინცს მაშინ ფარულად ხვდებოდა, თუმცა ამბავი მხოლოდ მოსაზრება იყო და ვერავინ ადასტურებდა. შეხვედრიდან რამდენიმე თვეში პრესამ ფარული რომანის შესახებ “ჭორი” კვლავ გაავრცელა. ამბავი ფარულ რომანზე მაშინ გამართლდა, როდესაც ლეტიციამ საბოლოოდ დატოვა სამსახური და 2003 წელს ნიშნობაც დაანონსდა. პრინცმა და ლეტიციამ 16-კარატიანი ბრილიანტის ბეჭდით ერთმანეთის სიყვარული გაასაჯაროვეს და ახალი სამეფო ისტორიის წერაც დაიწყო. ლეტიციას პირველი ქორწინება სამოქალაქო წესით ჩატარდა, კათოლიკურმა ეკლესიამ ნება დართო მას ფილიპესთან ქორწილი ტრადიციულად ჩაეტარებინათ და 2004 წელს სამეფო ქორწილის თარიღი ჩაინიშნა. 2004 წლის 21 მაისს, ქორწილამდე ერთი დღით ადრე, სამეფო ოჯახმა სტუმრებისთვის გალავახშამიც მოაწყო, ელ პარდოს სამეფო სასახლეში. ოთხ მთავარ მაგიდას ესპანეთის სამეფო ოჯახი უძღვებოდა. ვახშამს 300 სტუმარი ესწრებოდა. 22 მაისს, ქორწილის დღეს, ლეტიციას დიდი თეთრი კაბა ეცვა, გრძელი ფატითა და ტრადიციული სამოსის დეტალებით. ფილიპეც პრინცის სამოსში გამოწყობილი წარდგა ეკლესიაში. ქორწილი ალმუდენას ტაძარში შედგა და ცერემონიას 1200 სტუმარი ესწრებოდა. როგორც სამეფო ოჯახმა დაწერა, წყვილის ქორწილი 50 წლის მანძილზე პირველი სამეფო ქორწილი იყო და ამ დღისთვის მზადება დიდხანს, დიდი შრომით მიდიოდა. დღეს წყვილს 2 შვილი ჰყავს - ლეონორი, ასტურიის პრინცესა და სოფია. 2014 წელს სამეფო ოჯახში პატარა ცვლილებები დაიწყო, ხუან კარლოს I 40-წლიანი მეფობის შემდეგ ტახტიდან გადადგა, ფილიპე ახალი მეფე გახდა, რის შემდეგაც ლეტიციამ დედოფლის ტიტული მიიღო, რაც მისთვის რთული აღმოჩნდა. წარსულის ამბები ქორწინებიდან დღემდე ახსენებენ თავს, პრესაც ამ შანსს ხელიდან არ უშვებს და ესპანური გაზეთების საყვარელი თემები ლეტიციას ცხვირის ოპერაცია, წინა ქორწინებაში გაკეთებული აბორტი და ძველი სასიყვარულო ურთიერთობებია. 2015 წელს სამეფო ოჯახზე დაწერილ ისტორიულ წიგნში ლეტიცია ქორწინების დროს გამოვლილ რთულ პერიოდს იხსენებს. ამბობს, რომ ფილიპეს მეგობრები მას “მოახლედ” მოიხსენიებდნენ და ჩვეულებრივი ცხოვრების გამო, ხშირად დასცინოდნენ კიდეც. სამეფო ოჯახის შიგნით დაპირისპირების პარალელურად, პრინცესა ახალ სკანდალშიც გაეხვა. ლეტიციას მეგობარმა დელ ბურგომ მასზე და ლეტიციაზე დაწერილ წიგნში - “ლეტიცია და მე” გაასაჯაროვა, რომ დედოფალი ლეტიცია ქორწინების წინა ღამეს დაუკავშირდა და მადრიდის ერთ-ერთ რესტორანში შეხვედრა სთხოვა. დელ ბურგოს თქმით, დედოფალმა შეხვედრის ბოლოს სთხოვა, არასდროს მიეტოვებინა ის, მეტიც მას ლეტიციამ სელფიც გაუგზავნა, სადაც მისი ნაჩუქარი შარფი ეკეთა და მუდმივ სიყვარულს ეფიცებოდა. მედიაში წერდნენ, რომ ლეტიციას ასევე რომანი ჰქონდა მის სიძესთან, როდესაც ის პრინცს ხვდებოდა. ანტონიო ვიგო ლეტიციას დის მეუღლე იყო, როდესაც მედია ამ ახალ ჭორზე ალაპარაკდა, სამეფო ოჯახმა ამ სკანდალზე კომენტარი არ გააკეთა. სკანდალები, ჭორები, გაუგებრობა, სამეფო წყვილი ესპანეთში ერთ-ერთი განხილვადი თემაა, თუმცა 2003 წლიდან დღემდე უკვე 20 წელი გავიდა, ლეტიცია და ფილიპე დღემდე ერთად არიან, შვილებს ზრდიან და საზოგადოებაში ერთად თუ ცალ-ცალკე ხშირად ჩნდებიან. არ ატარებენ საქორწინო ბეჭდებს, თუმცა ყოველთვის მზრუნველი თვალებით შეჰყურებენ ერთმანეთს. ესპანეთში საზოგადოების ნაწილს სჯერა, რომ წყვილს ძლიერ უყვარს ერთმანეთი, თუმცა არსებობენ ისინიც, ვისაც სამეფო სიყვარული დიდი და საინტერესო „სპექტაკლი“ ჰგონია. სკანდალები არ მთავრდება, არც წარსულის ისტორიებს უჩანს ბოლო, თუმცა ლეტიცია ორტიზი ნამდვილად არის გოგო, რომელმაც ბევრი ქალის ოცნება აიხდინა და თავისი პრინცი რეალურ ცხოვრებაშიც იპოვა. (სპეციალურად საიტისთვის)
