"როგორ გავაგრძელო ცხოვრება შენი ღიმილის და ხუმრობების გარეშე" - რა ჰყვებიან ოჯახზე, რომლის სამი წევრი მეწყერს ემსხვერპლა და მხოლოდ მამა გადარჩა
წუხელ ტრაგედია დატრიალდა ბაღდათის მუნიციპალიტეტის სოფელ ნერგეეთში. ჩამოწოლილმა მეწყერმა ოთხი საცხოვრებელი სახლი მოიყოლა. მაშველებმა მიწის მასიდან 4 ადამიანის ცხედარი ამოიყვანეს, 5 ადამიანის სამძებრო ღონისძიებები ამ წუთებშიც მიმდინარეობს. ერთი დაშავებული კლინიკაშია გადაყვანილი.
ცნობილია, რომ გარდაცვლილთა შორის, რომელთა ცხედრები დილას მაშველებმა ნანგრევებიდან ამოიყვანეს, 20 წლის ნია რობაქიძე, ასევე ნიას დედა მაია ჩეჩელაშვილი და ბებია არიან. ოჯახიდან ცოცხალი მამა გადარჩა. ის ამ დროისთვის კლინიკაშია გადაყვანილი."ნია საკმაოდ წარმატებული სტუდენტი იყო. აკაკი წერეთლის სახელმწიფო უნივერსიტეტში სწავლობდა. ისეთი კეთილი და მზრუნველი იყო. დედასთან და ბებიასთან ერთად ნახეს გარდაცვლილი. მხოლოდ მამა გადარჩა ოჯახიდან ცოცხალი, ბაღდათის საავადმყოფოშია ახლა, როგორც ვიცი. მასზე წარსულში საუბარი გვიჭირს", - გვიყვებიან გოგონას ახლობლები.
ნია რობაქიძეზე მისი მეგობარი წერს:
"შენ ხარ უსაყვარლესი, კეთილი და უნაკლო ანგელოზი, რომელმაც ჩემს ცხოვრებაში მრავალი ბედნიერი მოგონება შექმნა. ყველა ნაბიჯი ერთად გადავდგით, სტიპენდია, კონფერენცია, შენს გარდა სხვა მეწყვილე ვერ წარმომიდგენია. მთელი თვე მე მამშვიდებდი, ჩემს ტკივილს იზიარებდი და იმედს მაძლევდი და ახლა შენ მტოვებ, შენ ყოველთვის იქნები ჩემი სული და გულის ნაწილი, საუკეთესო მეგობარი და საყვარელი დაიკო, რამდენ გეგმებს ვაწყობდით ერთად, არ ვიცი როგორ გავაგრძელო ცხოვრება შენი ღიმილის და ხუმრობების გარეშე, შენი მხარში დგომის გარეშე. ვერ ვსუნთქავ, გული მეკუმშება, არ მინდა, რომ ეს სიმართლე იყოს, მიყვარხარ, ჩემო ანგელოზო"
"ჩემო თვალებციმციმა გოგო, ჩემო მაიკო, როგორ დამიტოვეთ ქრისტო მარტო! როგორ არ შეიცოდეთ", - წერენ გარდაცვლილ მაია ჩეჩელაშვილზე.