„წელს აქტუალურია კონტრასტული ფორმები და ფერები“ - კვირის პალიტრა

ეკა სალაღაია

დადგა გაზაფხული და მით უფრო იმატებს სურვილი გამოვიყურებოდეთ ფერადად, ლამაზად და ტრენდულად. როგორია გაზაფხული-ზაფხულის მოდის ტენდენციები, ამის შესახებ "კვირის პალიტრასთან" დიზაინერი მეგი გაბუნია ისაუბრებს.

- გაზაფხული-ზაფხულის კოლექციებში­ აქტუალური და ტრენდულია მკვეთრი, თვალში მოსახვედრი როგორც ფერები, ასევე ქსოვილის ფაქტურები. ტრენდულია ლაკი, პრიალა, ვერცხლისფერი, ოქროსფერი, ასევე სარკისებური ფაქტურები, ჯაჭვი, მეტალი... წინა სეზონზე ტრენდული პასტელის ფერები წარსულს ჩაბარდა. აქტუალურია კონტრასტული ფორმები და ფერები. ვგულისხმობ ან ძალიან დიდი ზომის სამოსს, ან ტანზე მომდგარ, სილუეტურ სამოსს. ან ძალიან დიდი ზომის აქსესუარებს და ჩანთებს, ან ძალიან პატარა ზომისას. წელს შუალედური და ზომიერი არატრენდულია. ქალები და მამაკაცების მოდა დაახლოებით ამ ხაზს მიჰყვება, რაც შეეხება თინეიჯერებს, უფრო "ტიკტოკის" ტრენდებს არიან აყოლილი. რაც იქ გატრენდდება, იმას იცვამენ და აქსესუარებს ხმარობენ.

- ფეხსაცმლის ფორმაზეც ვისაუბროთ.

- ფორმა ოთხკუთხედი გახდა. ამ სეზონზე ფეხსაცმლის ცხვირები, უფრო წაკვეთილია, "კაზაჩოკის" სტილის. თუ გახსოვთ, 2000-იან წლებში რომ ფეხსაცმელი იყო, ისეთი. ჩვენ ამას თავიდან ვერ ვეგუებოდით, უშნოდ გვეჩვენებოდა, მაგრამ მერე მოვირგეთ და მოგვეწონა. რაც შეეხება სპორტულ ფეხსაცმელს, მათი მწარმოებელი ბრენდები კონკურენციის გამო ისეთ საოცრებებს აკეთებენ, რომ ავანგარდში გადავიდა ეს თემა. საოცარი ფორმის ძირებს ასხამენ, ყველანაირ ფერს იყენებენ. მოკლედ, აღარ იციან, რითი გააოცონ მოდის მიმდევრები.

აქტუალურობას არ კარგავს კლასიკური ქუსლიანი ფეხსაცმელი, ისევე როგორც საღამოს და კოქტეილის კაბები.

- შარვლის როგორი ფორმა და სიგრძე ითვლება ტრენდულად?

- გაზაფხული-ზაფხულის ჩვენებებში ძალიან განიერი, გრძელი და დაბალწელიანი შარვლებია აქტუალური.

- სიგრძე?

- ქუსლს ფარავს, მიწას ეხახუნება და ძალიან ბევრი ნაკეცი აქვს.

- ახლა პიჯაკების სეზონი დგება, მათი მორგებისასაც ოვერსაიზის ერთგულები ვიყოთ?

- კი, წელსაც ოვერსაიზის ერთგული ვართ. თუ ოვერსაიზი პიჯაკი გაცვიათ, გრძელი ან ძალიან მოკლე უნდა იყოს, ტოპივით, დიდი სამხრეებითა და გადასული მხრებით.

- კაბები რა სიგრძის აჯობებს?

- მოდურია ძალიან გრძელი, შლეიფი­ანი კაბები, თუმცა კომფორტის გამო მიდი უფრო მოთხოვნადია. აქტუალურია დიდნაკეციანი პლისე კაბები და ქვედაკაბები.

რაც შეეხება ვარცხნილობას, მაქსიმალურად ბუნებრივი უნდა იყოს. ყოველთვის ვამბობ - ისე უნდა ჩავიცვათ, რაშიც თავს თავდაჯერებულად და კომფორტულად ვიგრძნობთ. სულერთია, იქნება ტრენდული თუ არატრენდული სამოსი. თავდაჯერებული ადამიანი ბევრად ლამაზი და მომხიბლავია. აუცილებლად უნდა ჩავიცვათ ის, რასაც განწყობა გვთავაზობს და არა ის, რაც ტრენდულია. მოდას, ჩვენ, ადამიანები ვქმნით. ჩვენ უნდა მოვირგოთ მოდა და არა მოდამ მოგვირგოს ჩვენ.