თუ ტატუს გაკეთებას გადაწყვეტთ...
ფერადი ტატუ შესაძლოა მავნე იყოს. ქიმიურმა ლაბორატორიულმა კვლევებმა ცხადყო, რომ საღებავებში მავნე ნივთიერებებია. შემოწმებული 55 ნიმუშიდან 45-ში დარღვევა აღმოჩნდა. კვლევა აშშ-ში ჩატარდა, თუმცა იგივე საღებავები ქართულ ბაზარზეც შემოდის. ბუნებრივია, მათ ქართველი ტატუარტისტებიც იყენებენ და არაერთი შემთხვევაა, როდესაც ტატუს გაკეთების გამო გართულებებით ექიმებს აკითხავენ.
"კანის ტატუირება დაკავშირებულია სხვადასხვა ტიპის რისკთან"
ზაზა თელია, ექიმი-დერმატოვენეროლოგი: - ამ პრობლემის შესახებ ინფორმაცია რომ გავრცელდა, საზოგადოებაში ატყდა ვნებათაღელვა, თუმცა სიახლე არაფერია. ექიმებისთვის ცნობილია, რომ ერთ-ერთი ძლიერი ალერგენებია პოლიეთილენგლიკოლი და პლოპილენგლიკოლი და 55 მასალიდან 45-ში პროდუქტების უმეტესობა ამ 2 ნივთიერებას შეიცავდა, ეს კი ანოტაციაში არ იყო მითითებული. ეს ერთ-ერთი განმაპირობებელია იმისა, რომ ვინც ტატუ გაიკეთა, დაეწყო ალერგიული რეაქცია, კერძოდ, ალერგიული კონტაქტური დერმატიტი. ის მეტწილად სერიოზულ გართულებებს არ იძლევა, თუმცა პრობლემა ის არის, რომ ადრინდელი კვლევების მიხედვით აღმოჩნდა, რომ ტატუ საღებავებს შეუძლია განაპირობოს სხვა უფრო რთული ტიპის კანის დაზიანებები.
წითელმა საღებავმა შეიძლება განაპირობოს ლიქენოიდური დაზიანება, გრანულომატოზი, რაც ალერგიული, კანის ანთებითი რეაქციაა. თუ დაუყოვნებელი ტიპის რეაქცია საღებავთან კონტაქტიდან წუთებში ან რამდენიმე საათში იწყება, დაყოვნებული ტიპის რეაქცია მოგვიანებით იჩენს თავს. მაგალითად, გაიკეთა ადამიანმა ტატუ წითელი საღებავით და პრობლემამ 2-3 კვირაში, შესაძლოა 1 თვის შემდეგაც იჩინოს თავი. =ყველაზე საგანგაშო შემთხვევები წითელ საღებავს უკავშირდება.
- რატომ მაინცდამაინც წითელი?
- იმიტომ, რომ წითელ საღებავში შედის ნივთიერება კადმიუმი. სწორედ მის გამო ხდება ძლიერი, დაყოვნებული ტიპის კანის ანთებითი რეაქცია, რომელსაც მერე პრაქტიკულად არაფერი შველის. ურთულესია მისი გაკონტროლება. ერთ პაციენტს წითელ საღებავზე ჰქონდა გრანულომატოზური რეაქცია, აუტანელი ქავილით მიმდინარე, რომელიც მკურნალობას არ ემორჩილებოდა, იმის მიუხედავად, რომ უამრავი მკურნალობის მეთოდი იქნა შერჩეული. ბოლოს გადავწყვიტეთ კანი გადაენერგა - გუგა ქაშიბაძემ ამოაჭრა ადგილი, სადაც ტატუ იყო გაკეთებული, და სხვა ადგილიდან გადაუნერგა მისივე კანი.
- მკურნალობა პრაქტიკულად არ შველისო, ბრძანეთ გრანულომატოზურ დაავადებაზე. უფრო კონკრეტულად რას იწვევს?
- სიცოცხლისთვის სახიფათო არ არის, მაგრამ შეიძლება სიცოცხლის ხარისხი ძალზე გააუარესოს. წამყვანი სიმპტომია ქავილი. მყოლია პაციენტები, რომელთაც წითელი საღებავის გამო მსგავსი სიმპტომები დაეწყოთ, მკურნალობამ უშველა, მაგრამ მყოლია ისეთიც, რომელსაც არ უშველა.
- ანაფილაქსიურ რეაქციაზეც იყო საუბარი.
- ანაფილაქსიური რეაქცია ნებისმიერმა ალერგენმა შეიძლება გამოიწვიოს, მათ შორის პოლიეთილენგლიკოლმა, პლოპილენგლიკოლმა და კადმიუმმა.
- რამდენად ხშირად გაკითხავენ ტატუს შემდეგ გაკეთებული მელამებით?
- არცთუ ისე ხშირად. დაახლოებით წელიწადში 10-ჯერ.
- რამდენად ემხრობით ტატუს?
- ყოველთვის, როდესაც ადამიანი რაღაც გადაწყვეტილებას იღებს, რისკ-სარგებელიც უნდა შეაფასოს. კანის ტატუირება დაკავშირებულია სხვადასხვა ტიპის რისკთან. თუ ადამიანი ამაზე თანახმაა, ეს მისი ნებაა, ხოლო თუ აYცნობიერებს რისკებს, სასურველია უარი თქვას ტატუზე. გიდასტურებთ, რომ სხვადასხვა ტიპის რისკები არსებობს.
"წითელი ყველაზე მეტად ალერგიულია"
ლაშა მაზმიშვილი, ტატუარტისტი: - რეგულაციების შემდეგ ახალი საღებავები იმდენად ალერგიული აღარ არის. ბოლო თაობის საღებავები უკეთესია. წითელი საღებავი ყველაზე მეტად ალერგიულია, პრეტენზიულია მწვანე და ლურჯიც, თუმცა სერიოზულ გართულებას არ იწვევს. პრობლემები იქმნება ძველი მელნებით გაკეთებული ტატუს ლაზერით მოშორების დროს.
- წლიდან წლამდე ტატუს მოყვარულთა რიცხვი მცირდება თუ იზრდება?
- უფრო და უფრო პოპულარული ხდება ტატუ. საღებავები რომ შეიძლება გამაღიზიანებელ ნივთიერებებს შეიცავდეს, ეს ადრეც ვიცოდით და კლიენტებს ყოველთვის ვაფრთხილებდით...
- ყველაზე ხშირად სხეულის რომელ ნაწილზე იკეთებენ ტატუს?
- ბიჭები უფრო მკლავებს იხატავენ, თუმცა არც გოგონები ჩამორჩებიან. ტატუს გაკეთება ჯობს სიგრილეში, შემოდგომის მიწურულს, ზამთარში, მაგრამ ხშირად სწორედ მაშინ მაკითხავენ, როცა დათბება, ალბათ, იმიტომ, რომ ტატუ გამოაჩინონ.