"ჩემი სიცოცხლით ვაგებ პასუხს, პოზიცია შეუცვლელია!" - რატომ გაითიშა ქოჩორაშვილის ინსტაგრამ გვერდი - ეროვნული ნაკრების ფეხბურთელის მამა შვილის განცხადებას ეხმიანება
გუშინ სამოქალაქო ორგანიზაციების ინიციატივით, რესპუბლიკის მოედნიდან პარლამენტის მიმართულებით, "თავისუფლების მარში" გაიმართა.
"თავისუფლების მარშს“ ოპოზიციური პარტიის ლიდერები, არასამთავრობო ორგანიზაციის წარმომადგენლები და კულტურის სფეროს წარმომადგენლები შეუერთდნენ.
მარშთან დაკავშირებით სოციალურ ქსელში პოსტი გამოაქვეყნა სხვადასხვა ცნობილმა ადამიანმა, მათ შორის ფეხბურთელმა გიორგი ქოჩორაშვილმაც.
ფეხბურთელმა, რომელმაც ისტორიულ მატჩზე გოლიც გაიტანა, ინსტაგრამის "სთორიში" აქციიდან ფოტო გამოაქვეყნა. სულ მალე კი გავრცელდა ინფორმაცია, რომ ფეხბურთელის ინსტაგრამ გვერდი სოციალურ ქსელში აღარ იძებნებოდა...
მოგვიანებით გიორგის მამამ, როინ ქოჩორაშვილმა ის ფოტო გამოაქვეყნა, რაც ფეხბურთელის ინსტაგრამზე იყო.
"ძალიან ბევრი ჟურნალისტი რეკავს, ბოდიში რომ არ გპასუხობთ, ჩვენი პოზიცია აქ დაფიქსირებულია, ჩემი სიცოცხლით ვაგებ პასუხს, პოზიცია შეუცვლელია!" - წერს როინ ქოჩორაშვილი.
ერთ-ერთი ვერსიით, ფეხბურთელის პროფილს ტექნიკური პრობლემა შეექმნა.