"ექსმინისტრს რამ ათქმევინა, რომ არალიცენზირებული წამლები იყიდებოდა ქვეყანაში?.. ახლა ყველა პაციენტს ჰგონია, რომ იმ წამალზეა საუბარი, რომელსაც ის იღებდა..."
"სიცოცხლის სიყვარული ყველაფერს შეგვაძლებინებს!"
გოგონა, რომელმაც სიმსივნე დაამარცხა, ახლა სხვების ჯანმრთელობისთვის იბრძვის
"მჯერა, რომ სიცოცხლის სიყვარული ყველაფერს შეგვაძლებინებს! ადამიანების თვითგადარჩენის ინსტინქტი ძალიან მაღალია და გადავრჩებით, ეს საკუთარ თავზე გამოვცადე და გადავრჩი. მართალია, დღეს პირველი ჯგუფის ინვალიდი ვარ და სულ სამი ჯირკვალი მაქვს დარჩენილი სხეულში, თუმცა მაინც ვაგრძელებ ცხოვრებას და დიდი იმედი მაქვს, რომ კიდევ დიდხანს ვიქნები ცოცხალი. მინდა ყველა ონკოპაციენტი გამოჯანმრთელდეს. ხვალ პირველი დღე გვაქვს დაანონსებული უწყვეტი პროტესტისა (იგულისხმება 8 აპრილი. - ავტ.). მინდა საქართველო იყოს ევროპული ოჯახის წევრი, ევროპა ჩვენი სიცოცხლის გარანტიაა. ყველაზე ხშირად პაციენტები მიმართავენ სწორედ ევროპის ქვეყნებს მკურნალობისთვის. იქ გამართული სისტემაა და არ უწევთ კარდაკარ სიარული დაფინანსების მოსაპოვებლად, წამლების მოსაძიებლად, ვთვლი, რომ ევროპა ჩვენი სიცოცხლის გარანტიაა. მინდა საქართველოშიც ევროპული სტანდარტის მედიცინა გვქონდეს, ულიმიტო, პერსონალიზებული და ხარისხიანი ჯანდაცვა. კანცელარიასთან სწორედ ამ მოთხოვნით მივალთ ხვალ. მჭირდება თქვენი მხარდაჭერა. მე 24 საათი კანცელარიასთან ვიქნები", - ეს "კავშირი სიცოცხლისთვის" ერთ-ერთი დამფუძნებლის, გვანცა აფხაიძის "ფეისბუკ"-მიმართვაა. გოგონა, რომელმაც სიმსივნე დაამარცხა, ახლა სხვების ჯანმრთელობისთვის იბრძვის.
გთავაზობთ ამონარიდებს სტატიიდან, რომელიც ჟურნალში "გზა" დაიბეჭდა:
"მოგეხსენებათ, 2023 წელს ჩვენი მთავრობა, ჯანდაცვის სამინისტრო გზავნიდა წერილებს ევროკავშირის ქვეყნებში და ამტკიცებდა, ჩვენთვის ხელმისაწვდომია ყველანაირი მკურნალობა და გამოუშვით ჩვენი დაავადებული მოქალაქეები სამშობლოშიო. ამის შედეგად დააბრუნეს უამრავი ადამიანი დეპორტაციით და მათ აქ დახვდათ სრულიად დანგრეული სისტემა. ევროპის ქვეყნებში ამ ხალხს ეუბნებოდნენ, - თქვენთან ყველაფერია, რაც გჭირდებათ. მთავრობა მობილიზებული დაგხვდებათო, რეალობა კი ის არის, რომ წამალი, რომელსაც ისინი იღებდნენ ევროპაში, აქ არც ერთ სააფთიაქო ქსელში არ იძებნება და მეტიც, რეგისტრირებულიც კი არ არის. ეს იმას ნიშნავს, რომ არ გვაქვს არანაირი ხელმისაწვდომი მკურნალობა..."
"ჩვენი ბენეფიციარია ქალბატონი მანანა, რომელმაც 5 გადასხმა გაიკეთა. 6 ათასი ლარი მხოლოდ პრეპარატი ღირს, რომელიც მას სჭირდება და უკვე ამოეწურა ლიმიტი. ამ ქალბატონს არა აქვს შესაძლებლობა, 6.000-ლარიანი წამლით თვითონ გააგრძელოს მკურნალობა. პენსიონერია და წარმოუდგენელია, მან ეს თანხა შეაგროვოს. როგორც ამბობს, მიღებული 5 გადასხმის შემდეგ არაჩვეულებრივი შედეგი მაქვს, მაგრამ კიდევ 9 გადასხმის თანხას ვერ ვიშოვი და უნდა დავანებო თავი მკურნალობასო. ასე როგორ შეიძლება? სრულფასოვანი მკურნალობა კი არა, ნახევრადაც ვერ მიიყვანა ადამიანმა საქმე ბოლომდე..."
"ექსმინისტრმა ამას წინათ აღნიშნა, რომ არალიცენზირებული წამლები იყიდებოდა ქვეყანაში და არ დაასახელა ეს პრეპარატები. შედეგად, ახლა ყველა პაციენტს ჰგონია, რომ იმ წამალზეა საუბარი, რომელსაც ის იღებდა... ეს რამ ათქმევინა, ვერ ვხვდები. ბოლომდე უნდა გამოააშკარავონ, რასაც ამბობენ. მე როგორც ვიცი, თურმე 2022 წელს შემოდიოდა ეს პრეპარატი და არც უხარისხო იყო. 2024 წელს აცხადებს რაღაცას და ყველა პაციენტს გულს უხეთქავს ადამიანი, რომელზეც უდიდესი პასუხისმგებლობაა, ეს არანაირ ლოგიკაში არ ჯდება. თუ ასე იყო, ხარისხის კონტროლის ორი ლაბორატორია გვაქვს და სად იყვნენ აქამდე?..."
სტატიას სრულად ჟურნალ "გზის" 11 აპრილის ნომერში წაიკითხავთ.
ლიკა ქაჯაია