"საქართველოს მოღალატე ხარ!" - საპროტესტო მსვლელობისას აქტივისტებს გზაზე ავტომობილით დავით კაჭარავა შეხვდა: რა ხდებოდა ადგილზე?
"უცხოური გავლენის გამჭვირვალობის შესახებ" კანონპროექტის წინააღმდეგ ახალგაზრდების პროტესტი გრძელდება. ამ წუთებში ახალგაზრდები მსვლელობით ევროკავშირის საელჩოსკენ მიდიან.
აქტივისტებს მსვლელობისას ავტომობილით დავით კაჭარავა შეხვდა.
"მონა, საქართველოს მოღალატე ხარ! საქართველო მტერო" - ამ სიტყვებით მიმართავდნენ კაჭარავას აქტივისტები.
კანონპროექტის მხარდამჭერ დეპუტატს აქციის ერთ-ერთმა ორგანიზატორმა სთხოვა, რომ ნებისმიერ ფორმატში გამართონ დებატები, სადაც ახსნიან, "რატომ არის ეს კანონპროექტი რუსული", რაზეც კაჭარავამ უპასუხა. "ორი სხვადასხვა კანონია თავისი შინაარსით და პუნქტებით და მუხლებით, კი ბატონო. ჩვენ მივესალმებით არგუმენტირებულ და კონსტრუქციულ საუბარს, იქნება მუხლობრივი განხილვა, დღემდე ვერ ვნახეთ ვერცერთი არგუმენტირებული... ახალგაზრდები შეიყვანეს შეცდომაში, ბევრმა აქტივისტმა პირველივე დღიდან გარე აქტორებმაც გადადგეს ნაბიჯები" - ამბობს კაჭარავა.
ვინმეს არ ეგონოს, რომ ჩვენი გადაწყვეტილების გამო გვეშინია, ეს კანონი არის ქართული და ემსახურება საქართველოს ინტერესებს, ეს არის მეტი დამოუკიდებლობა საქართველოსთვის და მეტი დამოუკიდებლობა ავტომატურად ნიშნავს ჩვენი ხელისუფლების მეტ პასუხისმგებლობას, - ასე მიმართა „უცხოური გავლენის გამჭვირვალობის შესახებ” კანონპროექტის საწინააღმდეგო აქციის მონაწილეებს „ხალხის ძალის“ წევრმა დავით კაჭარავამ.
კაჭარავამ აღნიშნა, რომ საქართველო ყოველდღიურად გახდება მეტად დამოუკიდებელი და ევროკავშირში გაწევრიანდება ამაყად, ქვეყნის ფასეულობებისა და წინაპრების პატივისცემით.
„ამიტომ ჩვენ ამ გზაზე ვივლით და ყოველდღიურად გავხდებით უფრო მეტად დამოუკიდებლები და მიგვიღებენ ევროკავშირში ამაყად, ჩვენი ფასეულობებით, ჩვენი წინაპრების პატივისცემით“, - განაცხადა კაჭარავამ, რომლის კომენტარსაც პრესსამსახური ავრცელებს.
"ინტერპრესნიუსი"