"გადავწყვიტეთ, ქაშვეთის ტაძრის კარი დაიკეტოს ჩვეულ დროს... აქამდე ტაძარი აქციების დასრულებამდე ღია იყო" - საპატრიარქო
ქაშვეთის ტაძრის კარი საპროტესტო აქციების დროს, ექსცესების თავიდან ასაცილებლად, დაკეტილი იქნება. ინფორმაციას საპატრიარქოს საზოგადოებასთან ურთიერთობის სამსახური ავრცელებს.
"როგორც მოგეხსენებათ, 2024 წლის 10 მაისს ქაშვეთის წმინდა გიორგის სახელობის ტაძარში მოხდა სამწუხარო ინციდენტი. აქედან გამომდინარე, შემდგომი შესაძლო ექსცესების თავიდან ასაცილებლად მიღებულ იქნა გადაწყვეტილება, რათა ტაძარი დაიკეტოს ჩვეულ დროს. აქვე აღვნიშნავთ, რომ ამ დრომდე ტაძარი ამა თუ იმ საპროტესტო აქციების დასრულებამდე (ხშირად დილის სამ, ოთხ საათამდე) ღია იყო" - ნათქვამია ინფორმაციაში.
საპატრიარქოს ტელევიზიის მიერ გავრცელებული ინფორმაციის თანახმად, 10 მაისს, გამთენიისას, კონკრეტულმა პირებმა საკურთხეველში შესვლა მოითხოვეს, უარის მიღების შემდეგ კი სასულიერო პირს სიტყვიერი შეურაცხყოფა მიაყენეს.
"სამწუხარო ფაქტი მოხდა ლიტურგიის დაწყებამდე, ტაძარში ახალგაზრდები შემოვიდნენ და პირველი რაც გავიგე, ხმაური და უპატივცემულო მოქმედებები იყო. მოვიდნენ აღსავლის კართან, დიაკონს სთხოვეს, შევალთ საკურთხეველშიო. უარის მიღების შემდეგ დადგნენ გასასვლელ კართან და უპატივცემულოდ იქცეოდნენ. მსახურებას ვიწყებდით და პროტოდიაკონი მივიდა მათთან, სთხოვა არ ეხმაურათ, რადგან წირვას ვიწყებდით, მასაც შეურაცხყოფა მიაყენეს.
შემდეგ მეც მივედი, ვთხოვე გარეთ გამოსულიყვნენ, გამოვიდნენ, მაგრამ იქ უარესად დაიძაბა სიტუაცია. დაიწყეს მუქარები, ცოტა ხანი გვაცადეთ და თქვენ გაჩვენებთო. სიძულვილის ენით გვესაუბრებოდნენ. ადამიანები, რომლებიც ამას შეესწრნენ, ძალიან დაიძაბნენ. მათ ვთხოვე არ ჩარეულიყვნენ ამ ინციდენტში. წავიდნენ აქედან ეს ახალგაზრდები გინებით" - ამბობს ტაძრის მღვდელმსახური, დეკანოზი დავით დელიბაშვილი.
ცნობისთვის, დღეს საღამოს რუსთაველის გამზირზე "ევროპული მარშია" დაგეგმილი.