"უჩა გადაიყვანეს გლდანში, ნივთები შევუგზავნეთ" - რა ახალ ინფორმაციას ავრცელებს უჩა აბაშიძის ძმა?
დაკავებული ბლოგერის, უჩა აბაშიძის ძმა - გოგი აბაშიძე სოციალურ ქსელში პოსტს აქვეყნებს:
"ყველას ცალ-ცალკე რომ არ ვუპასუხო: უჩა გადაიყვანეს გლდანში, არის ნორმალურად, თვითონ სასამართლო საქმის მხრივ - ველოდებით, თითქოს ითქვა ივნისშიო, თუმცა სავარაუდოდ, გადაიდება ალბათ.
ოჯახის წევრებს შეხვედრის საშუალება არ გვქონია, ნივთები შევუგზავნეთ.
ესაა ის ზოგადი ინფორმაცია, რაც შემიძლია ვთქვა მის მდგომარეობაზე".
შეგახსენებთ, რომ ბლოგერ უჩა აბაშიძესა და მის მეუღლეს, მარიამ იაშვილს აღკვეთის ღონისძიების სახით პატიმრობა შეეფარდათ.
გამოძიების ინფორმაციით, მარიამ იაშვილის საკონტაქტო მონაცემები სექსუალური მომსახურების სხვადასხვა ინტერნეტ საიტებზე იყო გამოქვეყნებული, სადაც მისი მხრიდან სექსუალური მომსახურების შეთავაზება ხდებოდა. მას შემდეგ, რაც კონკრეტულ პირთან მოხდებოდა შეთანხმება და იგი მივიდოდა ზემოხსენებულ ბინაში, ბრალდებულები, აღნიშნული პირისგან მალულად, სპეციალურად დამონტაჟებული მოწყობილობების საშუალებით, სისტემატურად, უკანონოდ იღებდნენ და ინახავდნენ ინტიმური კავშირის ამსახველ აუდიო-ვიდეო ჩანაწერებს.
ამასთან, პროკურატურა აცხადებს, რომ 2019 წლიდან 2024 წლამდე პერიოდში, განხორციელდა ასობით სხვადასხვა პირის სქესობრივი კავშირის ამსახველი ათასობით ვიდეო-აუდიო მასალის ჩაწერა. იდენტიფიცირებულია რამდენიმე პირი, რომელთა პირადი ცხოვრების საიდუმლოს ამსახველი ჩანაწერებიც უკანონოდ ინახებოდა ბრალდებულთა კომპიუტერულ ტექნიკასა და ელექტრონული ინფორმაციის შემნახველ მოწყობილობებში.
გამოძიება საქართველოს სისხლის სამართლის კოდექსის 157-ე პრიმა მუხლით და 236-ე მუხლით მიმდინარეობს, რაც პირადი ცხოვრების საიდუმლოს უკანონოდ მოპოვება-შენახვას და ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვას გულისხმობს.