"დღეს ვესაუბრე საქართველოს პარლამენტის წარმომადგენლებს, ისინი ამბობენ, რომ..." - რას აცხადებს კრემლის პროპაგანდისტი, ვლადიმერ სოლოვიოვი
კრემლის პროპაგანდისტი ვლადიმერ სოლოვიოვი ამბობს, რომ ის საქართველოს პარლამენტის წარმომადგენლებს ესაუბრა. აღნიშნულის შესახებ სოლოვიოვმა 15 მაისს, გადაცემაში „საღამო ვლადიმერ სოლოვიოვთან“ ისაუბრა.
მისი თქმით, საქართველოს საკანონმდებლო ორგანოში რუსი მიგრანტების ქვეყნიდან გაძევების გეგმების შესახებ ესაუბრნენ."დღეს ვესაუბრე საქართველოს პარლამენტის წარმომადგენლებს, ისინი ამბობენ, ჩვენ მათ (საქართველოში მცხოვრებ რუსებს) ქვეყნიდან გავაძევებთ, რადგან მხარს უჭერენ არასამთავრობო სექტორს“, - აცხადებს კრემლის პროპაგანდისტი. მას არ დაუკონკრეტებია თუ ვის ესაუბრა კონკრეტულად საქართველოს საკანონმდებლო ორგანოში.
გარდა ამისა, სოლოვიოვმა ისაუბრა თითქოსდა საქართველოში გაკეთებულ "სენსაციურ განცხადებაზე“.
"ირკვევა, რომ აშშ-ის ელჩი შეხვდა ქართველ ლიდერებს და მოითხოვა მეორე ფრონტის გახსნა და ისიც კი დაასახელა რამდენი ქართველი დაიღუპება და თქვა, რომ ეს მცირე ფასია თავისუფლებისთვის, მაგრამ საქართველოს ხელისუფლებამ უარი თქვა“, - განაცხადა სოლოვიოვმა.