"კიტეს "დაბადების დღის საუკეთესო საჩუქარი - "ჩემი ცხოვრების დიდი მოვლენა და ბედნიერება..."
საქართველოს ეროვნული ნაკრების ის შემდგენლობა, რომელიც ევროპის ჩემპიონატისთვის მოემზადება, უკვე ცნობილია. საქართველო ევრო 2024-ის F ჯგუფში თურქეთს, ჩეხეთს და პორტუგალიას დაუპირისპირდება. გუნდის შემადგენლობა ნაკრების მთავარმა მწვრთნელმა ვილი სანიოლმა 22 მაისს დაასახელა. როგორც მოსალოდნელი იყო, ნაკრებში გამოძახებულია ნახევარმცველი ოთარ კიტეიშვილი.
Ambebi.ge გაცნობთ საქართველოს ნაკრების წევრებს, ამჯერად სწორედ კიტეიშვილზე მოგიყვებით...
სპორტული კარიერა სამშობლოში
ავსტრიული "შტურმისა“ და საქართველოს ეროვნული ნაკრების შემტევი ნახევარმცველი 1996 წლის 26 მარტს, რუსთავში დაიბადა. "დინამო თბილისის" აკადემიის აღზრდილის სახელზე ამ კლუბში მოგებული ოთხი ტიტულია. 2015-16 წლებში ორჯერ იყო დასახელებული საქართველოს საუკეთესო ახალგაზრდა ფეხბურთელად. გარდა ამისა, ფეხბურთის ფედერაციის გადაწყვეტილებით, ის 2017 წლის სეზონის სიმბოლურ გუნდში მოხვდა. ოთარ კიტეიშვილი 22 წლის ასაკში "დინამო თბილისის" კაპიტანი გახდა, ის ეროვნული ლიგის 2018 წლის სეზონში მეორე ნახევრის საუკეთესო მოთამაშედ დაასახელეს. კიტეიშვილმა "დინამო თბილისის" შემადგენლობაში 98 მატჩი ჩაატარა და 17 გოლი გაიტანა.
კიტეიშვილი "შტურმში“
ოთარ კიტეიშვილმა სამშობლოდან კარიერა ავსტრიაში, კონკრეტულად კი, გრაცის "შტურმში" გააგრძელა. ხელშეკრულებას ხელი 2018 წლის 31 ივლისს მოეწერა და ქართველის ტრანსფერი დაახლოებით 800 000 ევრო დაჯდა. თავდაპირველად მან ავსტრიის ბუნდესლიგის გუნდთან ხელი 4-წლიან კონტრაქტს მოაწერა, შემდგომში ეს ხელშეკრულება გახანგრძლივდა და ის დღემდე ავსტრიული კლუბის შემადგენლობის ძირითადი ფეხბურთელია.
კიტეიშვილი გუნდს თავიდანვე კარგად შეეწყო. ქართველი ამბობდა, რომ გრაცში თავს ძალიან კომფორტულად გრძნობდა.
"აქ ძალიან მეგობრული ხალხია. მნიშვნელოვანია, რომ ჩემი მეუღლე თავს კარგად გრძნობს, მე კი გუნდში საიმედო ხალხის ხელში ვარ“, - ამბობდა "კიტე" 2020 წელს ადგილობრივ მედიასთან ინტერვიუში.
"კიტეს" სატრანსფერო ღირებულების პიკიც სწორედ "შტურმში" ასპარეზობის პერიოდში დადგა. ავსტრიულ გუნდში გადასვლიდან მალევე მისმა სატრანსფერო ფასმა 1 მილიონ ევროს მიაღწია, ცოტა ხანში კი 3 მილიონს გაუტოლდა. transfermarkt - ის თანახმად, დღეს მისი სატრანსფერო ღირებულება 5 მლნ. ევროა.
2023 წლის 30 აპრილს კიტეიშვილმა კლუბთან ერთად პირველი თასი მოიგო.
მეორედ 2024 წლის 1-ლ მაისს, კიტეიშვილის "შტურმი“ ავსტრიის ჩემპიონი გახდა.
2024 წელი ფეხბურთელისთვის მართლაც საუკეთესო გამოდგა, საქართველოს ნაკრების რიგებში ის ევროპის ჩემპიონატზე გავიდა, შტურმის" რიგებში კი ავსტრიის ჩემპიონი გახდა, ამასთანავე, კიტე" ავსტრიის ბუნდესლიგის ოფიციალურმა პირებმა სეზონის საუკეთესო ფეხბურთელად აღიარეს.
დაბადების დღის ყველაზე დიდი საჩუქარი 26 მარტი "კიტეს" დაბადების დღეა. სწორედ ამ დღეს წყდებოდა ევროპის ჩემპიონატზე საქართველოს გასვლის ბედი. ურთულესი გამოდგა საბერძნეთთან დაპირისპირება, ყველაფერი თერთმეტმეტრიანების სერიამ გადაწყვიტა...
"კვეკვესკირის გადამწყვეტი პენალტის შემდეგ რა ემოციაც იყო, ალბათ, ბევრმა ჩვენგანმა ვერც გამოხატა ეს ემოცია. გასახდელში შესვლამდე ვერ ვაცნობიერებდი, რა ხდებოდა და რაოდენ დიდ რაღაცას მივაღწიეთ და როგორ გავახარეთ მთელი საქართველო", - თქვა მატჩის შემდეგ "კიტემ".