"ცოლმა დაწერა, ვითომ გაუპატიურებით ემუქრებოდა ბაჩო" - ახალი დეტალები ვარკეთილში მომხდარ ორმაგ მკვლელობაზე
თბილისში ორი ახალგაზრდა მამაკაცი მოკლეს. შემთხვევა ვარკეთილში მოხდა. არსებული ინფორმაციით, ყოფით თემაზე დაწყებული კონფლიქტის შემდეგ მამაკაცმა მეზობელი და მისი მეგობარი სანადირო თოფით მოკლა.
მოკლულები არიან 1984 წელს დაბადებული ნიკა არჩვაძე და 1985 წელს დაბადებული ბაჩო ბაშარული.
როგორც "პალიტრავიდეოს" ბაჩო ბაშარულის ახლობელი უყვება, ბრალდებულსა და ბაჩოს შორის მუდმივი კონფლიქტი იყო.
ინფორმაციისთვის:
იური კალანდარიშვილის თქმით, ბაჩო ბაშარული და ნიკა არჩვაძე სახლში მიუვარდნენ, რის გამოც საფრთხე შეექმნა მას და მისი ცოლ-შვილს და სურდა ისინი იარაღით შეეშინებინა.
"არავის დაშავება არ მინდოდა, - ამის შესახებ ვარკეთილში ორი პირის მკვლელობაში ბრალდებულმა, იური კალანდარიშვილმა სასამართლო პროცესზე განაცხადა.
„ბევრჯერ დამარტყეს. უკვე ისეთ მდგომარეობაში ვიყავი, რომ ვგრძნობდი, გონებას ვკარგავდი და გავიქეცი იქით ოთახში. მომდევდნენ, მირტყამდნენ. ავიღე ჩემი იარაღი, ამით მაინც შევაშინებ - მეთქი, როგორც კი ამოვიღე, მაშინვე მომკიდეს ხელი და წართმევა უნდოდათ ამ იარაღის. მაგ დროს მერე უკვე გავისროლე “, - განაცხადა იური კალანდარიშვილმა.
ინფორმაციისთვის, ვარკეთილში, ბაჩო ბაშარულისა და ნიკა არჩვაძის მკვლელობის ბრალდებით დაკავებულ იური კალანდარიშვილს აღკვეთის ღონისძიების სახით პატიმრობა შეეფარდა. აღნიშნული გადაწყვეტილება თბილისის საქალაქო სასამართლოს მოსამართლემ, ირაკლი ხუსკივაძემ მიიღო.
დღევანდელ სასამართლო სხდომაზე სახელმწიფო ბრალდება დაკავებულისთვის ყველაზე მკაცრი აღკვეთის ღონისძიების პატიმრობის გამოყენებას მოითხოვდა, დაცვის მხარე კი მისი გათავისუფლებას ითხოვდა.
იური კალანდარიშვილს ბრალდება ოფიციალურად დღეს წარედგინა. დაკავებულის ადვოკატი, სულხან კომახიძე აცხადებს, რომ კალანდარიშვილს განზრახ მკვლელობა არ ჩაუდენია და ის შემთხვევის დროს თავდაცვის რეჟიმში იმყოფებოდა.
შემთხვევა ვარკეთილში 5 ივნისს მოხდა, სანადირო თოფიდან გასროლით 39 წლის ბაჩო ბაშარული და 40 წლის ნიკა არჩვაძე მოკლეს. მომხდართან დაკავშირებით სამართალდამცავებმა 40 წლის მამაკაცი ცხელ კვალზე დააკავეს.
ბრალდება საქართველოს სისხლის სამართლის კოდექსის 109-ე მუხლის „ლ“ ქვეპუნქტებით (ორი პირის განზრახ მკვლელობა) წარედგინა, რაც სასჯელის სახედ და ზომად 16-დან 20 წლამდე, ან უვადო თავისუფლების აღკვეთას ითვალისწინებს.