"კამერის ჩანაწერებში ჩანს, რომ ვაკის პარკში შედის, შემდეგ კი 2 საათით დენი გაითიშა და კვალი იკარგება... დამირეკა ვიღაც ბიჭმა, წყნეთიდან" - რას წერს დაკარგულ პროფესორზე მეუღლე და რას ამბობენ შსს-ში?
მესამე დღეა, რაც თბილისში ილიაუნისა და საპატრიარქოს უნივერსიტეტის პროფესორს გიორგი გახელაძეს ეძებენ. ამის შესახებ ინფორმაცია მისმა მეუღლემ ირმა მალაციძემ გაავრცელა.
სამძებრო საქმიანობაში სამართალდამცველებიც ჩაერთნენ, თუმცა აქამდე მის შესახებ ოჯახს არანაირი ინფორმაცია არ აქვს. როგორც გახელაძის მეუღლე ამბობს, 19 ივნისს გიორგი გახელაძე უნივერსიტეტში აპირებდა წასვლას, მანქანით გაჩერებამდე ჩაიყვანა, იქ დატოვა და მას შემდეგ არაფერი გაუგია.
"ერთი თვის წინ გიორგი ძალიან ცუდად იყო - გონება დაკარგა, დაეცა და ინსულტის ნიშნები ჰქონდა, კლინიკაში იწვა, სავარაუდოდ, გარდამავალი იშემია იყო, ერთი დღით მეტყველებაც შეფერხებული ჰქონდა. მას მერე ყველაფერი გამოვიკვლიეთ, ვიმკურნალეთ, ძალიან ვუფრთხილდებოდი. გიორგიმ მოწევას თავი დაანება, სასმელსაც წვეთს აღარ იღებდა (ისედაც არ სვამდა დიდად), ანუ დიეტის რეჟიმში იყო, ძალიან ვუფრთხილდებოდი, რომ არ გადაღლილიყო... ახლა იმის მეშინია, მსგავსი ხომ არა მოხდა რა, ამ სიცხეში რომ იარა, ინსულტი ხომ არ განმეორდა" - თქვა გუშინ მალაციძემ AMBEBI.GE-სთან საუბარში.
ჩვენ გახელაძის მეუღლეს დღესაც დავუკავშირდით თუმცა ამბობს, რომ სიახლე ჯერჯერობით არაფერია.
"დამირეკა ვიღაც ბიჭმა, წყნეთიდან. ამბობს რომ დაინახა ადამიანი ეკლესიასთან ახლოს, "სანამენტეთან". ძალიან ჰგავს აღწერილობა. ვინმე ხომ არ ხართ წყნეთში?" - ეს არის ბოლო ინფორმაცია რასაც დაკარგული პროფესორის მეუღლე ავრცელებს.
როგორც AMBEBI.GE-ს შსს-ში უთხრეს, "გიორგი გახელაძის საძიებო სამუშაოები მეორე დღეა ინტენსიურ რეჟიმში მიმდინარეობს. სამძებრო სამუშაოებში დღეს დილიდან ჩაერთნენ საგანგებო სიტუაციების მართვის სამსახურის მეხანძრე- მაშველები შესაბამისი ტექნიკითა და დრონებით. ფაქტთან დაკავშირებით გამოძიება დაწყებულია 143- ე მუხლით."
"კამერის ჩანაწერებში ჩანს, რომ ვაკის პარკში შედის, შემდეგ კი 2 საათით დენი გაითიშა და კვალი იკარგება. ახლა ჩვენი ახლობლები საბაგიროსთან შეიკრიბნენ და კუს ტბის მიმდებარედ ეძებენ," - ამბობს ირმა მალაციძე.