"დიდი მადლობა მინდა გადავუხადო ვლადიმირ ვაისს... ფეხბურთში არაფერი შენდება ერთ დღეში" - რას აცხადებდა ვილი სანიოლი მის წინამორბედზე
"დიდი მადლობა მინდა გადავუხადო საქართველოს ნაკრების მწვრთნელს, ვლადიმირ ვაისს. რაც ორი კვირის წინ მოხდა, მისი წარმატებაც არის. მან ბევრი იმუშავა გუნდის სტრუქტურაზე და არაერთი ახალგაზრდა მოთამაშე მიიწვია ნაკრებში. ფეხბურთში არაფერი შენდება ერთ დღეში და არც ნახევარ წელიწადში. ეს ხანგრძლივი სამუშაოა და ვლადიმირ ვაისი ამ ყველაფრის მნიშვნელოვანი ნაწილია", - საქართველოს ნაკრების მთავარი მწვრთნელის, ვილი სანიოლის ინტერვუს მოკლე ჩანართს “ეროვნული ნაკრები“ აზიარებს.
აღნიშნული ინტერვიუ სანიოლმა უეფას ევროპის 2024 წლის ჩემპიონატზე საგზურის მოპოვებისას ფედერაციის ოფიციალურ გვერდს მისცა.
მან ხაზი გაუსვა ნაკრების წინა მწვრთნელის, ვლადიმირ ვაისის როლს იმ წარმატებაში, რასაც დღეს ეროვნულმა ნაკრებმა მიაღწია.
"ეს წარმატება იმისი შედეგია, რაც საქართველოს ფეხბურთის ფედერაციამ გასული 10 წლის განმავლობაში გააკეთა. ფეხბურთის და ინფრასტრუქტურის განვითარების მიმართულებით. სწორედ ამან განაპირობა ის, რომ დღეს ჩვენ ევროზე ვართ", - აღნიშნა სანიოლმა.
შეგახსენებთ, რომ საქართველოს ნაკრებმა ევროპის 2024 წლის ჩემპიონატი 18 ივნისს, თურქეთთან, დორტმუნდში, "სიგნალ იდუნა პარკზე" მატჩით დაიწყო, თუმცა ანგარიშით 1:3 დამარცხდა. 22 ივნისს ჩეხეთის ნაკრებთან შეხვედრა ფრედ, 1:1 დაასრულა და ევროპის ჩემპიონატზე პირველი ქულა მოიპოვა. 26 ივნისს საქართველოს ნაკრებმა ჯგუფური ეტაპის მესამე მატჩში პორტუგალია 2:0 დაამარცხა და პლეი-ოფში გავიდა.
მეოთხედ, ესპანეთთან შეხვედრა საქართველოს მარცხით, ანგარიშით 4:1 დასრულდა და ამ ეტაპზე, ჩვენი ქვეყანა ევრო 2024 გამოეთიშა.