“ვინც მახვილს აიღებს, მახვილითვე დაიღუპება” - რისკენ მოუწოდებს გია ხუხაშვილი ოპოზიციას?! - კვირის პალიტრა

ექსპერტი გია ხუხაშვილი სოციალურ ქსელში ეხმაურება "ქართული ოცნების" წინასაარჩევნო კამპანიის ერთ-ერთ მესიჯს, რომლის მიხედვით, თუ "ოცნება" მომავალ პარლამენტში საკონსტიტუციო უმრავლესობას მოიპოვებს, ის "ნაციონალურ მოძრაობას" გაასამართლებს.

“ვინც მახვილს აიღებს, მახვილითვე დაიღუპება”…ერთი კითხვა მაქვს - რადგან ხელისუფლების კამპანია იმაზე ეგება, რომ საკონსტიტუციო უმრავლესობა ოპონენტების გასასამართლებლად ჭირდება და ქუდზე კაცს იწვევს ამისთვის, რატომ არ შეიძლება ოპოზიციამ სარკისებრი კონტრ-კამპანია წამოიწყოს "ქართული ოცნების" მიმართ?!…

ამის უამრავი საფუძველი არსებობს:

1. “84”, რომელთა დიდი ნაწილი ისევ სიაში იქნება, ეჭვმიტანილია კონსტიტუციის დარღვევით სახელმწიფო ინტერესების ღალატში.

2. სისტემური კორუფცია.

3. ჩრდილოვანი, კლანური მმართველობა...

თქვით, რომ სახელმწიფო ინტერესებიდან გამომდინარე, ზუსტადაც თქვენ უნდა გქონდეთ ჯამური საკონსტიტუციო უმრავლესობა, რათა გაასამართლოთ რეჟიმი ამ დანაშაულებისთვის, რის შემდეგაც რიგგარეშე არჩევნების საკითხი ბუნებრივად დადგება.ესეც შენი ქართული ქარტია.თუ გიტევენ, შენც უნდა შეუტიო…მით უმეტეს, რომ ამისათვის 12 წლის ხანდაზმული კი არა, უტყუარი და ცხელ-ცხელი საფუძველი გაქვს", - წერს ხუხაშვილი.

"ინტერპრესნიუსი"