"საქართველოში 200-კაციანი ქორწილი ევროპაში დაახლოებით 80-კაციან ქორწილს გადაიხდის" - ევროპული ქორწილების ქართველი დიზაინერი
„ეს საქმე ურთულესია თავისი უძილობითა და სტრესებით, იმდენად, რომ ფიქრობ, ნუთუ მიღირსო?! მაგრამ ყველაფერს თავიდან იწყებ, როდესაც ქორწილის დასასრულს პატარძალი მოდის შენთან და გეუბნება, რომ უსაზღვროდ ბედნიერია, რომ ასეთი ბედნიერი შენი დახმარების გარეშე ვერ იქნებოდა“
კაცობრიობამ, ალბათ, მრავალი ჩვევა დაივიწყა, თუმცა არის ის, რაც არასოდეს შეიცვლება, თუნდაც იმიტომ, რომ ეს ბედნიერების ჩვევაა. ასეთია ქორწილი - სიცოცხლის გაგრძელებისა და ბედნიერების რიტუალი, რაც მართალია, დიდ საზრუნავსაც აჩენს, თუმცა ეს არაფერია იმ დღესასწაულთან, რასაც ქორწილი ჰქვია. ამ ფეიერვერკის სილამაზეზე ზრუნვა კი დიდი ხანია ოჯახს გასცდა და დიზაინერებში გადაინაცვლა. ასეა მსოფლიოში და ასეა საქართველოშიც. არ დაიჯეროთ, რომ ამ ხალხს, ქორწილის დიზაინერებს, ქორწილებთან დაკავშირებით ნაკლები სტრესი და შრომა აქვთ, ვიდრე ოჯახის წევრებს. უფრო პირიქით - თუნდაც პატარა ნიუანსის "ჩაფუშვა" დიდ სტრესად უჯდებათ. არა მარტო იმის გამო, რომ ეს მათ იმიჯსა და შემოსავალზე იმოქმედებს, არამედ ბედნიერების ნანატრი დღის "ჩაფუშვის" ცქერა არ არის იოლი, თანაც, როცა სოცქსელის წყალობით ამის მოწმე ლამის მსოფლიო ხდება. სხვათა შორის, სწორედ რამდენიმე ხნის წინ დაიპყრო უცხოური მედია ქუთაისში გამართულმა ქორწილმა, რომელიც თავად ქუთაისელი დიზაინერის, მაკო ყავლაშვილის იყო. დიზაინერმა, იმდენად მინდოდა ჩემი ქორწილი ზღაპრული ყოფილიყო, ყველაფერი გავიღე, 150.000 ლარი გადავიხადეო...
დიზაინერი ლიკა დუმბაძე, შეიძლება ითქვას, იტალიაში საკონტინენტთაშორისო ქორწილებს აწყობს. მას დიდი ხანია ცხოვრების ყველაზე ბედნიერი დღის გაფორმებას მსოფლიოს არაერთი ქვეყნიდან ანდობენ. ამას, რა თქმა უნდა, შრომით მიაღწია თუმცა არსებობს კიდევ რაღაც, რომლის გარეშეც სილამაზე სანახაობა ვერ გახდება. ეს სილამაზის ხედვის უნარია, რომელსაც ვერ ისწავლი, გენეტიკაში უნდა გქონდეს. ამის შესახებ კი თავად მას ვკითხეთ:
- ქართველებს სანახაობის მოწყობის ნიჭი შესაძლოა გენეტიკაშიც გვაქვს. თუმცა აღიარება მხოლოდ ნიჭს არ მოაქვს, რა გზა უნდა გადალახოს დიზაინერმა ევროპაში აღიარებისათვის, რა დაგჭირდა ამისთვის?
- ბევრი შრომა და სიჯიუტე. საქართველოში უნივერსიტეტი დავასრულე, ბარსელონაში კი - მაგისტრატურა. პროფესიად ტურიზმი და ღონისძიებების მენეჯმენტი ავირჩიე. ჩემთან სწავლობდა ჩემი იტალიელი მეუღლეც. დავქორწინდით და იტალიაში გადავედით საცხოვრებლად. მას შემდეგ 8 წელიწადი გავიდა. ამ წლებში, რაც შემეძლო, ყველაფერი გავაკეთე, რომ თავად ცხოვრება ყოფილიყო საინტერესო - მე და ჩემს მეუღლეს მოგზაურობა გვიყვარს და ბევრი ქვეყანა მოვიარეთ. თუმცა ჩემი დროის დიდი ნაწილი მაინც სამშობლოში გადის. გურიაში, ჩემს სოფელ გომში, ზოგჯერ რამდენიმე თვესაც ვატარებ და ბევრ საქმესაც ვაკეთებ ტურიზმთან ერთად. რაც შეეხება ქორწილის დიზაინს, არასოდეს მიფიქრია, რომ ამ საქმეს მოვკიდებდი ხელს, ასე ვთქვათ, ბედმა მიმიყვანა თავისთავად. როდესაც იტალიაში გადმოვედით საცხოვრებლად, სამუშაოს ძებნაში რაც ჩვენს სანაპიროზე სასტუმრო იყო, 70 მათგანში დავგზავნე რეზიუმე. რა თქმა უნდა, ვწერდი ჩემი განათლების შესახებ. რის შემდეგაც 4-მა სასტუმრომ შემომთავაზა ვაკანსია. საბოლოოდ ერთ-ერთში ქორწილის დიზაინერად მიმიწვიეს. პირველი ქორწილი ურთულესი იყო. დღემდე მახსოვს, რაც ენერგია გამაჩნდა, ყველაფერი მასში ჩავდე.
- ალბათ, უფრო ემოციურად იყო რთული.
- პირველ რიგში, ემოციურად, თუმცა დიდი შრომაც იხარჯება. იცით, მთავარი სტრესი რაშია? წყვილებზე, რომლებიც ამ ბედნიერების მოწყობას განდობენ, არ უნდა იფიქრო როგორც კლიენტებზე, არამედ იფიქრო როგორც ადამიანებზე, რომლებიც შესაძლოა ქორწილის ერთმა პატარა ნიუანსმა უსაზღვროდ გააბედნიეროს ან უსაზღვროდ უკმაყოფილი დატოვოს. ყველაფერში, რასაც ქორწილისათვის აკეთებ, ამ განცდით უნდა იხელმძღვანელო, - ყვავილების განლაგებით დაწყებული, ქორწილის ყველა სტუმრისთვის საჩუქრით დამთავრებული. ეს ურთულესია თავისი უძილობითა და სტრესებით, იმდენად, რომ ფიქრობ, რისთვის ვიტან ამას, ნუთუ მიღირსო?! მაგრამ ყველაფერს თავიდან იწყებ, როდესაც ქორწილის დასასრულს პატარძალი მოდის შენთან და გეუბნება, რომ უსაზღვროდ ბედნიერია, რომ ასეთი ბედნიერი შენი დახმარების გარეშე ვერ იქნებოდა.…
- სტუმრებისთვის მისართმევი საჩუქრები ახსენეთ. ქორწილის ეს წესი რადიკალურად განსხვავდება ქართულისაგან. ოღონდ მოდი ჩემს ქორწილში და საჩუქარს იქით გაჩუქებო? საქართველოში ყველა სტუმარი ნეფე-პატარძალს ასაჩუქრებს ახალი ოჯახის გასაძლიერებლად.
- მართლაც განსხვავდება. თუმცა, როდესაც, ვთქვათ, ამერიკელები ქორწინდებიან იტალიაში და მათი სტუმრები ამერიკიდან ჩამოდიან ევროპაში, ყველამ ხომ იცის, ამ გზაზე რამდენად დიდი ფული იხარჯება. ეს იცის ნეფე-პატარძალმაც, ამიტომ ზოგჯერ სტუმრებს თვეობით ადრეც ეპატიჟებიან და თანაც საჩუქრებს ახვედრებენ. სწორედ სტუმრების სიამოვნებისთვის აქ ქორწილი სამდღიანია, იტალიური ყველის, მოცარელას მათ თვალწინ ამოყვანით დაწყებული, შესაძლოა მკერავიც დაახვედრო, რომელიც თითოეულისთვის შეკერავს სანდლებს. მან წინასწარ იცის, რამდენი საძირე და ტყავი სჭირდება ამ საქმისთვის. ვერ წარმოიდგენთ, ეს სტუმრებს რამხელა სიამოვნებას ანიჭებს. იტალიური ქორწილების ფასი და მომხიბვლელობა კი იტალიის ლანდშაფტია, ულამაზესი ბაღები. სწორედ ამ სილამაზის შექმნის გამო ითვლებიან იტალიელები ლანდშაფტის უპირველეს სპეციალისტებად მსოფლიოში. ზოგიერთი ვილის სილამაზე სუნთქვას შეგიკრავს. იტალიაში სწორედ ასეთ ადგილებში ირჩევენ ქორწილების გადახდას. ქორწილის მთავარი სამკაული კი ვარდია. თუმცა, იტალიელებს იორდასალამებიც ძალიან უყვართ. ბოლო დროს მოდური გახდა ქორწილების შემკობა მინდვრის ყვავილებით - ამ სილამაზის სადა მშვენიერება ნელ-ნელა იპყრობს ევროპულ ქორწილებს. და კიდევ: ევროპულ ქორწილებში არის რიტუალი, რომელზეც ყველა სტუმარი იცრემლება და თავადაც მომწონს - ეს არის ნეფე-დედოფლის ფიცის ცერემონიალი. თუმცა ეს მხოლოდ ფიცი არ არის. ამ დროს იხსენებენ როგორ შეხვდნენ ერთმანეთს, როგორ მივიდნენ იმ გზამდე, რომ ოჯახი შეექმნათ.
- რასაც ქართულ ქორწილებში სიძე-პატარძალს ხალხის წინაშე იშვიათად ათქმევინებ, სილამაზის მოთხოვნილება კი ქართული ქორწილებისთვისაც მთავარია. თუმცა ეს ხშირად შეხამებულია ისტორიულ ადგილებთან, მაგალითად, თბილისის გარშემო, ქორ-ოღლის ციხეზე ხშირია საქორწილო რიტუალი. ყველა ხალხი ბედნიერების დღეს, ალბათ, იმას მიმართავს, რაც მისი გენეტიკის ნაწილია.
- ევროპაშიც ყველა ქორწილზე სრულდება იმ ქვეყნის სიმღერები თუ ცეკვები, საიდანაც ნეფე-დედოფალია.U უცხოელ მექორწილეებს იტალიური სიმღერები ძალიან მოსწონთ, იტალიელების ამ ნიჭს მსოფლიო აღიარებს, მაგრამ ქორწილებზე აუცილებლად გაისმის იმ ქვეყნის სიმღერებიც, საიდანაც სიძე-პატარძალია.
ბოლო დროს ორი ქართული ქორწილი მქონდა და ვერ წარმოიდგენთ, რა დამემართა, როცა აღმოჩნდა, რომ სიძე და მისი მეგობრები ბრწყინვალედ მღეროდნენ "მრავალჟამიერს". ამ სიმღერისას თავად იტალიელი მუსიკოსები ლამის პირდაღებული შესცქეროდნენ ქართველ ბიჭებს. არ განძრეულან, სანამ სიმღერა არ დამთავრდა. ჩემთვის ეს მომენტი სულისშემძვრელი იყო.
- ახლა მთავარი კითხვა, რა ღირს ევროპული ქორწილი?
- იტალიურ ქორწილში ერთი კაცის მასპინძლობა 800-დან 1000 ევრომდეა. საშუალოდ ქორწილში 70-დან 200-მდე სტუმარი მოდის.
- ანუ არცთუ მეტად ძვირი, ვიდრე საქართველოში.
- კი, დაახლოებით ასეა. დაბალბიუჯეტიანი ქორწილებიც არსებობს, მაგრამ თუ საშუალოდ დავითვლით, საქართველოში 200-კაციანი ქორწილი ევროპაში დაახლოებით 80-კაციან ქორწილს გადაიხდის. რაც შეეხება ქორწილის დიზაინერის შრომას ან თუნდაც გასამრჯელოს, ეს საქმე მერწმუნეთ, იმაზე მეტად შრომატევადი და სტრესულია, ვიდრე ვინმეს შეუძლია წამოიდგინოს, საქართველოში კი ბევრად მეტად. იმიტომ, რომ ევროპაში ქორწილს მხოლოდ სიძე-პატარძალი იხდის და ეს ორი უკვეთს, რაც მოსწონს, საქართველოში კი დიზაინერმა სიძის მშობლების სურვილებიც უნდა გაითვალისწინოს და პატარძლისაც. ამიტომ საქართველოს დიზაინერები უძლიერესები არიან. მეც მაქვს იმედი, რომ ამ სირთულეს მოვერევი, როცა საქართველოშიც მომიწევს ქორწილის გაფორმება.