ისრაელის ტანკები ლიბანში შეიჭრნენ - გადაიზრდება თუ არა ეს სახმელეთო ოპერაცია მესამე ლიბანის ომში?!
როგორც მოსალოდნელი გახლდათ, ისრაელი არ შეჩერდა და „პეიჯერების დეტონაციისა“ და „ბუნკერების განადგურების“ წარმატებული სპეცოპერაციების შემდეგ, დღეს,1 ოქტომბრის დილიდან უკვე სახმელეთო ოპერაციაც წამოიწყო სამხრეთ ლიბანის მიმართულებით...
სახმელეთო ოპერაციის დაწყების წინ თანამგზავრულ ფოტოებზე მოჩანდა ისრაელის „ცახალის“ ასამდე ტანკი და ჯავშანმანქანა, რომლებიც ლიბანის სამხრეთ საზღვრიდან რვა კმ-ში იყვნენ თავმოყრილნი.
ისრაელის „მერკავებმა“ ქვეითებთან ერთად გადალახეს ისრაელ-ლიბანის საზღვარი და შეუტიეს „ჰეზბოლას“ პოზიციებს, რომლებიდანაც მოასწრეს 35 რაკეტის გაშვება ისრაელის ჩრდილოეთ ნაწილში მდებარე დასახლებული პუნქტების მიმართულებით...
„ცახალისა“ და „ჰეზბოლას“ სამკვდრო-სასიცოცხლო დაპირისპირებაში ერთგვარად იჭყლიტება თავად ლიბანის არმია, რომელსაც არ სურს საბრძოლო შეტაკებაში ჩაერთოს ისრაელის „ცახალთან“ და ამიტომაც, ისიც იძულებული გახდა საკუთარი ქვეყნის საზღვრიდან სიღრმეში ხუთი კმ-ით უკან დაეხია.
არადა ლიბანის არმია, რომელიც 70 ათასამდე ადამიანს მოითვლის, არცთუ ხელწამოსაკრავი ძალაა, შეიარაღებაში აქვს 300-ზე მეტი ტანკი(მართალია მოძველებული), 1 300-მდე ჯავშანმანქანა, 500-იოდე საარტილერიო დანადგარი, 300-ზე მეტი ნაღმსატყორცნი.
მიუხედავად ამისა, ლიბანის ხელისუფლება, ახსოვს რა მეორე ლიბანის ომის მძიმე შედეგები თავისი ქვეყნისთვის, ყველანაირად ცდილობს თავი აარიდოს ახალ დიდ ომს, რის გამოც ლიბანელი პოლიტიკოსები უფრო და უფრო გაბედულად მოითხოვენ „ჰეზბოლას“, როგორც სამხედრო-პოლიტიკური ორგანიზაციის აკრძალვას ლიბანის ტერიტორიაზე.
ეს გაბედულება კი ლიბანის პოლიტიკოსთა, ისევე როგორც მოსახლეობის ნაწილში, მას შემდეგ გაიზარდა, რაც ისრაელმა ასეთი წარმატებული სპეცოპერაციები ჩაატარა ბოლო ორი კვირის განმავლობაში „ჰეზბოლას“ წინააღმდეგ, მათ შორის, მისი ლიდერის ჰასან ნასრალასა და კიდევ ორ ათეულმდე საველე მეთაურის ლიკვიდაციის სახით.
ისრაელის მიერ სამხრეთ ლიბანში წამოწყებული სახმელეთო ოპერაციის გადაზრდა მესამე ლიბანის ომში, შეიძლება, ძალიან არც თელ-ავივში სურდეთ, მაგრამ პრემიერ-მინისტრ ნეთანიაჰუს პოლიტიკური გუნდი ყველანაირად ეცდება, რაც შეიძლება მეტი დარტყმები მიაყენოს „ჰეზბოლას“ და ამისთვის ლიბანის დედაქალაქ ბეირუთამდეც კი „მიუსევს“ „მერკავებს“, რადგან ნეთანიაჰუს სჭირდება პოლიტიკური რეაბილიტაცია თავისი ამომრჩევლების თვალში იმ საშინელებების გამო, რაც 2023 წლის 7 ოქტომბერს მოხდა „ჰამასის“ დივერსიულ-ტერორისტული შეჭრის დროს ებრაულ კიბუცებში და რის მაშინვე აღსაკვეთად მზად არ აღმოჩნდა ნეთანიაჰუს მთავრობა...
ოფიციალურად,კი ისრაელის მთავრობაში აცხადებენ, რომ დღეს ლიბანის სამხრეთში დაწყებული სახმელეთო ოპერაცია ატარებს შეზღუდულ მასშტაბებს და მისი მთავარი მიზანია „ჰეზბოლას“ ძალების გადადევნა მდინარე ელ-ლიტანის ჩრდილოეთით, როგორც ეს გაეროს უშიშროების საბჭოს რეზოლუციაშია ჩაწერილი, რათა მათ მიერ გამოშვებული რაკეტები ვეღარ მისწვდნენ ჩრდილოეთ ისრაელის მაცხოვრებლებსო...
საგულისხმოა, რომ პირველი ლიბანის ომი 1982 წელსაც სწორედ ასე „შეზღუდული ოპერაციის“ სახით დაიწყო, რაც ისრაელის მიერ სამხრეთ ლიბანის 18 წლიან ოკუპაციაში გადაიზარდა.
„ახლო აღმოსავლეთში არ არის ადგილი , სადაც ისრაელი ვერ მისწვდება!“, -ისრაელის პრემიერ-მინისტრმა ბენიამინ ნეთანიაჰუმ თავის სამწუთიან სატელევიზიო გამოსვლაში ამ სიტყვებით ყველა არაკეთილმოსურნეს მიმართა, რასაც ასრულებს კიდეც-ღაზას სექტორში „ჰამასისა“, ხოლო სამხრეთ ლიბანში „ჰეზბოლას“ წინააღმდეგ მიმართული ოპერაციების პარალელურად ისრაელის ავიაციამ სირიის ტერიტორიაზე დაბომბა ამ ქვეყნის არმიის მეოთხე სატანკო ბრიგადის, რომელსაც ქვეყნის პრეზიდენტის ბაშარ ასადის ძმა მეთაურობს, შტაბი და შორეულ იემენში ჰუსიტების მთავარ საზღვაო პორტს ჰოდეიდასაც მისწვდა რაკეტებით...