"ვინც „ქართულ ქარტიას“ არ ეთანხმება, შეუძლია ხელმოწერა უკან წაიღოს" - რას აცხადებს სალომე ზურაბიშვილი?
ველოდები, რომ პარტიებმა კიდევ ერთხელ დაადასტურონ, რომ ყველაფერს ეთანხმებიან - ვინც არ ეთანხმება, შეუძლია წაიღოს უკან ხელმოწერა. საჭიროა, საზოგადოებამ იცოდეს, რომელი პარტია არის სრულიად ბოლომდე თანმიმდევრულად ამ ქარტიის უკან, - ამის შესახებ საქართველოს პრეზიდენტმა სალომე ზურაბიშვილმა გამართულ ბრიფინგზე განაცხადა.
მისი თქმით, ქარტია იმდენად მნიშვნელოვანი დოკუმენტია, რომ არ შეიძლება შემდგომში მასთან დაკავშირებით იყოს გაუგებრობა.
„მგონია, რომ დრო არის, პარტიებმა მიიღონ გადაწყვეტილება, რამდენად არიან ამ ქარტიის არა მხოლოდ სულისკვეთების ერთგულნი, არამედ მისი ყოველივე სიტყვის, იმიტომ, რომ ეს არის ისეთი დოკუმენტი, სადაც არ შეიძლება მერე იყოს რაღაც გაუგებრობა. ამ ქვეყნის სტაბილურობა ამაზე არის დამოკიდებული, რომ ჩვენ კარგად ვიცოდეთ, რომ იქამდე სანამ ამ 4 პარტიას შორის პარლამენტში შედგება ურთიერთნდობა, მანამდე ძალიან გარკვეული იყოს ვინ დგას ბოლომდე ერთგულად ამ ქარტიის უკან. ველოდები, პარტიებმა კიდევ ერთხელ დაადასტურონ, რომ ყველაფერს ეთანხმებიან - ვინც არ ეთანხმება, შეუძლია წაიღოს უკან ხელმოწერა. საჭიროა, რომ საზოგადოებამ იცოდეს, როცა ხმას მისცემს, რომელ პარტიას აძლევს ხმას და რომელი პარტია არის სრულიად ბოლომდე თანმიმდევრულად ამ ქარტიის უკან. დარწმუნებული ვარ, რომ ამით მივალთ სტაბილურად და გადავლახავთ ყველა იმ ნაბიჯს, რომელიც მიიყვანს საქართველოს მომავალ წელს ივნისში ევროკავშირის მოლაპარაკებების გახსნამდე, რომელიც, ვთვლი, არის ჩემი პასუხისმგებლობა და რომელი პასუხისმგებლობაც მერე მოხსნილი იქნება“, - განაცხადა ზურაბიშვილმა.