„ნაღიარები არ მაქვს დანაშაული. წარსულში ნასამართლევი რომ ვარ, ახლა რა შუაშია?!" - რას ამბობს იოსებ ბალარჯიშვილი, რომელიც ფიროსმანის ქუჩაზე მომხდარ მკვლელობაშია ბრალდებული
ფიროსმანის ქუჩაზე, ტატო ფირცხალაიშვილის მკვლელობაში ბრალდებული იოსებ ბალარჯიშვილი ბრალს არ აღიარებს.
აღნიშნულის შესახებ სასამართლო პროცესზე მისმა ადვოკატმა ნათია პაჭკორიამ განაცხადა.
როგორც უფლებადამცველი განმარტავს, მისი დაცვის ქვეშ მყოფი ამბობს, რომ უდანაშაულოა.
პაჭკორიას თქმითვე, ბალარჯიშვილის ფსიქოლოგიური მდგომარეობა მძიმეა.
ადვოკატი ბრალდების მხარის შუამდგომლობას, რომ დაკავებულის მიმართ ყველაზე მკაცრი აღკვეთის ღონისძიების პატიმრობის გამოყენებას არ დაეთანხმა.
სასამართლოში პოზიცია კლინიკა „ჰელსიკორიდან“ დააფიქსირა მკვლელობაში ბრალდებულმა ბალარჯიშვილმა და აღნიშნა, რომ მისი წარსულში ნასამართლეობა საქმესთან კავშირში არაა.
„ნაღიარები არ მაქვს დანაშაული. წარსულში ნასამართლევი რომ ვარ, ახლა რა შუაშია?!“- განაცხადა ბალარჯიშვილმა.
სასამართლო პროცესზე პროკურორმა განმარტება, რომ იოსებ ბალარჯიშვილი ხულიგნობის, ჯანმრთელობის ნაკლებად მძიმე დაზიანებისა და ცეცხლსასროლი იარაღის შეძენა-შენახვა-ტარების ფაქტზეა ნასამართლევი.
პროკურორის შუამდგომლობას პატიმრობის გამოყენებასთან დაკავშირებით დანარჩენი დაკავებულების ადვოკატები არ დაეთანხმნენ.
მათი განმარტებით, ბრალდებულებმა დანაშაულის შესახებ არ იცოდნენ და მათ არც მიმალვა უცდიათ.
ცნობისთვის, 20 ოქტომბერს, თბილისში, ფიროსმანის ქუჩის მიმდებარედ 37 წლის ტატო ფირცხალაიშვილი მოკლეს, იოსებ ბალარჯიშვილი კი დაიჭრა. მომხდარიდან მალევე, სამართალდამცავებმა ბალარჯიშვილი მკვლელობის ბრალდებით, მისი თანმხლები პირები კი განსაკუთრებით მძიმე დანაშაულის შეუტყობინებლობის ბრალდებით დააკავეს.
საგამოძიებო უწყების ცნობით, მკვლელობა წარსულში მომხდარი დაპირისპირების გამო ანგარიშსწორების ნიადაგზე მოხდა. შემთხვევის დღეს ჩხუბში მონაწილე მხარეები ერთმანეთს თანმხლებ პირებთან ერთად შეხვდნენ.
პროკურატურა დამნაშავე პირთა წრის გაფართოებას არ გამორიცხავს, ვინაიდან დანაშაულში მონაწილე სხვა პირთა დასადგენად გამოძიებას აგრძელებს.
იოსებ ბალარჯიშვილს ბრალდება საქართველოს სისხლის სამართლის კოდექსის 109-ე მუხლის „ბ“ ქვეპუნქტით (განზრახ მკვლელობა ისეთი საშუალებით, რომელიც განზრახ უქმნის საფრთხეს სხვის სიცოცხლეს და ჯანმრთელობას) და 236-ე მუხლის მესამე და მეოთხე ნაწილებით (ცეცხლსასროლი იარაღის მართლსაწინააღმდეგო შეძენა, შენახვა და ტარება) წარედგინა, რაც სასჯელის სახედ და ზომად 16-დან 20 წლამდე, ან უვადო თავისუფლების აღკვეთას ითვალისწინებს, სამ ბრალდებულს - დავით მაჭარაშვილს, ჯემალ ფირანიშვილს, გიორგი ბუბუტეიშვილს კი ბრალდება საქართველოს სისხლის სამართლის კოდექსის 376-ე მუხლის მეორე ნაწილით (განსაკუთრებით მძიმე დანაშაულის შეუტყობინებლობა) წარედგინა, რაც სასჯელის სახედ და ზომად 3-დან 7 წლამდე თავისუფლების აღკვეთას ითვალისწინებს.
"ინტერპრესნიუსი"