"სირინოზისა და ვეფხვის“ შეხვედრა - გაიმართა კალენდრის პრეზენტაცია, რომელიც ნეაპოლისა და თბილისის უნიკალურ ამბავს გვიყვება
21 ოქტომბერს თბილისში, ფუნიკულიორზე, Di Meo-ს 2025 წლის კალენდრის პრეზენტაცია გაიმართა. ის თავს უყრის ნეაპოლისა და თბილისის შესახებ უნიკალურ კოლექციას - ფოტოებს, ისტორიებს და ა.შ.
პრეზენტაციას არაერთი ცნობილი ადამიანი დაესწრო. საღამოს საერთაშორისო სტუმრებს მიესალმნენ საქართველოს ვიცე პრემიერი, ლევან დავითაშვილი და იტალიის ელჩი საქართველოში, მასიმილიანო დ’ანტუონო.
საღამოს სტუმრებს შესაძლებლობა მიეცათ, ენახათ ლეგენდარული ფოტოგრაფის, მასიმო ლისტრის 12 უნიკალური ფოტო. ეს ფოტოები თბილისის ყველა მნიშვნელოვან ხიბლს და ძალას ასახავს, წარმოგვიდგენს თბილისს, როგორც ხელოვნებისა და კულტურის სიმბოლოს, გვაჩვენებს ქალაქს, სადაც ადამიანებს შორის განსაკუთრებული ურთიერთობაა.
ალმანახის მომდევნო ნომრის თემა - "ნეაპოლი ხვდება თბილისს“, წარმოადგენს სირინოზისა და ვეფხვის შეხვედრას. სირინოზი და ვეფხვი ნეაპოლისა და თბილისის სიმბოლოებზე მიუთითებს. ვეფხვი, როგორც თბილისის სიმბოლო შთაგონებულია შოთა რუსთაველის "ვეფხისტყაოსნით“.
საინტერესოა, რომ კალენდრის პრეზენტაციაზე სტუმრებისთვის განსაკუთრებული დრესკოდი იყო - თამარ მეფითა და ძველი ეპოქით ინსპირირებული.
მეორე დღეს სტუმრები ოპერის თეატრში ანსამბლ "ერისიონის“ კონცერტს დაესწრნენ, რომელიც გაჯერებული იყო ტრადიციული ქართული სიმღერებით, რიტმული და ტრადიციული ცეკვით. რიტმული მუსიკა ამ ორ ქალაქს შორის კიდევ ერთი შეხების წერტილია, მაგრამ რა თქმა უნდა, კიდევ არის ბევრი საერთო, მათ შორის, ღვინო.
კალენდარში მხოლოდ თბილისის ფოტოებს არ ნახავთ, აქ არის ასევე ისტორიები, ზღაპრები, რომლებიც ამ ორი ქალაქის - თბილისისა და ნეაპოლის საერთო მაჟისცემაზე გვიყვება, მოგვითხრობს ლეგენდარული სიყვარულის ამბებს, გვიამბობს ფეხბურთით გატაცებაზე და იტალიაში, "ნაპოლის“ ჩემპიონად გახდომაში ხვიჩა კვარაცხელიას როლზე, საერთო ხელოვნებაზე და რა თქმა უნდა, პიცასა და ხაჭაპურზე.
კალენდარში გადმოცემული ტექსტების ნაწილის ავტორები არიან ანჯელა კატელო, ჩეზარე კუნაჩია, მიკელე დე ლუჩი, დანტე სტეფანო დელ ვეჩიო, დინკო ფაბრისი, მიკელე ფატიკა, ანდრეა ფორლანი, პატრიცია ლიჩინი დე რომანიოლი, ელისაბეტა მორო, ვერონიკა მურატი, გაგა შურღაია და პინო ტაორმინა.
"თბილისის კულტურა, ცივილიზაცია, მისი სპეციფიკა, შთამბეჭდავი მრავალფეროვნება მრავალი წლის განმავლობაში უგულებელყოფილი იყო დასავლეთის მიერ. ეს ყველაფერი გაბნეული იყო ლიტერატურაში, მუსიკაში, ხელოვნებაში.
თბილისი - ეს არის ქალაქი, რომელიც მეხუთე საუკუნიდან მოყოლებული აღმოსავლეთსა და დასავლეთს შორის ყველაზე მრავალფეროვანი ცივილიზაციების სამჭედლო იყო“, - ამბობს ასოციაციის დამფუძნებელი ჯენეროსო დი მეო.
ცნობისთვის, დაიბეჭდება კალენდრის 5000 ეგზემპლარი და ორი ქვეყნის სხვადასხვა უწყებებს და სპონსორებს გადაეცემა.
კალენდარი შეიქმნა ასოციაცია “Di Meo vini ad arte“-ს მიერ, იტალიის მინისტრთა საბჭოს პატრონაჟითა და ქართული გალობის ფონდის მხარდაჭერით.