"ოპოზიციას გააზრებული უნდა ჰქონდეს, რომ “ოცნებაზე“ მეტად მოეთხოვებათ და მეტად არ აპატიებს მათ ხალხი ღალატს"
“ძალიან ბევრ ადამიანს აქვს ოპოზიციის მიმართ უნდობლობა, რომ ისინი ერთ მომენტში ადგებიან და შევლენ პარლამენტში,“ - ამის შესახებ მსახიობმა ნანკა კალატოზიშვილმა “ტელეკომპანია პირველთან“ განაცხადა.
მისი თქმით, ოპოზიციურმა სპექტრმა კარგად უნდა გაიგოს, რომ საზოგადოება მათ არ ენდობა, განწყობები ნათელია და ნდობის მოსაპოვებლად საჭიროა ეფექტური ქმედებები.
“მე არ ვიცი რა უნდა გააკეთოს ოპოზიციამ ამ ნდობის მოსაპოვებლად. უბრალოდ შეუძლიათ 9 აპრილის კადრი ნახონ, სადაც ილია მეორეს ზვიად გამსახურდია უტრიალდება და ეუბნება: “მე რომც ვუთხრა, ამის მერე უკვე მოღალატედ შემრაცხავენო“...
ოპოზიციას გააზრებული უნდა ჰქონდეს, რომ “ოცნებაზე“ მეტად მოეთხოვებათ და “ოცნებაზე“ მეტად არ აპატიებს მათ ხალხი ღალატს. ხალხის განწყობა ზუსტად ვიცი. არ არის ნდობა, რომ ისინი ერთ მშვენიერ დღეს არ შევლენ,“ - განაცხადა ნანკა კალატოზიშვილმა, რომელიც ჯგუფ “დაიტოვეს“ მიერ დაანონსებულ აქცია- მსვლელობას შეუერთდა.
შეკრებილები ხელახალი არჩევნების ჩატარებას ითხოვენ.