"დავდექით დილემის წინაშე: ფული თუ ფეხბურთი?" - რა სიახლეა ბუდი ზივზივაძის კარიერაში და რას წერს ფეხბურთელის მამა?
საქართველოს ეროვნული საფეხბურთო ნაკრების ფეხბურთელის, "კარლსრუეს" თავდამსხმელის - ბუდუ ზივზივაძის კარიერაში სიახლეა.
ამის შესახებ საზოგადოებას ფეხბურთელის მამამ ამცნო.
“პირველ რიგში, ბედობას გილოცავთ მეგობრებო! იყო ჩინური, ასევე კორეული გამოწვევები!
დავდექით დილემის წინაშე: ფული თუ ფეხბურთი? ბუდუ ირჩევს ფეხბურთს მივდივართ ბუნდესლიგაში! ბუდუმ აირჩია ბუნდესლიგა! მადლობა “კარლსრუეს“, მადლობა მენეჯერებს, მადლობა საქართველო, მადლობა გია ცეცაძეს, თეიმურაზ ლორთქიფანიძეს, მამუკა ხუნდაძეს ბუდუს გამოწვრთნისა და სიყვარულისთვის!
ჩვენ თქვენთან ვართ! წინ დიდი ბრძოლებია!“ - წერს კახა ზივზივაძე.
sportall.ge -ს ინფორმაციით, 30 წლის თავდამსხმელი ბუდუ ზივზივაძე "კარლსრუედან" ბუნდესლიგის "ჰაიდენჰაიმში" გადავიდა.
კლუბის საიტის ცნობით, ზივზივაძეს კონტრაქტი 2029 წლამდე გაუფორმეს და ახალ გუნდს საწვრთნელ შეკრებაზე პარასკევ საღამოს ალგორფში შეუერთდება.
"ბუდუს თამაშს "კარლსრუეში" უკვე კარგა ხანი ვაკვირდებოდით. იქ გასულ სეზონში აბსოლუტური ლიდერი იყო, მიმდინარე სეზონში პროგრესი კიდევ უფრო განიცადა, 17 მატჩში 12 გოლი გაიტანა და დაამტკიცა, რომ ბომბარდირის განსაკუთრებული მონაცემები გააჩნია. ამიტომ დარწმუნებული ვართ, რომ ბუნდესლიგაში ადგილის შესანარჩუნებლად დაუყოვნებლივ შეუძლია ჩვენი გუნდის დახმარება. ძალიან გვიხარია, რომ ჩვენი კლუბი აირჩია", - განაცხადა "ჰაიდენჰაიმის" მმართველი საბჭოს ხელმძღვანელმა ჰოლგერ სანვალდმა.
"ჩემს შესაძენად "ჰაიდენჰაიმმა" დიდი ძალისხმევა გაიღო და ბუნდესლიგაში ასპარეზობის შანსის გამოყენებაზე უმალ დავთანხმდი. ახლა მინდა ჩემი წვლილი შევიტანო გუნდის ბუნდესლიგაში ადგილის შესანარჩუნებლად. მოუთმენლად ველი ჩემპიონატის განახლებას", - თქვა ქართველმა ფორვარდმა.
ზივზივაძის ახალი გუნდი 15 ტურის შემდეგ გერმანიის ჩემპიონატზე 10 ქულით მეთექვსმეტე ადგილზეა და 11 იანვარს "უნიონს" უმასპინძლებს.