"ჩემი ბიჭი ჩემი დიდი ფრთა იყო, ისე მძიმედ გავზარდე, ქირიდან ქირამდე ვცხოვრობდით" - რას ამბობს რიყის პარკის ტერიტორიაზე გარდაცვლილი მოზარდის დედა?
რიყის პარკის ტერიტორიაზე გარდაცვლილი მოზარდის დედა "ტვპირველთან" საუბრობს:
"ჩემი ბიჭი ჩემი დიდი ფრთა იყო, ისე მძიმედ გავზარდე, ყველაფერი გავიარეთ, ქირიდან ქირამდე ვცხოვრობდით. "დედა, რა არის ჩვენი ცხოვებაო, არაფერი არ გვაქვს, ჩემი ოთახი არ მაქვსო". დაიბნენ პატარები და ვერაფრით უშველეს, ყვიროდა და ისე ვეხმარებოდითო, ბავშვები მიყვებიან, რომ ჩავარდაო, ცუდ მდგომარეობაში არიამ ტირიან... დაბნეული ვარ, ძალა არ მაქვს. მეცოდება ჩემი ბიჭი, არ ვიცი ვის დავაბრალო, ვინ არის პასუხისმგებელი, გამგეობა? მერია?" - ამბობს მოზარდის დედა.
ინფორმაციისთვის, 25 იანვარს, თბილისში ტრაგედია დატრიალდა, რიყის პარკის სიახლოვეს 132-ე სკოლის მოსწავლე, 16 წლის იოსებ ადეიშვილი წყლით სავსე თხრილში ჩავარდა და დაიღუპა. მომხდარზე უბედურ შემთხვევაზე განცხადება გაავრცელა თბილისის მერიამ, რომელშიც ვკითხულობთ:
"გვსურს, გამოვეხმაუროთ კონკრეტული მედიასაშუალების მიერ გავრცელებულ ცრუ ინფორმაციას, თითქოს, 16 წლის მოზარდი, რომელიც რამდენიმე დღის წინ უბედური შემთხვევის შედეგად გარდაიცვალა, რიყის პარკში მდებარე ღია თხრილში ჩავარდა.გავრცელებული ინფორმაცია არის სრული სიცრუე და ცილისწამება. სამწუხაროდ, ტრაგედია დატრიალდა კერძო ტერიტორიაზე არსებულ შენობა-ნაგებობაში. კიდევ ერთხელ ვიმეორებთ, რომ შემთხვევა მოხდა ერთ-ერთ კერძო საკუთრებაში.
სამწუხაროა, რომ მედია მსგავს ტრაგედიას იყენებს უწყების დისკრედიტაციისთვის.უბედური შემთხვევაზე დაწყებულია გამოძიება.
მოვუწოდებთ მედიის წარმომადგენლებს, პატივი სცენ საკუთარ პროფესიას და საზოგადოებას მიაწოდონ მხოლოდ და მხოლოდ გადამოწმებული ინფორმაცია.
თბილისის მერია ღრმა მწუხარებას გამოთქვამს მოზარდის გარდაცვალების გამო და სამძიმარს უცხადებს მის ოჯახს".