"არავისთვის შეუთანხმებია... ყველასთვის მოულოდნელი იყო" - რა გამოხმაურებები მოჰყვა სოფო გელოვანის საპროტესტო განცხადებას ლილიკო ნემსაძის საიუბილეო კონცერტზე
11 თებერვალს, თბილისის დიდ საკონცერტო დარბაზში, ლილიკო ნემსაძის საიუბილეო კონცერტი, "ჩუმად ნათქვამი“ გაიმართა. ღონისძიება კომპოზიტორის 30-წლიან შემოქმედებას მიეძღვნა და მისი ყველაზე ცნობილი ჰიტები შესრულდა.
კონცერტში მონაწილეობდნენ ქართველი ესტრადის ვარსკვლავები, მათ შორის: ლელა წურწუმია, მერაბ სეფაშვილი, მაია ჯაბუა, თემურ თათარაშვილი, აჩიკო ნიჟარაძე, სოფო გელოვანი, გიორგი მეფისაშვილი და სხვები. ასევე, ანსამბლები: "ქართული ხმები“, "თეატრალურის კვარტეტი“, "ფორტე“ და ვაჟთა ვოკალური ანსამბლი.პროექტის მხარდამჭერი გახლდათ საქართველოს კულტურისა და სპორტის სამინისტრო და თბილისის მერია. ღონისძიებას ესწრებოდა კულტურის მინისტრი თინათინ რუხაძეც.
კონცერტის ჩატარება 29 ნოემბერს იყო დაგეგმილი, მაგრამ ქვეყანაში მიმდინარე პოლიტიკური მოვლენების გამო, 11 თებერვლისთვის გადაიდო. საღამომ ანშლაგით ჩაიარა, სადაც ცნობილი კომპოზიტორის მიერ წლების განმავლობაში შექმნილი ჰიტები შესრულდა. როგორც აღვნიშნეთ, მონაწილეებს შორის იყო მომღერალი სოფო გელოვანი, რომელსაც 15 წლის ასაკში ლილიკო ნემსაძემ "ხორუმი“ დაუწერა და ამ სიმღერაზე კლიპიც გადაიღო.ამჯერად ფილარმონიის სცენიდან სოფო გელოვანმა სიმღერის დასრულების შემდეგ პოლიტიკური განცხადება გააკეთა.
"ამ სიმღერის შემდეგ, თუ არ ვთქვი ჩემი სათქმელი, მაშინ არც ჩემი სიმღერა იქნება გულწრფელი და არც ჩემი ხმა მართალი. ამ წუთას, ამ სცენიდან მინდა სოლიდარობა გამოვუცხადო ყველა იმ პატიმარს, ვისაც უსამართლოდ ართმევენ ხვალინდელ დღეს" - განაცხადა მომღერალმა. გელოვანის გამოსვლიდან რამდენიმე წუთში ჩანაწერი სოციალურ ქსელში გავრცელდა და მედიაში დღის განმავლობაში ერთ-ერთ ყველაზე განხილვად თემად იქცა.