"ქართული ოცნება" სისხლის სამართლის კოდექსში აბრუნებს მუხლს, რომელსაც "სამშობლოს ღალატი" ერქმევა. მსგავსი მუხლი "ნაციონალური მოძრაობის" ხელისუფლებამ 2007 წელს გააუქმა. "ქართულ ოცნებას" მუხლში ერთადერთი ცვლილება შეაქვს - "სახელმწიფოს ღალატის" ნაცვლად, "სამშობლოს ღალატი" ჩაიწერება. გვესაუბრება კონსტიტუციონალისტი, მოძრაობა "სოციალური დემოკრატიისთვის" წევრი ვახუშტი მენაბდე, რომელთანაც საუბარს ახალდაფუძნებული მემარცხენე პოლიტიკური მოძრაობით ვიწყებთ. - ჩვენი მოტივაცია განპირობებულია იმით, რომ არსებულ წინააღმდეგობის პროცესს მხარი დავუჭიროთ და უფრო გავაძლიეროთ. დღეს ქვეყანაში არის დემოკრატიული წინააღმდეგობა, რომელიც ცდილობს შეინარჩუნოს ეს ქვეყანა და მოქალაქეების გავლენა პოლიტიკაზე, მეორე მხრივ, არის რეჟიმი, რომელიც მასობრივად ანგრევს ადამიანის უფლებებს, ანადგურებს დემოკრატიულ ინსტიტუტებს, მითვისებული აქვს ძალაუფლება და ცდილობს ქვეყნის საგარეო კურსის შეცვლას. ჩვენი მოძრაობის წევრები ამ დროის განმავლობაში ჩართული ვიყავით ამ წინააღმდეგობის პროცესში და დავასკვენით, რომ ახლა ვართ იმ ეტაპზე, როდესაც წინააღმდეგობას სჭირდება ახალი სტრატეგია. ის უნდა ეფუძნებოდეს თანამოაზრეთა გაერთიანებებს, რომლებიც შექმნიან წინააღმდეგობის კერებს მთელი ქვეყნის მასშტაბით. წინააღმდეგობას სჭირდება არა ლიდერები, არამედ მყარი ჯგუფები, რომლებიც შეძლებენ მათ გარშემო საზოგადოების ამა თუ იმ ჯგუფების მობილიზებას. ჩვენ დავინახეთ, რომ წინააღმდეგობის მოძრაობაში არსებობდა ერთი შეუვსებელი სივრცე, ეს იყო სოციალ-დემოკრატიული მემარცხენე ძალის არსებობის საჭიროება და გავაერთიანეთ ადამიანები, რომლებიც წლებია, პოზიციონირებენ როგორც სოციალ-დემოკრატები, მუშაობენ ისეთ საკითხებზე, როგორიცაა სოციალური, ეკონომიკური, გარემოსდაცვითი და პოლიტიკური თანასწორობა... გავერთიანდით იმისთვის, რომ მკაფიოდ გამოვკვეთოთ იმ ძალის კონტურები, რომელსაც აქვს ხედვა, როგორ უნდა შევქმნათ ახალი ქვეყანა, რომელიც იქნება სოციალურად, ეკონომიკურად, კულტურულად და პოლიტიკურად თავისუფალი, სადაც ქვეყნის მოქალაქეებს ექნებათ შესაძლებლობა ისარგებლონ ქვეყანაში არსებული სიკეთეებით, პოლიტიკურ ძალაუფლებაზე წვდომით და სხვა. ჩვენი ფართო კოალიცია არის ყველაზე დიდი სოციალ-დემოკრატიული გაერთიანება, რომელსაც აქვს კონკრეტული და სხვა დიდი მოძრაობებისგან განსხვავებული ხედვა ქვეყნის განვითარებაზე. ჩვენი პირველი ამოცანაა, წინააღმდეგობაში ჩართულ ადამიანებს მივცეთ ხედვა იმისა, თუ როგორი უნდა იყოს ქვეყანა, როდესაც წინააღმდეგობა გაიმარჯვებს, როგორ გარდავქმნათ ქვეყანა, როგორ შევცვალოთ არასწორი განვითარების გზა, რომელსაც ბოლო 35 წელია გავდივართ –- მხოლოდ ძლიერებს აძლიერებს, მდიდრებს ამდიდრებს, ჩვენს სიკეთეებს მხოლოდ ერთეულების ხელში აქცევს, მხოლოდ ელიტას აძლევს ძალაუფლებაზე ზეგავლენის უფლებას და ა.შ. მეორე მხრივ, გვინდა წინააღმდეგობის მიმართ კრიტიკულად განწყობილ ადამიანებს დავანახოთ, რომ მასში მათთვისაცაა ადგილი. ჩვენი სახით წინააღმდეგობაში არსებობს ძალა, რომელიც იმ საკითხებზეა ორიენტირებუული, იგივე პრობლემები აწუხებს, რაც მათ - ინფლაცია, მაღალი ფასები, სიღარიბე და სხვა. ჩვენი მთავარი ხედვაა, რომ დემოკრატია სოციალური სახელმწიფოს გარეშე არის ელიტების ძალაუფლება და ხალხის უგულებელყოფა, ხოლო სოციალური სახელმწიფო დემოკრატიული ინსტიტუტების და დემოკრატიის გარეშე არის ავტორიტარიზმი. დემოკრატია ან იქნება სოციალური, ან ის საერთოდ არ იქნება. - ოპოზიცია ყველაზე კარგს იმას იზამს, ჩუმად თუ იქნებაო, ამბობთ. არადა, ბევრი სწორედ სიჩუმისა და უმოქმედობისთვის აკრიტიკებს მათ. თანაც, ეს იმ პოლიტიკოსების სპექტრია, ვისაც იმ ადამიანებმა მისცეს ხმა, ვინც წინააღმდეგობაშია. - ამ მანიპულირებულ არჩევნებშიც კი ოპოზიციას 900 ათასამდე მოქალაქემ მისცა ხმა (მეტსაც მიიღებდნენ, რომ არა მანიპულაციები, ამას არავინ უარყოფს), მაგრამ ეს იყო ტრაგიკული არჩევანი - ჩვენ გვქონდა არჩევანი ცუდსა და უარესს შორის, იძულებული ვიყავით არჩევანი მიგვეცა ბევრი სუბიექტისთვის, რომელთაგან არც ერთი არ მოგვწონდა, მათთან ბევრი წინააღმდეგობა და კონფლიქტური შეხედულება გვქონდა, მაგრამ ქართველმა საზოგადოებამ არჩია ჰყოლოდა ბევრი მოთამაშე პოლიტიკაში, თუნდაც არც ერთი არ ყოფილიყო მისთვის მოსაწონი, ვიდრე ერთი, ერთპიროვნული მმართველი ძალა. ქართველი ამომრჩევლის გათვლა იყო, თუ ჩვენ გვეყოლება კოალიციური მთავრობა, შევძლებთ სული მოვითქვათ და ნელ-ნელა დავიწყოთ მუშაობა პოლიტიკური სპექტრის გასაჯანსაღებლად და დემოკრატიის ხარისხის გასაუმჯობესებლადო. ოპოზიციურმა პარტიებმა არ უნდა იფიქრონ, რომ ოქტომბერში მიღებული ხმები დღეს ჯიბეში უდევთ. ეს იყო ამომრჩევლის ერთჯერადი გადაწყვეტილება, იმიტომ, რომ ის გადარჩენის რეჟიმში ფუნქციონირებდა. ამ პარტიებს ნდობა რომ არ ჰქონდა, ეს აჩვენა არჩევნების შემდეგ ერთთვიანმა პერიოდმა, როცა ოპოზიციამ, მიუხედავად იმისა, რომ არჩევნების მანიპულაციის უამრავი მტკიცებულება იყო, მაინც ვერ შეძლო საზოგადოების მობილიზება, საზოგადოება კი ხედავდა, არჩევნები რომ გაყალბდა, მაგრამ არ ენდობოდა ლიდერებს. შემდეგ უკვე "ოცნების" საგარეო პოლიტიკის კურსის ცვლილებამ გამოიწვია ხალხის გამოსვლა ქუჩაში და მანდაც ოპოზიციური პარტიები მონაწილეობდნენ არა როგორც ლიდერები, არამედ რიგითი დემონსტრანტები. - თქვენი აზრით, რა წაიყვანს "ოცნებას" დათმობაზე, პროტესტის ფორმები ხომ არაა შესაცვლელი? - იმისათვის, რომ რეჟიმმა უკან დაიხიოს, საჭიროა იგრძნოს ხალხის ძალა და ის, რომ ხალხთან მარცხდება. ამისთვის აუცილებელია ახალი სუნთქვა შემოვიტანოთ წინააღმდეგობაში. უკვე აღვნიშნე, რომ საჭიროა სხვადასხვა ინტერესების, მსოფლმხედველობის, იდეოლოგიის გარშემო გაერთიანებული ჯგუფები, რომლებიც უზრუნველყოფენ მდგრად წინააღმდეგობას. ამის კარგი მაგალითია "საზმაუს" პროტესტი, მდგრადი პროტესტი, რომელსაც ჰყავს კონკრეტული ადრესატი, აქვს კონკრეტული მოთხოვნები და შეთავაზებები. ამ პროტესტმა აჩვენა, როგორი შეიძლება იყოს საზოგადოებრივი მაუწყებელი, თუ ის ხალხისთვის ღია იქნება. ერთთვიანმა ეთერმა ძალიან ბევრს დაანახა, როგორ შეიძლება ემსახურებოდეს "საზმაუ" ხალხს და სწორედ ამან, კონკრეტულმა ადრესატმა, პრობლემიდან გამოსავლის გზების ჩვენებამ განსაზღვრა "საზმაუს" პროტესტის მდგრადობა წინააღმდეგობაში. ჩვენ გვჭირდება ბევრი ასეთი წერტილი, სადაც პროტესტის მონაწილეები აჩვენებენ კონკრეტულ პრობლემას, კონკრეტულ პასუხისმგებელ პირს და ამ პრობლემის გადაჭრის გზას. ჩვენი მოძრაობა ამ პროცესში საკუთარი კონტრიბუციის შეტანას აპირებს. - "ქართული ოცნება" თანდათან ამკაცრებს კანონებს. მეტიც, ის გეგმავს სს კოდექსში "სამშობლოს ღალატის" მუხლის დამატებას, რომელიც თავის დროზე წინა ხელისუფლებამ ამოიღო. - მმართველი პარტიის ამ ინიციატივას სამართლებრივი მიზანი არა აქვს, ეს პროპაგანდაა. "ქართულ ოცნებას" სამშობლოს ღალატისთვის ადამიანის მსჯავრდადების შემოღება ერთადერთი მიზნით დასჭირდა - გააძლიეროს პროპაგანდა. რეჟიმს ეს ცვლილება იმიტომ კი არ შემოაქვს, რომ სამართლებრივი პრობლემების გადაჭრა უნდა, მას არაფერში სჭირდება კანონი, თუ ვინმეს დაჭერა უნდა, ყოველგვარი კანონის გარეშეც დაიჭერს და ბევრჯერ გაუკეთებია ეს, ვისაც რასაც უნდა, იმას დააბრალებს - სასამართლო მისია, პროკურატურა პოლიტიზებულია. "ქართული ოცნების" ამოცანა პროპაგანდისტულია, პროპაგანდას სჭირდება რაღაც კლიშეები, სახელები, რომლის ქვეშაც მოაქცევს რეჟიმისადმი წინააღმდეგობრივად განწყობილ ადამიანებს თუ ჯგუფებს. ჩვენ ვიცით მათი ტერმინები: "აგენტები", "უსამშობლოები"... ახლა უკვე ამას "სამშობლოს მოღალატეები" დაემატება, ეს მორიგი ტერმინია, რომელიც "ქართულ ოცნებას" კონკრეტული ჯგუფის მოსანიშნად და მტრად გამოსაცხადებლად სჭირდება. - როგორ ფიქრობთ, საერთოდ უნდა იყოს თუ არა კოდექსში ეს მუხლი? - საქართველოს სს კოდექსში არის ყველა ის მუხლი, რომელიც სახელმწიფო უსაფრთხოების დასაცავად არის საჭირო. არსებობს და განსაზღვრულია აკრძალული ქმედებები, რომელთა გამოყენებითაც ეფექტიანად შეგვიძლია დავიცვათ სახელმწიფოს უსაფრთხოება. მათთვის მნიშვნელოვანია ამ ტერმინის გაჩენა პროპაგანდისტული მიზნებისთვის, მათ წინააღმდეგაა გამიზნული, ვინც "ქართულ ოცნებას" არ დაემორჩილება და წინ აღუდგება. ამ კანონის მიღების შემდეგ მთავარ დარტყმას მიიღებენ ის ადამიანები, რომლებიც "ქართულ ოცნებას", როგორც რეჟიმს, დიდ საფრთხეს უქმნიან.
